மற்றுமொரு வெளிநாட்டு நிறுவனம் வெளியேறுகிறது-முதலீட்டாளர் நம்பிக்கைக்கு விழுந்த மற்றுமொரு பேரிடி

நாட்டின் முதலீட்டாளர் நம்பிக்கைக்கு விழுந்த மற்றுமொரு பேரிடியாக, சீனாவின் ‘அம்பர் அட்வென்ச்சர்ஸ் (பிரைவேட்) லிமிடெட்’ (Amber Adventures Private Limited) நிறுவனம் – நாட்டின் முதலாவது கேபிள் கார் (Cable Car) திட்டமான அம்புலுவாவ கேபிள் கார் திட்டத்திலிருந்து அதிகாரப்பூர்வமாக விலகியுள்ளது. ‘ஒழுங்குமுறை தடைகள் மற்றும் தன்னிச்சையான அரச நடவடிக்கைகள்’ ஆகியவற்றை இதற்குக் காரணமாக அந்த நிறுவனம் குறிப்பிட்டுள்ளது.

தொழில்நுட்ப நிறுவனங்களின் அனுமதி இருந்தபோதிலும், சமூக ஊடகங்களில் பரவிய புகார்களின் அடிப்படையில் மத்திய சுற்றாடல் அதிகாரசபை (CEA) கட்டுமானப் பணிகளை நிறுத்தியது போன்ற மாநில அதிகாரிகளின் தன்னிச்சையான மற்றும் சட்டவிரோத நடவடிக்கைகளால் இந்தத் திட்டத்திலிருந்து விலகத் தீர்மானித்ததாக அந்த நிறுவனம் நேற்று (13) முதலீட்டுச் சபைக்கு (BOI) எழுத்துப்பூர்வமாக அறிவித்துள்ளது.

இலங்கை, சீனா மற்றும் அமெரிக்க முதலீட்டாளர்களைக் கொண்ட ஒரு கூட்டமைப்பினால், 2022 பொருளாதார நெருக்கடியின் உச்சகட்டத்தின் போது திரட்டப்பட்ட 12.75 மில்லியன் அமெரிக்க டாலர் மொத்த முதலீட்டில், ஏற்கனவே 3.5 மில்லியன் அமெரிக்க டாலர்களை முதலீடு செய்துள்ளதாக நிறுவனம் தெரிவித்துள்ளது.

மத்திய சுற்றாடல் அதிகாரசபை, நகர அபிவிருத்தி அதிகாரசபை, அமைச்சரவை மற்றும் பாதுகாப்பு அமைச்சு உள்ளிட்ட அனைத்துத் தரப்பிலிருந்தும் தேவையான அனுமதிகளைப் பெற்றிருந்ததாகவும், இது ஒரு கட்டி-இயக்கி-மாற்றும் (Build-Operate-Transfer – BOT) திட்டமாக வடிவமைக்கப்பட்டிருந்ததாகவும் நிறுவனம் வலியுறுத்தியுள்ளது. இந்த ஒப்பந்தத்தின்படி, 13 ஆண்டுகளுக்குப் பிறகு 5 பில்லியன் ரூபாய்க்கும் அதிக மதிப்புள்ள முழுமையாக இயங்கக்கூடிய கேபிள் கார் அமைப்பு இலங்கை அரசாங்கத்திற்கு இலவசமாகக் கையளிக்கப்பட்டிருக்க வேண்டும்.

இருப்பினும், அரச அதிகாரிகளின் தொடர்ச்சியான தலையீடு, ஒழுங்குமுறைத் தடைகள் மற்றும் துன்புறுத்தல்கள் காரணமாக இந்தத் திட்டம் வணிக ரீதியாகச் செயல்பட முடியாத ஒன்றாக மாறியுள்ளதாக அம்பர் அட்வென்ச்சர்ஸ் நிறுவனம் தெரிவித்துள்ளது. மேலும், நிலச்சரிவு அபாயங்கள் குறித்த குற்றச்சாட்டுகளை நிராகரித்துள்ள நிறுவனம், ‘டிட்வா’ (Ditwah) சூறாவளிக்கு பின்னர் தேசிய கட்டிட ஆராய்ச்சி நிறுவனம் (NBRO) தளத்தைப் பரிசோதித்து அதன் ஸ்திரத்தன்மையை உறுதிப்படுத்தியதாகக் குறிப்பிட்டுள்ளது.

தங்களுக்கு ஏற்பட்ட இழப்புகளை மீட்டெடுக்க சர்வதேச சட்ட நடவடிக்கைகளை மேற்கொள்வது குறித்து ஆலோசித்து வருவதாகவும் அந்த கடிதத்தில் தெரிவிக்கப்பட்டுள்ளது. முதலீட்டுப் பாதுகாப்பு மற்றும் ஒழுங்குமுறை உறுதியை உறுதிப்படுத்த இலங்கை தவறியது வெளிநாட்டு முதலீட்டாளர்களுக்கு ஒரு மோசமான செய்தியை அனுப்புகிறது என்றும் அதில் கூறப்பட்டுள்ளது.

“முதலீட்டுச் சபையினால் (BOI) எவ்வித பயனுள்ள மேற்பார்வையோ அல்லது பாதுகாப்போ வழங்கப்படாமை ஒரு பாரதூர்யமான ஒழுங்குமுறைத் தோல்வியாகும்,” என்று கூறியுள்ள நிறுவனம், “விரோதமான மற்றும் கணிக்க முடியாத சூழலில்” தங்களால் இனி இயங்க முடியாது என்றும் சேர்த்துக் கொண்டுள்ளது.

பொருளாதார ஸ்திரமின்மை, ஒழுங்குமுறை நிச்சயமற்ற தன்மை மற்றும் கொள்கை முரண்பாடுகள் உள்ளிட்ட பல்வேறு காரணங்களால் 2022 ஆம் ஆண்டிலிருந்து இலங்கையில் தங்கள் செயல்பாடுகளை நிறுத்திய அல்லது வெளியேறிய நிறுவனங்களின் பட்டியலில் இப்போது அம்பர் அட்வென்ச்சர்ஸ் நிறுவனமும் இணைந்துள்ளது.

அவற்றில் சில முக்கிய நிறுவனங்கள்:

• இலங்கையில் 60 ஆண்டுகாலச் செயல்பாட்டை முடிவுக்குக் கொண்டு வந்த ஜப்பானின் மிட்சுபிஷி கார்ப்பரேஷன் (Mitsubishi Corporation).

• 2022 இல் தனது செயல்பாடுகளை காலவரையின்றி நிறுத்திய பிரான்சின் விளையாட்டு உபகரண விற்பனை நிறுவனமான டெகாத்லான் (Decathlon).

• 2023 இல் வெளியேறிய இந்தியாவின் உணவு விநியோக தளமான ஸொமாட்டோ (Zomato).

• சர்ச்சைக்குரிய காற்றாலை மின் திட்டத்திலிருந்து பின்வாங்கிய அதானி குழுமம் (Adani Group).