பொதுப் பாதுகாப்பு மற்றும் பாராளுமன்ற விவகாரங்களுக்கான பிரதி அமைச்சர் சுனில் வட்டகல, சமூக ஊடகங்களில் ஜனாதிபதி மற்றும் சிரேஷ்ட அமைச்சர்கள் பற்றி அவதூறு பரப்பும் உள்ளடக்கத்தை இடுகையிடுபவர்கள் மீது அவசர கால விதிமுறைகளின் கீழ் நடவடிக்கை எடுக்குமாறு சட்ட அமுலாக்க அதிகாரிகளைக் கேட்டுக் கொண்டதையடுத்து, ஊடக அமைப்புகள் அவருக்கு எதிராக கண்டனம் தெரிவித்துள்ளன.
இலங்கை உழைக்கும் பத்திரிகையாளர் சங்கம் (SLWJA) விடுத்த ஒரு கடுமையான அறிக்கையில், வட்டகலவின் கருத்துக்களுக்கு கண்டனம் தெரிவித்தது. குறிப்பாக நாடு ஒரு தேசிய அனர்த்தத்தில் போராடிக் கொண்டிருக்கும் இந்த நேரத்தில், இக்கருத்துக்கள் கருத்துச் சுதந்திரம் மற்றும் ஊடக உரிமைகளுக்கு நேரடி அச்சுறுத்தலை ஏற்படுத்துகின்றன என்று சங்கம் எச்சரித்தது.
வட்டகல தனது சர்ச்சைக்குரிய கருத்துக்களை டிசம்பர் 2 அன்று, அரசாங்க அதிகாரிகள் மற்றும் பிரதி ஊடக அமைச்சர் கௌசல்யா ஆரியரத்ன கலந்துகொண்ட மாலபே பிரதேச செயலகத்தில் நடந்த ஒரு கூட்டத்தில் தெரிவித்தார். இந்த கலந்துரையாடலின்போது, அனர்த்த நிலைமை குறித்து சிதைக்கப்பட்ட அல்லது பொய்யான தகவல்களை, பௌதீக ரீதியாகவும், சமூக ஊடகங்கள் மூலமாகவும், செயற்கை நுண்ணறிவு (AI) மூலம் உருவாக்கப்பட்ட உள்ளடக்கங்கள் மூலமாகவும் பரப்புவதற்கு ஒரு ஒருங்கிணைந்த முயற்சி மேற்கொள்ளப்பட்டு வருவதாக பிரதி அமைச்சர் கூறினார். மேலும், வெளிநாடுகளில் உள்ள தனிநபர்கள் இத்தகைய நடவடிக்கைகளுக்கு பங்களிப்பதாகவும் அவர் குற்றம் சாட்டினார்.
SLWJA இன் கூற்றுப்படி, வட்டகல இதைவிட மேலும் சென்று, கூட்டத்தில் இருந்த பொலிஸ் அதிகாரிகளை, இத்தகைய உள்ளடக்கத்தை இடுகையிடுபவர்களை “சந்தேக நபர்களாக அல்லாமல் குற்றவாளிகளாகவே“ கருதுமாறும், தற்போது நடைமுறையில் உள்ள அவசரகால விதிமுறைகளின் கீழ் அவர்கள் மீது நடவடிக்கை எடுக்குமாறும் நேரடியாக உத்தரவிட்டார்.
அரசாங்கம் முன்னர் பிரசாரம் செய்த ஜனநாயகக் கொள்கைகளை கைவிட்டுவிட்டதாக SLWJA குற்றம் சாட்டியது. கடந்த காலத்தில் பகிரங்கமாக சுதந்திரப் பேச்சுரிமையை ஆதரித்த தனிநபர்கள் இப்போது அதைக் கட்டுப்படுத்த முயற்சிக்கிறார்கள் என்றும் அது குறிப்பிட்டது. இது ஒரு தனிமைப்படுத்தப்பட்ட சம்பவம் அல்ல என்றும், கடந்த ஓராண்டாக பத்திரிகையாளர்கள் மற்றும் ஊடக தளங்கள் மீதான அரசின் அழுத்தம் அதிகரித்து வருவதன் ஒரு பகுதி என்றும் சங்கம் கூறியது.
