ஊடகவியலாளர் பிரகீத் எக்னலிகொட காணாமல்போகச்செய்யப்பட்டமை தொடர்பில் குற்றம்சாட்டப்பட்ட இராணுவ அதிகாரிக்கு பதவி உயர்வு வழங்கும் தவறான நடவடிக்கையை இலங்கை ஜனாதிபதி அனுரகுமாரதிசநாயக்க உடனடியாக திருத்திக்கொள்ளவேண்டும் என சர்வதேச மன்னிப்புச்சபை வேண்டுகோள் விடுத்துள்ளது.
ஊடகவியலாளரும் கேலிச்சித்திரக் கலைஞருமான பிரகீத் எக்னலிகொட (Prageeth Eknaligoda) பலவந்தமாகக் காணாமலாக்கப்பட்டு இன்றுடன் 16 ஆண்டுகள் நிறைவடைகின்றன.
இந்தத் துயரமான ஆண்டுநினைவின் போது, கொழும்பு நிரந்தர மேல் நீதிமன்றத்தில் நடைபெற்று வரும் குற்றவியல் வழக்கின் ஒன்பதாவது பிரதிவாதியான இராணுவ புலனாய்வு அதிகாரி தெல்கே எரந்த ரதீஷ் பீரிஸ் (Thelge Erantha Radeesh Peiris), ஜனாதிபதி அநுர குமார திஸாநாயக்கவினால் பிரிகேடியர் பதவிக்கு தரம் உயர்த்தப்பட்டுள்ளமை குறித்து சர்வதேச மன்னிப்புச்சபை கவலை வெளியிட்டுள்ளது.
2019 ஆம் ஆண்டில், சட்டமா அதிபர் பீரிஸுக்கு எதிராக கொலைக் குற்றம் உட்பட 17 குற்றச்சாட்டுகளைப் பதிவு செய்திருந்தார்.
குற்றப் புலனாய்வுத் திணைக்களத்தின் (CID) விசாரணைகளின்படி, 2009 ஆகஸ்ட் மாதம் எக்னலிகொட முதன்முறையாக பலவந்தமாகக் காணாமலாக்கப்பட்ட சம்பவத்திலும் அதிகாரி பீரிஸிற்குத் தொடர்பு இருப்பதாகக் கருதப்படுகிறது.
கடுமையான குற்றச்சாட்டுகள் நீதிமன்றத்தில் விசாரிக்கப்பட்டு வரும் நிலையில், அதிகாரி பீரிஸிற்கு பதவி உயர்வு வழங்குவது நீதித்துறை அமைப்பைப் கேலிக்குள்ளாக்குவதுடன், இலங்கையின் சர்வதேச மனித உரிமைக் கடப்பாடுகளுக்கு முரணானது என்றும் சர்வதேச மன்னிப்புச்சபை தெரிவித்துள்ளது.
மேலும், பல சவால்களுக்கு மத்தியிலும் உள்நாட்டு நீதிமன்றங்களில் நீதிக்காகத் தொடர்ந்து போராடி வரும் எக்னலிகொடவின் மனைவி சந்தியா எக்னலிகொடவின் உறுதியான செயல்பாடுகளை இந்தப் பதவி உயர்வு ஊக்கமிழக்கச் செய்கிறது.
இந்தத் தவறான முடிவைத் திருத்துமாறு ஜனாதிபதி அநுர குமார திஸாநாயக்கவை அம்னெஸ்டி இன்டர்நேஷனல் வலியுறுத்தியுள்ளது.
