THE NEW HUMANITARIAN
சுமார் ஒரு மாதத்திற்கு முன்பு இலங்கையை உலுக்கிய டிட்வாபுயலால் ஏற்பட்ட நிலச்சரிவு மற்றும் வெள்ளத்தில் சிவானு தயாளன் தனது வீட்டையும் வாழ்வாதாரத்தையும் இழந்தார். ஆனால்இ முன்கூட்டிய எச்சரிக்கை வழங்கப்பட்டதில் ஏற்பட்ட தோல்விகளும் தமிழ் பேசும் சமூகங்கள் தொடர்ந்து ஓரங்கட்டப்படுவதும் அவருக்கும் அவரது குடும்பத்தினருக்கும் இன்னும் மோசமான விளைவுகளை ஏற்படுத்தியிருக்கக்கூடும்.
கடந்த நவம்பர் 27 அன்று 2004 சுனாமிக்குப் பிறகு நாடு சந்தித்த மிக மோசமான இந்தப் பேரிடர் தாக்கியபோது 43 வயதான தொழிலாளியான தயாளனுக்கு அவரது தாய்மொழியான தமிழில் எந்த எச்சரிக்கையும் கிடைக்கவில்லை. ஒரு சில எச்சரிக்கைகள் சிங்களம் மற்றும் ஆங்கிலத்தில் மட்டுமே வழங்கப்பட்டன.
“நிலச்சரிவு ஏற்பட்டபோது நான் வீட்டில் இருந்தது என் அதிர்ஷ்டம்” என்று மாத்தளை மாவட்டத்தைச் சேர்ந்த தயாளன் தெரிவித்தார். வெள்ளத்தால் பாதிக்கப்பட்ட 18 பேருக்குப் புகலிடமாக இருந்த அவரது வீடு நிலச்சரிவில் சிக்கியபோது அனைவரும் தப்பியோட வேண்டியிருந்தது. “இப்போது கூரையின் ஒரு பகுதி மட்டுமே தெரிகிறது; மற்றவை மண்ணுக்குள் புதைந்துவிட்டன.”
தயாளன் அந்த இரவில் வீட்டில் இல்லையென்றால் அவரது மனைவி மூன்று சிறு குழந்தைகள் மற்றும் முதிய பெற்றோர்கள் தாங்களாகவே தப்பித்திருக்க வேண்டும். அருகிலுள்ள தேயிலைத் தோட்டங்களில் வசிக்கும் சுமார் 20 குடும்பங்களுக்கு எந்த எச்சரிக்கையும் வரவில்லை என்று அவர் கூறினார்.
பேரழிவின் அளவு
டிசம்பர் 17 நிலவரப்படி அனர்த்த முகாமைத்துவ நிலையம்) 643 உயிரிழப்புகளைப் பதிவு செய்துள்ளது. 200 பேர் இன்னும் காணவில்லை. 1.7 மில்லியன் மக்கள் பாதிக்கப்பட்டுள்ளனர். நாட்டின் பொருளாதார இழப்பு 6 பில்லியன் டொலர்கள் என மதிப்பிடப்பட்டுள்ளது.
அனர்த்த முகாமைத்துவ நிலையம் சுமார் 3.2 கோடி குறுஞ்செய்தி எச்சரிக்கைகளை அனுப்பியதாகக் கூறினாலும் பாதிக்கப்பட்ட பகுதிகளில் உள்ள பலருக்கு அவை கிடைக்கவில்லை. குறிப்பாக மலையகத் தமிழ் மக்கள் தங்களுக்குப் புரியாத மொழியில் வரும் தகவல்களால் பெரும் சிரமத்திற்குள்ளாகினர்.
தி நியூ ஹுமானிடேரியன்’ நடத்திய ஆய்வில் குறிப்பாக அதிக ஆபத்துள்ள பகுதிகளில் உள்ள பலருக்கு இந்த எச்சரிக்கைகள் சென்றடையவில்லை என்பது கண்டறியப்பட்டது. தோட்டப் பகுதிகளில் வசிக்கும் மலையகத் தமிழ் குடும்பங்கள் (இந்தியாவிலிருந்து புலம் பெயர்ந்தவர்களின் வம்சாவளியினர்) செய்திகளுக்காக சமூக ஊடகங்களையே நம்பியிருக்க வேண்டியிருந்தது. ஆனால் அங்கேயும் அவர்களுக்குப் புரிந்த மொழியில் தகவல்கள் கிடைக்கவில்லை.