குறிப்பாக அனர்த்த காலங்களில் அவசரகால அதிகாரங்கள் மூலம் வர்ணனைகளைக் குற்றமாக ஆக்க முயற்சிப்பது, அரசியலமைப்பு உரிமைகளை மீறும் ஒரு கடுமையான செயலாகும் என்று அது எச்சரித்தது. ஜனநாயக சுதந்திரங்களை மதிக்குமாறும், விமர்சனங்களை அடக்குவதற்கு அனர்த்தம் தொடர்பான அதிகாரங்களைப் பயன்படுத்துவதைத் தவிர்க்குமாறும் சங்கம் அரசாங்கத்தை வலியுறுத்தியது.
தனிப்பட்ட அறிக்கையில், இணைய ஊடகச் செயலும் (Internet Media Action – IMA) வட்டகலவின் கருத்துக்களுக்கு “கடும் எதிர்ப்பை“ வெளிப்படுத்தியது. இந்தக் கருத்துக்கள், அனைத்து இலங்கை குடிமக்களுக்கும் உத்தரவாதம் அளிக்கப்பட்ட ஒரு அடிப்படை உரிமையான “கருத்துச் சுதந்திரத்திற்கு ஒரு தீவிர அச்சுறுத்தல்“ என்று அது விவரித்தது.
சமூக ஊடகங்கள் அல்லது பிற ஊடகங்கள் மூலம் ஜனாதிபதி மற்றும் பிறருக்கு எதிராக “தீங்கிழைக்கும் தனிப்பட்ட தாக்குதல்கள்” நடத்தப்படுவதாகவும், அத்தகைய செயல்களுக்கு அவசரகால சட்டத்தின் கீழ் கடுமையான தண்டனை வழங்கப்பட வேண்டும் என்றும் வட்டகல கூறியது “அதிகார துஷ்பிரயோகம்“ என்று IMA தெரிவித்தது. பௌதீக ரீதியாகவோ, ஆன்லைனிலோ அல்லது AI மூலம் உருவாக்கப்பட்டாலோ தவறான கருத்துக்களையும் அல்லது தவறான சித்தரிப்புகளையும் அனுமதிக்க முடியாது என்ற பிரதி அமைச்சரின் கூற்றையும் அந்த அமைப்பு விமர்சித்தது.
அனர்த்த முகாமைத்துவத்திற்காக விதிக்கப்பட்ட அவசரகால விதிமுறைகளைப் பயன்படுத்தி அரசியல் விமர்சனத்தை அடக்குவது “அடிப்படை உரிமைகளின் திருட்டு“ ஆகும் என்று அந்த அறிக்கை கூறியது. இந்த நடவடிக்கை எதிர்ப்பை வேண்டுமென்றே கட்டுப்படுத்துவதையும், சமூக ஊடகப் பாவனையாளர்கள் மத்தியில் அச்சத்தை ஏற்படுத்துவதையும் நோக்கமாகக் கொண்டுள்ளது என்றும் அது மேலும் குறிப்பிட்டது.
“விமர்சனம் என்பது குற்றமல்ல,” என்று IMA கூறியதுடன், இத்தகைய சொல்லாட்சி டிஜிட்டல் ஆர்வலர்கள் மற்றும் சாதாரண குடிமக்கள் மத்தியில் பரவலான அச்சுறுத்தலுக்கும் சுய-தணிக்கைக்கும் வழிவகுக்கும் என்றும் எச்சரித்தது.
வட்டகல தனது அறிக்கையை நிபந்தனையின்றி திரும்பப் பெற வேண்டும் என்று கோரிய அந்த அமைப்பு, அவசரகாலச் சட்டங்களின் கீழோ அல்லது வேறு எந்த சட்ட கட்டமைப்பின் கீழோ கருத்துச் சுதந்திரத்தைக் குறைக்க முடியாது என்று வலியுறுத்தியது. சிவில் சமூகம் மத்தியில் அதிகரித்து வரும் கவலைகளுக்கு மத்தியில், அடிப்படை உரிமைகளின் பாதுகாப்பு குறித்த தனது நிலைப்பாட்டை தெளிவுபடுத்துமாறும் அது அரசாங்கத்தை வலியுறுத்தியது.
