வங்கித்துறையின் பங்களிப்பால் இலங்கை பங்குச் சந்தை உயர்வு

வங்கிகள் மற்றும் மூலதனப் பொருட்கள் துறைகளின் (Capital goods sector) கணிசமான வருவாய் பங்களிப்புடன், செவ்வாய்க்கிழமை கொழும்பு பங்குச் சந்தை சாதகமான நிலையில் நிறைவடைந்தது.

அனைத்துப் பங்கு விலைச் சுட்டெண் (ASPI) 0.22% அல்லது 52.82 புள்ளிகளால் அதிகரித்து, 23,734.50 ஆக நிறைவடைந்தது. அதேவேளை, S&P SL20 சுட்டெண் பெரிய மாற்றங்கள் இன்றி 0.14 புள்ளிகள் மட்டும் உயர்ந்து 6,597.34 ஆக முடிவடைந்தது.

அனைத்துப் பங்கு விலைச் சுட்டெண்ணின் உயர்வுக்கு கொழும்பு டொக்யார்ட் (Colombo Dockyard – ரூ. 152.00), டீஜே லங்கா (Teejay Lanka – ரூ. 36.80) மற்றும் சிலோன் டொபாக்கோ கம்பனி (Ceylon Tobacco Company – ரூ. 1,759.25) ஆகிய நிறுவனங்கள் முக்கிய பங்களிப்பை வழங்கின.

சந்தையின் மொத்த வருவாய் (Turnover) 8.2 பில்லியன் ரூபாயை எட்டியது. இதில் வங்கித்துறை 3.5 பில்லியன் ரூபாயையும், மூலதனப் பொருட்கள் துறை 1.4 பில்லியன் ரூபாயையும் பங்களித்தன.

செந்தில்குமரன் ஹோல்டிங்ஸ் (Senthilverl Holdings) நிறுவனம், கொழும்பு டொக்யார்ட் நிறுவனத்தில் தனக்கிருந்த 8.63% பங்குகளை 12.2% ஆக அதிகரித்துள்ளது. இதன் காரணமாக கொழும்பு டொக்யார்ட் பங்கின் விலை 6.25 ரூபாயால் அதிகரித்து 152.00 ரூபாயாக பதிவானது.

லங்கா கிரெடிட் அண்ட் பிசினஸ் ஃபைனான்ஸ் (Lanka Credit and Business Finance) நிறுவனம் தனது 2025 டிசம்பர் காலாண்டு அறிக்கையை வெளியிட்டுள்ளது. அதில் கடந்த ஆண்டை விட 28% வளர்ச்சியுடன் 93 மில்லியன் ரூபாய் லாபத்தைப் பதிவு செய்துள்ளது. அந்நிறுவனத்தின் பங்கொன்றின் விலை 10 சதத்தால் அதிகரித்து 8.80 ரூபாயாக நிறைவடைந்தது.