(CNN)
1979-ஆம் ஆண்டு ஈரானியப் புரட்சி, அவரது தந்தையின் நாற்பது கால ஆட்சியை வீழ்த்தியபோது, இளவரசர் ரெசா பஹ்லவிக்கு (Reza Pahlavi) வயது 16 மட்டுமே. மன்னர் முஹம்மது ரெசா பஹ்லவியின் மூத்த மகனான அவர்தான், எண்ணெய் வளம் மிக்க ஆயிரம் ஆண்டு காலப் பேரரசின் வாரிசாக முடிசூட வேண்டியவர்.
இப்போது 65 வயதாகும் அவர், தனது பிறப்புரிமை பறிபோய் அரை நூற்றாண்டு காலம் கழிந்த நிலையில், அவரது நீண்ட காத்திருப்பு ஒருவழியாக முடிவுக்கு வரலாம் எனத் தெரிகிறது.
“இதுவே இறுதிப் போர். பஹ்லவி திரும்புவார்!” – அமெரிக்காவில் நாடுகடத்தப்பட்ட நிலையில் வாழும் முன்னாள் இளவரசர் தனது நாட்டு மக்களை வீதிக்கு வருமாறு அழைப்பு விடுத்ததையடுத்து, வியாழக்கிழமை இரவு ஈரான் முழுவதும் வெடித்த போராட்டங்களில் ஒலித்த மிக முக்கியமான முழக்கம் இதுவாகும்.
“ஜாவித் ஷா (மன்னர் வாழ்க)!” எனப் போராட்டக்காரர்கள் கூச்சலிட்டனர். “ரெசா ஷா, உங்கள் ஆத்மாவை கடவுள் ஆசீர்வதிப்பாராக!” என்றும் அவர்கள் முழங்கினர்.
பொருளாதாரப் புகார்களுக்காக தெஹ்ரானின் கிராண்ட் பஜாரில் தொடங்கிய இந்தப் போராட்டங்கள், சில நாட்களிலேயே ஆட்சிக்கு எதிரான போராட்டமாக உருவெடுத்தன. அமெரிக்காவிலிருந்து செயல்படும் பஹ்லவி, தன்னை ஒரு உண்மையான (de facto) தலைவராக நிலைநிறுத்த முயற்சி செய்து வருகிறார்.
வீழ்த்தப்பட்ட முடியாட்சிக்கு ஆதரவு தெரிவிப்பது ஈரானில் ஒரு குற்றச் செயலாகும். மன்னரின் சர்வாதிகாரத்தை வீழ்த்துவதற்காகப் மக்கள் புரட்சியை நடத்திய ஒரு சமூகத்தில், மீண்டும் அந்த ஆட்சிக்கு ஆதரவளிக்கும் எண்ணம் நீண்டகாலமாகத் தவிர்க்கப்பட்டு வந்தது.
மன்னர் குடும்பம் மற்றும் நாடுகடத்தப்பட்ட அதன் தலைவரின் மீது இப்போது மீண்டும் ஒரு ஆர்வம் ஏற்படுவதற்கான காரணம் என்ன என்பது தெளிவாகத் தெரியவில்லை என்று ஆய்வாளர்கள் கூறுகின்றனர். ஈரானியர்கள் உண்மையில் முடியாட்சியை மீட்டெடுக்க விரும்புகிறார்களா? அல்லது தற்போதைய ஒடுக்குமுறை மதகுருமார்களின் ஆட்சியில் சலிப்படைந்துவிட்டார்களா?
“ரெசா பஹ்லவி சந்தேகத்திற்கு இடமின்றி தனது செல்வாக்கை அதிகரித்துள்ளார். ஈரானிய எதிர்க்கட்சி அரசியலில் தன்னை ஒரு முன்னணியாளராக மாற்றியுள்ளார்” என்று ‘வாட் ஈரானியன்ஸ் வான்ட்’ (What Iranians Want) என்ற புத்தகத்தின் ஆசிரியரும் கல்வியாளருமான ஆராஷ் அசிசி கூறுகிறார்.
“ஆனால் அவரிடம் பல பிரச்சினைகளும் உள்ளன. அவர் அனைவரையும் ஒன்றிணைக்கும் ஒரு தலைவர் அல்ல, மாறாக கருத்து வேறுபாடுகளைத் தூண்டும் ஒருவராகவே இருக்கிறார்.”
கடந்த பத்தாண்டுகளில் ஐந்தாவது முறையாக வெடித்துள்ள இந்த ஆட்சிக்கு எதிரான போராட்டங்கள் வெற்றிபெற்றால், இடைக்கால ஆட்சியில் ஈரானை வழிநடத்தத் தயாராக இருப்பதாக பஹ்லவி கூறியுள்ளார். ஆனால், அவரது திட்டங்கள் குறித்த விரிவான தகவல்கள் குறைவாகவே உள்ளன. மேலும், அவரது அரசியல் அனுபவமின்மை விரைவில் அவருக்கு எதிராகத் திரும்பக்கூடும் என அவரது விமர்சகர்கள் கருதுகின்றனர்.
