இலங்கையின் தனியார் துறைக்கான தனது நீண்டகால அர்ப்பணிப்பை மீண்டும் உறுதிப்படுத்தும் வகையில், உலக வங்கி குழுமத்தின் ஒரு அங்கமான சர்வதேச நிதி கூட்டுத்தாபனம் (IFC), இலங்கை வணிகங்களை ஆதரிப்பதற்கும், நாட்டின் பொருளாதாரத்தை நிலையான வளர்ச்சியை நோக்கி நகர்த்துவதற்கும் 166 மில்லியன் டொலர் மதிப்பிலான உயர்மட்ட முதலீட்டுத் திட்டத்தை இன்று அறிவித்துள்ளது.
இந்த விரிவான நிதியுதவித் திட்டம், சிறு மற்றும் நடுத்தர அளவிலான நிறுவனங்களுக்கான (SMEs) நிதி அணுகலை விரிவுபடுத்துவதை நோக்கமாகக் கொண்டுள்ளது. குறிப்பாகப் பெண்கள் நடத்தும் வணிகங்கள் மற்றும் விவசாயம் சார்ந்த வணிகங்களுக்கு முன்னுரிமை அளிக்கப்படுகிறது. இலங்கைப் பொருளாதாரத்தின் இந்த முக்கிய துறைகளை இலக்கு வைப்பதன் மூலம், உள்ளடக்கிய வளர்ச்சியை ஊக்குவிப்பதோடு, பின்தங்கிய குழுக்களுக்கான வேலை வாய்ப்புகளை உருவாக்கவும் இது முயல்கிறது.
இந்த முதலீடு இலங்கையின் முன்னணி வணிக வங்கிகளான நேஷன்ஸ் ட்ரஸ்ட் வங்கி (NTB), கொமர்ஷல் வங்கி (CBC) மற்றும் நேஷனல் டெவலப்மெண்ட் வங்கி (NDB) ஆகியவற்றில் மூலோபாய ரீதியாக மேற்கொள்ளப்பட்டுள்ளது. இதில் 50 மில்லியன் டொலர் கடனாகவும், 80 மில்லியன் டொலர் அபாயப் பகிர்வு வசதிகளாகவும் (RSFs), 36 மில்லியன் டொலர் வர்த்தக நிதி ஆதரவாகவும் வழங்கப்படுகிறது.
இலங்கையில் 75 சதவீதத்திற்கும் அதிகமான வணிகங்கள் மற்றும் 45 சதவீத வேலைவாய்ப்புகள் சிறு மற்றும் நடுத்தர நிறுவனங்கள் (SMEs) மூலமே கிடைக்கின்றன. இருப்பினும், கடன் பெறுவதில் உள்ள சிக்கல்கள் அவற்றின் வளர்ச்சிக்கு பெரும் தடையாக உள்ளன. இந்த சவால்களை முறியடிக்கவும், நாட்டின் நீண்டகால பொருளாதார மீள்திறனை ஆதரிக்கவும் இந்த பங்களிப்பு இலக்கு வைக்கப்பட்ட தீர்வுகளை வழங்கும்.
IFC ஆசியா மற்றும் பசிபிக் பிராந்திய பணிப்பாளர் ஆலன் ஃபோர்லெமு கூறுகையில்: “சிறு மற்றும் நடுத்தர நிறுவனங்கள் இலங்கைப் பொருளாதாரத்தின் முதுகெலும்பாகும். நெருக்கடியான காலங்களில் தனியார் மூலதனம் பின்வாங்கும்போது, IFC முன்னின்று செயல்படுகிறது. பெண்கள் தலைமையிலான வணிகங்கள் மற்றும் சிறு விவசாயிகளுக்கு வங்கிகள் நிதி வழங்குவதை உறுதி செய்வதன் மூலம், இலங்கை மீண்டும் எழுவது மட்டுமல்லாமல், வலுவாக வளரவும் நாங்கள் உதவுகிறோம்.”
முதலீட்டின் முக்கிய அம்சங்கள்:
-
நேஷன்ஸ் ட்ரஸ்ட் வங்கி (NTB): இதற்காக வழங்கப்பட்ட 50 மில்லியன் டொலர் கடனில், 15 சதவீதம் (7.5 மில்லியன் டொலர்) பெண்கள் நடத்தும் சிறு வணிகங்களுக்கு கடன் வழங்க ஒதுக்கப்பட வேண்டும். இது 2022 பொருளாதார நெருக்கடிக்குப் பிறகு இலங்கையின் நிதித்துறையில் IFC மேற்கொண்ட முதல் கடன் முதலீடாகும்.
-
கொமர்ஷல் வங்கி (CBC) மற்றும் NDB: இந்த வங்கிகளுடன் இணைந்து 80 மில்லியன் டொலர் மதிப்பிலான ‘அபாயப் பகிர்வு வசதி’ (RSF) உருவாக்கப்பட்டுள்ளது. இதன் மூலம், சிறு வணிகங்களுக்கு வழங்கப்படும் கடன்களில் ஏற்படும் இழப்புகளில் 50 சதவீதத்தை IFC ஏற்கும். இது வங்கிகள் துணிச்சலாக கடன் வழங்க உதவும்.
-
வர்த்தக நிதி ஆதரவு: NTB மற்றும் NDB வங்கிகளுக்கு தலா 20 மில்லியன் மற்றும் 16 மில்லியன் டொலர் வர்த்தக நிதி உத்தரவாதம் வழங்கப்படுகிறது. இது இலங்கை வணிகங்கள் உலகளாவிய சந்தைகளுடன் இணைய உதவும்.
மேலும், NDB வங்கியின் டிஜிட்டல் கொடுக்கல் வாங்கல் அமைப்புகளை நவீனப்படுத்துவதற்கும், காலநிலை மாற்ற அபாய மேலாண்மை கட்டமைப்பை மேம்படுத்துவதற்கும் IFC தொழில்நுட்ப ஆலோசனைகளை வழங்கவுள்ளது.
இலங்கை மற்றும் மாலைதீவுக்கான உலக வங்கியின் நாட்டு முகாமையாளர் கெவர்க் சர்க்ஸியன் கூறுகையில்: “சமீபத்திய ‘டிட்வா’ (Ditwah) சூறாவளியால் ஏற்பட்ட பாதிப்புகள் உட்பட பல அதிர்ச்சிகளில் இருந்து இலங்கை மீண்டு வரும் வேளையில், இந்த முதலீடு சந்தைக்கு ஒரு வலுவான நம்பிக்கையைத் தருகிறது. ஒவ்வொரு சமூகமும் நாட்டின் முன்னேற்றத்தில் பங்குபெறுவதை உறுதி செய்ய நாங்கள் உறுதிபூண்டுள்ளோம்.”
IFC இலங்கையில் 55 ஆண்டுகால வரலாற்றைக் கொண்டுள்ளது. கொமர்ஷல் வங்கியின் பங்குதாரராக இருப்பதோடு, NDB மற்றும் NTB வங்கிகளுடன் பல தசாப்த கால உறவையும் இது கொண்டுள்ளது. அண்மையில், சிறு வணிகங்கள் எளிதாக கடன் பெறுவதற்கு வசதியாக ‘பிணையப் பதிவு முறையை’ (STR) மேம்படுத்தவும் IFC உதவியிருந்தது