ஊவா மாகாணத்தின் பதுளை மாவட்டத்தில் தோட்டச் சமூகங்களை வலுப்படுத்தும் நோக்கில் இயங்கும் ‘ஊவா விவசாயிகள் மேம்பாட்டு அறக்கட்டளையின்’ தலைவரான நாகமுத்து நாகுலேஸ்வரி இது குறித்துக் கூறுகையில்: “வரலாற்று ரீதியாக ஓரங்கட்டப்பட்ட தேயிலைத் தோட்டத் தொழிலாளர்கள் கூடுதல் அபாயங்களை எதிர்கொள்கின்றனர். ஏனெனில் தகவல்கள் பெரும்பாலும் அவர்களின் முதலாளிகள் மூலமாகவே வடிகட்டப்பட்டு அவர்களுக்கு வந்து சேர்கின்றன. அந்த முதலாளிகளே இன்றும் இவர்களது வாழ்வின் பல அம்சங்களைக் கட்டுப்படுத்துகின்றனர். இத்தகைய கூடுதல் பாதிப்புகள் கருத்தில் கொள்ளப்படாததால் பேரிடர் தயார்நிலை மற்றும் பதிலளிப்பு நடவடிக்கைகளில் பெரும் இடைவெளிகள் ஏற்படுகின்றன” என விளக்கினார்
எச்சரிக்கை விடுக்கப்பட்டதா?
அனர்த்த முகாமைத்துவ நிலையம்மொழிபெயர்ப்புத் தோல்விகளுக்காகப் பலமுறை விசாரணைக்கு உட்படுத்தப்பட்டுள்ளது. பேரிடர் அபாயக் குறைப்புக்கான ‘சென்டாய் கட்டமைப்பு’ ( மற்றும் ஐக்கிய நாடுகள் சபையின் ‘அனைவருக்கும் முன்கூட்டிய எச்சரிக்கை’ போன்ற சர்வதேசக் கொள்கைகளில் அரசு கையெழுத்திட்டிருந்தாலும் அடிமட்ட அளவில் அதிகாரிகள் செயல்படும் விதத்திற்கும் அந்தக் கொள்கைகளுக்கும் இடையே பெரும் இடைவெளி இருப்பதை இது அம்பலப்படுத்துகிறது.
இலங்கை ஒரு தேசிய அளவிலான பல்வகை அபாய முன்கூட்டிய எச்சரிக்கை அமைப்பை உருவாக்கியிருந்தாலும் டிட்வா புயலின் போது ஏற்பட்ட தகவல் தொடர்பு முறிவு பெரும் சந்தேகங்களை எழுப்பியுள்ளது.
எச்சரிக்கைகள் எப்போது செயல்படுத்தப்பட்டன என்பது குறித்து அரசு நிறுவனங்கள் முரண்பட்ட தகவல்களை வெளியிட்டுள்ளன. நவம்பர் 12 அன்றே எச்சரிக்கைகளை வெளியிட்டதாகக் வளிமண்டலவியல் திணைக்களம் கூறினாலும் கடும் மழைப்பொழிவைக் கணிக்கும் ‘சிவப்பு எச்சரிக்கைகள்’ நவம்பர் 25 அன்றுதான் வெளியாகின.
மேலும் வளிமண்டலவியல் திணைக்களம் மழைவீழ்ச்சியின் அளவை மிகவும் குறைத்து மதிப்பிட்டிருந்தது. 75-150 மி.மீ மழை பெய்யும் என்று அவர்கள் கணித்திருந்த நிலையில் மாத்தளை போன்ற கடுமையாகப் பாதிக்கப்பட்ட பகுதிகளில் கிட்டத்தட்ட 1000 மி.மீ மழை பதிவானதாக ‘தி நியூ ஹுமானிடேரியன்’இதழுக்குத் தகவல் வழங்கிய அதிகாரிகள் தெரிவித்தனர்.
