dft.
பீக்கோ டிரெயில் (Pekoe Trail) என்பது இலங்கையில் உள்ள, தேயிலைத் தோட்டங்கள் மற்றும் மலைப் பிரதேசங்கள் வழியாகச் செல்லும் ஒரு நீண்ட தூர நடைபாதை ( long-distance hiking trail ), இது மலை நாட்டின் அழகை அனுபவிக்க உதவுகிறது; இது உலகின் சிறந்த சுற்றுலாத் தலங்களில் ஒன்றாக சர்வதேச அங்கீகாரத்தைப் பெற்றுள்ளது.
—
இலங்கையின் பெருந்தோட்டப் பாதைகளை உலகத்தரம் வாய்ந்த சுற்றுலாத் திட்டமாக மாற்றிய ஸ்பெயின் நாட்டு சுற்றுலா நிபுணரான மிங்குவேல் குனாட் உடனான நேர்காணல் இங்கே இடம்பெறுகிறது. மத்திய மலைநாட்டின் ஊடாகச் செல்லும் 300 கிலோமீட்டர் நீளமான ‘பீக்கோ டிரெயில்’ (Pekoe Trail) பாதையை உருவாக்கியவர் இவராவார்.
கேள்வி: பீக்கோ டிரெயில் பாதையை உருவாக்கியவர் என்ற ரீதியில், நிலச்சரிவினால் பாதிக்கப்பட்ட மத்திய மாகாணத்தை சுற்றுலாவுக்காக மீண்டும் நிலைப்படுத்துவதன் முக்கியத்துவத்தை எப்படிப் பார்க்கிறீர்கள்?
பதில்: மத்திய மாகாணம் என்பது இலங்கையில் உள்ள சாதாரண ஒரு சுற்றுலாப் பகுதி மட்டுமல்ல. இது நாட்டின் சுற்றுலாச் சூழல் மண்டலத்தின் (ecosystem) மிக முக்கிய மையமாகும். சர்வதேசச் சுற்றுலாப் பயணிகளில் சுமார் 80–90 வீதமானோர் மத்திய மாகாணத்தின் ஊடாகவே பயணிக்கின்றனர் என நான் மதிப்பிடுகிறேன். இது கலாசார முக்கோணம், தேயிலை தேசம் மற்றும் தெற்குப் பகுதி ஆகியவற்றை இணைக்கும் ஒரு இணைப்புத் திசு போன்றது.
கண்டி, தலதா மாளிகை, வரலாற்றுச் சிறப்புமிக்க தேயிலை மலைகள் மற்றும் மலைநாட்டு மக்களின் வாழ்வியல் பாரம்பரியம் என இலங்கையின் ஆழமான கலாசார மற்றும் ஆன்மீகச் சொத்துக்கள் இங்குதான் உள்ளன. மத்திய மாகாணம் நிலையற்றதாகத் தோன்றினால், அதன் தாக்கம் ஒட்டுமொத்த சுற்றுலாப் பொருளாதாரத்திலும் எதிரொலிக்கும். எனவே, இப்பகுதியை மீண்டும் நிலைப்படுத்துவது ஒரு அவசியமான பணியாகும்.
கேள்வி: காலநிலை தயார்நிலை (Climate preparedness) குறித்து இலங்கை மறுபரிசீலனை செய்ய வேண்டும் என்று நினைக்கிறீர்களா?
பதில்: ஆம், நிச்சயமாக. தெற்காசியாவிலும் இலங்கையிலும் மழைவீழ்ச்சி முறைகளில் ஒரு கட்டமைப்பு மாற்றம் ஏற்பட்டுள்ளதை காலநிலை அறிவியல் தெளிவாகக் காட்டுகிறது. குறுகிய காலத்தில் அதிக மழை பொழிவது, வெள்ளம் மற்றும் நிலச்சரிவு அபாயத்தை அதிகரிக்கிறது.
காலநிலை அபாயத்தை வெறும் ‘அவசரகாலப் பதிலளிப்பு’ (emergency response) மூலம் மட்டும் எதிர்கொள்ள முடியாது; அதைத் ‘தகவமைப்பு மற்றும் தயார்நிலை’ (adaptation and preparedness) மூலம் அணுக வேண்டும். அதாவது, எங்கே கட்டுமானம் செய்யலாம், மலைச்சரிவுகளை எப்படிப் பாதுகாப்பது, வடிகால் அமைப்புகளை எவ்வாறு பராமரிப்பது போன்ற அடிப்படைத் திட்டமிடல்களில் காலநிலை அபாயத்தைக் கருத்தில் கொள்ள வேண்டும்.
கேள்வி: நிலச்சரிவுப் பிரச்சினைகள் பீக்கோ டிரெயில் தொடர்பான சுற்றுலாவை எவ்வாறு பாதிக்கும்?
பதில்: மலைப்பகுதி சுற்றுலாவுக்கு நிலச்சரிவுகள் ஒரு பாரிய அச்சுறுத்தலாகும். ஆனால், இந்த அபாயத்தை நாம் எவ்வளவு புத்திசாலித்தனமாக கையாளுகிறோம் என்பதே முக்கியம்.
பீக்கோ டிரெயில் ஒரு நெகிழ்வான அமைப்பாக வடிவமைக்கப்பட்டுள்ளது. காலநிலை மாற்றங்களுக்கு ஏற்ப சில பாதைகளைத் தற்காலிகமாக மாற்றுவதற்கோ அல்லது மூடுவதற்கோ நாம் தயாராக இருக்க வேண்டும். நிலச்சரிவு அபாயத்தை மறைக்காமல், அதை வெளிப்படையாகக் கூறி மேலாண்மை செய்தால், சுற்றுலாப் பயணிகள் மற்றும் நிறுவனங்கள் அதைச் புரிந்துகொள்வார்கள்.
கேள்வி: பிற நாடுகளில் சுற்றுலாவுடன் காலநிலை தயார்நிலையை இணைக்கும் அனுபவம் உங்களுக்கு உண்டா?
பதில்: ஆம். நியூசிலாந்து, சுவிட்சர்லாந்து மற்றும் ஸ்பெயின் போன்ற நாடுகளில் பாதைகள் தொடர்ந்து கண்காணிக்கப்படுகின்றன; அபாய வரைபடங்கள் பொதுமக்களுக்குத் தெரிவிக்கப்படுகின்றன. நேபாளம் போன்ற நாடுகள் மலைச் சுற்றுலா என்பது காலநிலைக்கு ஏற்பத் தொடர்ந்து மாறக்கூடியது என்பதைக் கற்றுக்கொண்டன.
பீக்கோ டிரெயில் என்பது வெறும் சுற்றுலாத் தயாரிப்பு மட்டுமல்ல; அது ஒரு ‘பாதுகாப்புத் தளம்’ (stewardship platform). இதற்கு முறையான நிதியுதவியும், தொழில்முறை மேற்பார்வையும் தேவை. இலங்கை காலநிலை விழிப்புணர்வுடன் கூடிய சுற்றுலாவில் தலைசிறந்து விளங்க இது ஒரு நல்ல வாய்ப்பாகும்.
