தொழில் மற்றும் தொழில்முனைவோர் அபிவிருத்தி பிரதி அமைச்சர் சதுரங்க அபேசிங்க தலைமையிலான இலங்கை தூதுக்குழுவினர், 2026 ஜனவரி 25 அன்று ரியாத்தில் உள்ள சவூதி பொது முதலீட்டு நிதியத்தின் (PIF) தலைமையகத்தில் அதன் சிரேஷ்ட அதிகாரிகளுடன் பயனுள்ள கலந்துரையாடலில் ஈடுபட்டனர்.
இச்சந்திப்பின் போது, இலங்கையின் போட்டித்தன்மை வாய்ந்த நன்மைகள் மற்றும் முதலீட்டு வாய்ப்புகள் குறித்து பிரதி அமைச்சர் அபேசிங்க விரிவான விளக்கமளித்தார். இலங்கையின் மூலதனச் சந்தையின் (Capital Market) ஆற்றலை வெளிப்படுத்தவும் இந்த உரையாடல் ஒரு தளமாக அமைந்தது. முதலீட்டாளர்களின் நம்பிக்கையை வலுப்படுத்தவும், நிலையான சந்தை வளர்ச்சியை மேம்படுத்தவும் வடிவமைக்கப்பட்ட இலங்கையின் புதிய கொள்கைகள் மற்றும் ஒழுங்குமுறை சீர்திருத்தங்கள் குறித்து, இலங்கை பிணையங்கள் மற்றும் பரிவர்த்தனை ஆணைக்குழுவின் தலைவர் டி.பி.பி.எச். திஸாபண்டார மற்றும் கொழும்பு பங்குச் சந்தையின் தலைமை நிர்வாக அதிகாரி ராஜீவ பண்டாரநாயக்க ஆகியோர் விளக்கமளித்தனர்.
PIF இன் சிரேஷ்ட பணிப்பாளர் முல்ஹாம் அல்பக்ரி, 2026-2030 காலப்பகுதிக்கான நிதியத்தின் மூலோபாயத் திட்டத்தை (Strategic Plan) விளக்கினார். மேலும், இலங்கை மற்றும் சவூதி அரேபியா இடையே இருதரப்பு முதலீட்டு பாதுகாப்பு ஒப்பந்தத்தை (Bilateral Investment Protection Agreement) ஏற்படுத்துவதன் முக்கியத்துவத்தை அவர் வலியுறுத்தினார்.
சவூதி அரேபியாவிற்கான இலங்கை தூதுவர் அமீர் அஜ்வத், இரு நாடுகளுக்கும் இடையிலான இரட்டை வரி விதிப்பைத் தவிர்ப்பதற்கான ஒப்பந்தம் (Avoidance of Double Taxation) உள்ளிட்ட தற்போதுள்ள இருதரப்பு உடன்படிக்கைகள் குறித்த தகவல்களைப் பகிர்ந்து கொண்டார்.
சவூதி அரேபியாவின் பொது முதலீட்டு நிதியம் (PIF) என்பது உலகின் மிகப்பெரிய மற்றும் செல்வாக்கு மிக்க இறையாண்மை செல்வ நிதியங்களில் (Sovereign Wealth Funds) ஒன்றாகும். இது எரிசக்தி, உள்கட்டமைப்பு, சுற்றுலா, தொழில்நுட்பம் மற்றும் நிதிச் சேவைகள் உள்ளிட்ட பல்வேறு மூலோபாயத் துறைகளில் உலகளாவிய முதலீடுகளை நிர்வகித்து வருகின்றது.