இடைவெளியை நிரப்ப எடுத்த முயற்சிகள்
அரசு நிறுவனங்கள் தமிழில் முன்னறிவிப்புகளை வெளியிடத் தவறியபோது யாழ்ப்பாணப் பல்கலைக்கழகத்தின் புவியியல் துறைத் தலைவர் பேராசிரியர் நாகமுத்து பிரதீபராஜா அந்த இடைவெளியை நிரப்ப முயன்றார்.
வங்கக்கடலில் ஏற்படும் காற்றழுத்தத் தாழ்வு நிலைகள் நாட்டை நோக்கித் திரும்பினால் அதிக மழைப்பொழிவு ஏற்படும் என்று அக்டோபர் 17 அன்று அவர் தனது 35000 முகநூல் பின்தொடர்பாளர்களுக்கு எச்சரிக்கை விடுத்தார். நவம்பர் 17 அன்று அதாவது அதிகாரப்பூர்வ அறிவிப்புகளுக்கு ஒரு முழு வாரத்திற்கு முன்பே அவர் தனது ஆய்வை மீண்டும் வலியுறுத்தினார். வானிலை ஆய்வுத் திணைக்களம் அறிவிப்பதற்கு நீண்ட காலத்திற்கு முன்பே நவம்பர் 23 வாக்கில் கடுமையான சூறாவளி பாதிப்புகள் ஏற்படும் என்று அவர் கணித்தார்.
“நான் இது போன்ற ஒன்றை இதற்கு முன் பார்த்ததே இல்லை” என்று பிரதீபராஜா ‘தி நியூ ஹுமானிடேரியன்’ இதழிடம் தெரிவித்தார். முன்கூட்டியே அரசாங்கம் நடவடிக்கை எடுத்திருந்தால் குறிப்பாக 282 பேர் பலியான மத்திய மாகாணத்தில் உயிரிழப்புகளைத் தடுத்திருக்க முடியும் என்று அவர் நம்புகிறார். “நிலச்சரிவு ஏற்படக்கூடிய அபாயம் குறித்த முக்கியமான எச்சரிக்கைகளைத் தமிழில் வெளியிடுவதில் தாமதம் ஏற்பட்டது” என்பதில் அவர் உறுதியாக உள்ளார்.
பேரிடர் மீட்பு முகமைகளின் பெரும்பாலான டிஜிட்டல் தொடர்புகள் முதன்மையாகச் சிங்களம் மற்றும் ஆங்கிலத்திலேயே இருந்தன. தமிழ் மொழிபெயர்ப்புகள் இருந்த இடங்களிலும் அவற்றில் முக்கியமான தகவல்கள் விடுபட்டிருந்தன.
“எச்சரிக்கையாக இருக்குமாறு எங்களிடம் கூறப்பட்டது ஆனால் பாதிப்பு எவ்வளவு தீவிரமாக இருக்கும் என்று சொல்லப்படவில்லை” என்கிறார் மட்டக்களப்பைச் சேர்ந்த 60 வயது மீனவர் நாத்குணம் பத்மநாதன். அங்கு 37000-க்கும் அதிகமானோர் புயலால் நேரடியாகப் பாதிக்கப்பட்டுள்ளனர். அவரது வீடு மூன்று அடி நீரில் மூழ்கியது. “முதல் முறையாகக் கடல் நீர் உள்ளே புகுந்தது” என்று அவர் நினைவு கூர்ந்தார். “பாதுகாப்பு மையம் எங்கே இருக்கிறது என்று எங்களுக்குத் தெரியும் ஆனால் வெள்ளம் எங்களைத் தனிமைப்படுத்திவிட்டது.”
தேசிய அளவில் மொழிபெயர்ப்பாளர்கள் இல்லாதது தமிழ் மொழித் தொடர்பைப் பாதித்ததாகப்
அனர்த்த முகாமைத்துவ நிலையத்தின்பிரதிப் பணிப்பாளர் ஜனக ஹந்துன்பத்திராஜா ஒப்புக்கொண்டார் இருப்பினும் பிராந்திய அதிகாரிகள் அந்த இடைவெளியை நிரப்பியதாக அவர் கூறினார்.
