பங்களாதேஷில் தேர்தல் வாக்குகள் எண்ணப்பட்டுக்கொண்டிருக்கும் நிலையில் பங்களாதேஷ் தேசிய கட்சி வெற்றியை நோக்கி நடைபோடுகின்றது
இதுவரை வெளியான முடிவுகளின்படி பங்களாதேஷ் தேசிய கட்சி 80 ஆசனங்களை கைப்பற்றியுள்ளது
ஷேக் ஹசீனாவின் 15 வருட காலஆட்சி பங்களாதேஷினை உலுக்கிய ஆர்ப்பாட்டங்கள் மூலம் முடிவிற்கு கொண்டுவரப்பட்ட பின்னர் இடம்பெற்ற முதல் தேர்தல் இதுவென்பது குறிப்பிடத்தக்கது
ஷேக் ஹசீனாவின் கட்சி தேர்தலில் போட்டியிடமுடியாதவாறு தடை செய்யப்பட்டுள்ளதும் குறிப்பிடத்துக்கது
ஊடகங்களின் கணிப்பின்படி தேர்தலில் பெரும் வெற்றி உறுதியாகியுள்ள நிலையில், நாடு தழுவிய ரீதியில் பிரார்த்தனைத் திட்டங்களை முன்னெடுக்கவுள்ளதாக பி.என்.பி (BNP) கட்சி அறிவித்துள்ளது.
கட்சியினால் வெளியிடப்பட்டுள்ள செய்திக்குறிப்பின்படி, நாடு முழுவதும் உள்ள பள்ளிவாசல்களில் வெள்ளிக்கிழமை தொழுகைக்குப் பின்னர் இந்தப் பிரார்த்தனைகள் நடைபெறும் எனத் தெரிவிக்கப்பட்டுள்ளது.
“மறைந்த முன்னாள் பிரதமர் காலேதா ஜியாவுக்காகவும், நாட்டு மக்களின் நலனுக்காகவும் இந்தப் பிரார்த்தனைகள் முன்னெடுக்கப்படும்,” என அந்த அறிக்கையில் கூறப்பட்டுள்ளது.
வங்காளதேசத்தின் முதல் பெண் பிரதமரான காலேதா ஜியா, பி.என்.பி கட்சியின் நீண்டகாலத் தலைவராக இருந்தவர். அவர் கடந்த டிசம்பர் 30 ஆம் திகதி தனது 80 ஆவது வயதில் காலமானார்.
மேலும், தங்களின் வெற்றியைப் பறைசாற்றும் வகையில் எவ்வித கொண்டாட்ட ஊர்வலங்களோ அல்லது கூட்டங்களோ நடத்தப்பட மாட்டாது என்றும் பி.என்.பி கட்சியின் அறிக்கையில் குறிப்பிடப்பட்டுள்ளது
தாங்கள் ஆட்சிக்கு வந்தால், ஜனநாயகம் மற்றும் பேச்சு சுதந்திரத்தை “முழுமையாக உறுதிப்படுத்துவோம்” என்று பி.என்.பி (BNP) கட்சியின் ஊடகப் பேச்சாளர் வியாழக்கிழமை இரவு பிபிசி (BBC) செய்தி நிறுவனத்திடம் தெரிவித்தார்.
“வங்காளதேச மக்களின் அபிலாஷைகளை நிறைவேற்றுவோம் என்று எதிர்பார்க்கிறோம்,” என அக்கட்சியின் முக்கிய பேச்சாளரான மஹ்தி அமீன் மேலும் கூறினார்.
அவாமி லீக் கட்சி பங்கேற்கத் தடை விதிக்கப்பட்ட நிலையில், இந்தத் தேர்தலின் நம்பகத்தன்மை குறித்துக் கேட்கப்பட்ட கேள்விக்கு பதிலளித்த அமீன்: “நாங்கள் தேர்ந்தெடுக்கப்பட்டதும், மீண்டும் மக்களிடமே செல்வோம், மக்கள் என்ன விரும்புகிறார்களோ அதையே பின்பற்றுவோம். ஆனால் தற்போதைய நிலையில், தனது அரசியல் குணத்தை இழந்து, பாரிய மனித உரிமை மீறல்களுக்குக் காரணமாக மாறியுள்ள எந்தவொரு அரசியல் கட்சியையும் ஆதரிக்கப்போவதில்லை என மக்கள் தெளிவாகத் தீர்மானித்துள்ளனர்,” என்றார்.
அவாமி லீக் கட்சி இந்தக் குற்றச்சாட்டுகளை நிராகரித்துள்ளதுடன், இந்தத் தேர்தலின் சட்டபூர்வமான தன்மையையும் கண்டித்துள்ளது.
சிறுபான்மையினரின் பாதுகாப்பு மற்றும் சுதந்திரம் பாதுகாக்கப்படும் என்றும் மஹ்தி அமீன் தெரிவித்தார்.
முன்னதாக பி.என்.பி கட்சியின் ஆட்சிக்காலம் வன்முறை, ஊழல் குற்றச்சாட்டுகள் மற்றும் மனித உரிமை மீறல்களால் பாதிக்கப்பட்டிருந்தது.
எனவே, அவர்களின் ஆட்சி இம்முறை வித்தியாசமாக இருக்குமா என்பதை மக்கள் உன்னிப்பாகக் கவனிப்பார்கள். அதேவேளை, நாட்டின் பொருளாதாரத்தை மீட்டெடுப்பது, பணவீக்கத்தைக் குறைப்பது மற்றும் வேலைவாய்ப்புகளை உருவாக்குவது ஆகியவை அத்தனை எளிதான காரியமாக இருக்காது.