ஆனால் கள நிலவரம் வேறாக இருந்தது. யாழ்ப்பாணத்தில் உள்ள ஒரு சிரேஷ்ட தனது அலுவலகத்திற்குச் சிங்களம் மற்றும் ஆங்கிலத்தில் எச்சரிக்கைகள் வந்ததாகவும் அவற்றை அவர் வாட்ஸ்அப் மூலம் பகிர்வதற்கு முன்பு தமிழில் மொழிபெயர்த்ததாகவும் கூறினார். ஆனால் கிளிநொச்சி மாவட்டத்தைச் சேர்ந்த விவசாயிகள் தமிழ் மொழிபெயர்ப்பு அசல் எச்சரிக்கை வந்து கிட்டத்தட்ட மூன்று மணி நேரத்திற்குப் பிறகே வந்ததாகவும் அவற்றில் பல உயிர் காக்கும் தகவல்கள் இல்லை என்றும் கூறினர்.
அனர்த்த முகாமைத்துவ நிலைய அதிகாரிகள் “இப்போது அனைவரிடமும் தொலைபேசி உள்ளது” என்ற அடிப்படையில் ஊடகங்கள் மற்றும் சமூக ஊடகங்களை நம்பியிருப்பதை நியாயப்படுத்துகின்றனர். ஆனால் அதிக உயிரிழப்புகள் பதிவான கண்டி பதுளை மற்றும் நுவரெலியா ஆகிய மாவட்டங்களில் உள்ள மலையகத் தமிழர்கள் பெரும்பாலும் உள்ளூர் அலைவரிசைகளுக்குப் பதிலாக இந்திய அலைவரிசைகளையே பின்பற்றுகிறார்கள் என்று பதுளை அனர்த்த முகாமைத்துவ நிலையபிரதிப் பணிப்பாளர் லால் உதய குமார தெரிவித்தார்.
முறையற்ற தகவல் தொடர்பு மற்றும் தடைகள்
குறுஞ்செய்திகள் கிராம சேவகர் வருகை பொலிஸ் அறிவிப்புகள் எனப் பல வழிமுறைகள்அனர்த்த முகாமைத்துவ நிலையத்திடம் இருந்தாலும்அவை சில சமூகங்களுக்குச் சரியான நேரத்தில் சென்றடையவில்லை என்று புயலால் பாதிக்கப்பட்டவர்கள் கூறுகின்றனர்.
தமிழ் மொழித் தொடர்பு பெரும்பாலும் கள அதிகாரிகளிடமே விடப்படுகிறது ஏனெனில் அவர்கள் உள்ளூர் மொழியைப் பேசும் மக்களாக இருக்கிறார்கள். “மேலிருந்து கீழ் நோக்கிய தகவல் தொடர்பு எப்போதும் வேலை செய்யாது ஏனெனில் சமூகத்தில் உள்ள சிலர் உள்ளூர் தொடர்புகளிலிருந்து முற்றிலும் விலகியிருக்கிறார்கள்” என்று குமார கூறினார்.
பெரும்பாலான அதிகாரிகள் சிங்களவர்களாக இருப்பதால் கலாசார மற்றும் மொழித் தடைகள் இருப்பதை அவர் ஒப்புக்கொண்டார். “தோட்டத் தொழிலாளர்களுக்கான விழிப்புணர்வு அமர்வுகள் எப்போதும் நிறுவனங்கள் மூலமாகவே ஏற்பாடு செய்யப்படுகின்றன எங்களுடன் நேரடித் தொடர்பு இருப்பதில்லை அதனால் அவை பயனுள்ளதாக இருப்பதில்லை” என்று பதுளை விவசாயிகள் கூட்டமைப்பின் தலைவர் நாகுலேஸ்வரி தெரிவித்தார்.
“மூன்று நாட்களாக மின்சாரம் இல்லாதபோது எங்களால் ஒரு தொலைபேசி அழைப்புக் கூட செய்ய முடியவில்லை” என்று கூறிய அவர் மொழிப் பாரபட்சம் என்பது பேரிடர் எச்சரிக்கைகளைத் தாண்டியது என்றும் குறிப்பிட்டார்: “ஒரு அரசு அலுவலகத்திற்குச் சென்று ஒரு அடிப்படை விண்ணப்பப் படிவத்தைக் கூட எங்களால் தமிழில் பெற முடியாது எனும் போது எங்களுக்குப் புரியும் மொழியில் ஒரு பேரிடரை அவர்கள் எப்படித் தெரிவிப்பார்கள்?”
ஒரு கட்டமைப்பு ரீதியான தோல்வி
கொழும்பைச் சேர்ந்த ஆய்வாளர் சஞ்சனா ஹத்தொட்டுவ இது குறித்துக் கூறுகையில் “தகவல் சமச்சீரின்மை என்பது வாழ்க்கைக்கும் மரணத்திற்கும் இடையிலான வித்தியாசமாக இருக்கலாம். மும்மொழிக் கொள்கையை ஒரு விருப்பமாக மட்டும் பார்ப்பது தமிழ் மொழியில் தொடர்புகொள்ள அரசுக்கு இருக்கும் விருப்பமின்மையையே காட்டுகிறது” என்றார்.
இலங்கை அரசியலமைப்பு மொழி உரிமைகளை உறுதி செய்தாலும் அரசு அலுவலகங்களில் இருமொழித் தெரிந்த பணியாளர்கள் இல்லை.
பாதிக்கப்பட்ட பல குடும்பங்கள் இன்னும் பாதுகாப்பு மையங்களில் உள்ளனர். ஜனாதிபதி அநுர குமார திஸாநாயக்க இழப்பீடு அறிவித்துள்ள போதிலும் அதைப் பெறுவதற்கான வழிமுறைகள் இன்னும் பலரைச் சென்றடையவில்லை.
தகவல் நேர்மை மற்றும் பொதுக் கொள்கை குறித்த கொழும்பைச் சேர்ந்த ஆராய்ச்சியாளர் சஞ்சனா ஹத்தொட்டுவ இப்பிரச்சினை ஒரு கட்டமைப்பு சார்ந்தது என்று கூறுகிறார். இலங்கையின் பேரிடர் மேலாண்மை முகமைகளின் டிஜிட்டல் தகவல் தொடர்புகள் குறித்து அவர் மேற்கொண்ட ஆய்வில் அதிகாரப்பூர்வ எச்சரிக்கைகளில் கடுமையான மொழி இடைவெளிகள் இருப்பது கண்டறியப்பட்டது.
தேசிய கட்டிட ஆராய்ச்சி நிறுவனம் வெளியிட்ட விரிவான நிலச்சரிவு எச்சரிக்கைகள் மலைநாட்டில் அதிகளவில் தமிழ் பேசும் மக்கள் இருந்தபோதிலும் சிங்களத்தில் மட்டுமே வெளியிடப்பட்டன. நதி வெள்ள அபாய எச்சரிக்கைகள் சிங்களம் மற்றும் ஆங்கிலத்தில் வெளியிடப்பட்டன. “மும்மொழி” (என்று பெயரிடப்பட்ட சில அவசர உதவி எண்களுக்கான அறிவிப்புகள் கூட சிங்களத்தில் மட்டுமே பதிவிடப்பட்டிருந்தன.
2004 சுனாமிக்குப் பிறகு இலங்கையின் பேரிடர் தகவல் தொடர்பு அமைப்புகள் ஆன்லைன் மயமாக்கப்பட்டன ஆனால் “அப்போதிருந்து தகவல் தொடர்புகள் அனைத்தும் சிங்கள மொழியை நோக்கியே சாய்ந்துள்ளன” என்று ஹத்தொட்டுவ கூறினார். இதை அவர் ஒரு ‘நிறுவனத் தோல்வி’ ) என்று அழைக்கிறார்.
இலங்கை அரசியலமைப்பு குடிமக்கள் தங்களுக்கு விருப்பமான ஒரு தேசிய மொழியில் அரசு சேவைகளைப் பெறுவதற்கான உரிமையை உறுதி செய்கிறது. இருப்பினும் பல அரசு அலுவலகங்களில் இருமொழித் திறன் கொண்ட பணியாளர்கள் இல்லை.
சிவில் சமூக ஆர்வலர் ஐங்கரன் குகதாசன் கூறுகையில் மலையகத் தமிழ் தோட்டச் சமூகங்கள் வசிக்கும் மத்தியப் பகுதிகளுக்குத் தமிழில் எச்சரிக்கைகள் சென்றடைந்திருக்க வேண்டும் என்று வலியுறுத்தினார். “மொழி இடைவெளிக்கு மேலதிகமாக உள்ளூர் செல்லுலார் நெட்வொர்க் கிடைக்காதது நிலைமையை மோசமாக்கியது. போதுமான மொழிபெயர்ப்பாளர்களைக் கொண்டு எச்சரிக்கைகளைத் தமிழில் வழங்க முடியாவிட்டால் இந்த அரசு நிறுவனத்திற்கு நிதியளிப்பதில் என்ன பயன்?” என்று அவர் கேள்வி எழுப்பினார்.
தற்போதைய நிலை
தற்போது வெள்ள நீர் வடிந்துவிட்டாலும் வடகிழக்கு பருவமழை அபாயத்தைத் தொடர்ந்து உயர்வாகவே வைத்துள்ளது. சில குடும்பங்கள் இன்னும் வீடு திரும்ப முடியாமல் பாதுகாப்பு மையங்களில் தங்கியுள்ளனர்.
நவம்பர் 27 அன்று மாலை 6 மணியளவில் கண்டியில் உள்ள தனது வீட்டில் தியாகராஜா மலர்மல்லிகை தனது மூன்று குழந்தைகளுடன் இருந்தபோது சுவர்கள் வெடிக்கத் தொடங்கி வெள்ள நீர் உள்ளே புகுந்தது. “சுவர்கள் இடிந்து விழுந்தன நாங்கள் பாதுகாப்பான இடம் என்று தெரியும் வரை அருகிலுள்ள ஒரு இந்து கோவிலுக்கு ஓடினோம்” என்று அவர் நினைவு கூர்ந்தார். அன்றிலிருந்து அந்த குடும்பம் தற்காலிகமாக ஒரு உறவினர் வீட்டிற்கும் சேதமடைந்த வீட்டிற்கும் மாறி மாறிச் சென்று வருகிறது.
புயல் முடிந்து பல வாரங்கள் கழித்து பருவமழை தீவிரமடைந்த பிறகுதான் ஒரு கிராம சேவகர் முதன்முறையாக வந்துமழை பெய்யும் போது “பாதுகாப்பான இடத்திற்கு” செல்லுமாறு கூறிச் சென்றுள்ளார். மலர்மல்லிகை இருமொழிகளும் தெரிந்தவர் என்பதால் அவர் பேசிய சிங்களத்தைப் புரிந்துகொண்டார் ஆனால் தெளிவான வழிகாட்டல் இல்லாததால் என்ன செய்வது என்று தெரியாமல் அவர் தவிக்கிறார்.
இலங்கை ஜனாதிபதி அநுர குமார திஸாநாயக்க புயலால் பாதிக்கப்பட்டவர்களுக்கு இழப்பீடு அறிவித்துள்ளார். ஆனால் தியாகராஜா இது குறித்துக் கூறுகையில் தகுதிகள் அல்லது அடுத்தகட்ட நடவடிக்கைகள் பற்றிய எந்தத் தகவலும் தங்களுக்குக் கிடைக்கவில்லை என்றார். “நாங்கள் இந்த வீட்டை ஒரு வருடத்திற்கு முன்புதான் கட்டினோம். இப்போது எங்களிடம் இருந்த அனைத்தும் போய்விட்டன. வாழ்க்கை மீண்டும் தொடங்கினாலும்s அது எங்களை விடுத்துதான் தொடங்கும்; எங்கள் குழந்தைகளைப் பள்ளிக்கு அனுப்ப எங்களிடம் சீருடைகள் கூட இல்லை” என அவர் மனவேதனையுடன் தெரிவித்தார்.
