அகமதாபாத்தில் நிகழ்ந்த ஏர் இந்தியா விமான விபத்து குறித்து விசாரணை நடத்தும் அதிகாரிகள், இந்த அனர்த்தம் இயந்திரக் கோளாறினால் ஏற்படவில்லை என்றும், அது எரிபொருளை கைமுறையாக நிறுத்தியதால் (Intentional manual fuel cut-off) ஏற்பட்டிருக்கலாம் என்றும் முடிவுக்கு வந்துள்ளதாக இத்தாலிய நாளிதழ் ஒன்று தெரிவித்துள்ளது.
விசாரணை அதிகாரிகளை மேற்கோள் காட்டி ‘கொரியர் டெல்லா செரா’ (Corriere della Sera) என்ற நாளிதழ் வெளியிட்டுள்ள செய்தியின்படி, கடந்த ஆண்டு ஜூன் மாதம் அகமதாபாத்தில் விபத்துக்குள்ளான ஏர் இந்தியா 171 விமானத்தின் வீழ்ச்சிக்கு தொழில்நுட்பக் குறைபாடு காரணமல்ல, மாறாக அது ஒரு “திட்டமிட்ட செயல்” (Intentional act) எனத் தெரியவந்துள்ளது. இந்த விபத்தில் மொத்தம் 260 பேர் உயிரிழந்தனர், இது நாட்டின் மிக மோசமான விமான விபத்துகளில் ஒன்றாகும். இருப்பினும், இந்திய சிவில் விமானப் போக்குவரத்து இயக்குநரகம் (DGCA) இன்னும் தனது இறுதி அறிக்கையை வெளியிடவில்லை.
ஆதாரங்கள் மற்றும் விசாரணைக் கண்டுபிடிப்புகள்: ஜூன் 2025 இல் அகமதாபாத் விமான நிலையத்திலிருந்து புறப்பட்ட சில நொடிகளில் போயிங் 787 டிரீம்லைனர் (Boeing 787 Dreamliner) விமானம் மருத்துவக் கல்லூரி விடுதி ஒன்றின் மீது விழுந்து விபத்துக்குள்ளானது. இதில் ஒரு பயணி மட்டுமே உயிர் பிழைத்தார்.
விமான விபத்து விசாரணைப் பிரிவு (AAIB) ஜூலை 2025 இல் வெளியிட்ட ஆரம்பக்கட்ட அறிக்கையின்படி, விமானம் புறப்பட்ட சில தருணங்களில், அதன் எரிபொருள் கட்டுப்பாட்டு சுவிட்சுகள் “இயங்கும்” (Run) நிலையிலிருந்து “நிறுத்தப்படும்” (Cut-off) நிலைக்கு மாற்றப்பட்டுள்ளன. காக்பிட் குரல் பதிவில் (Cockpit Voice Recording), ஒரு விமானி மற்றவரிடம் “ஏன் எரிபொருளை நிறுத்தினாய்?” என்று கேட்க, மற்றவர் “நான் அவ்வாறு செய்யவில்லை” என்று பதிலளித்தது பதிவாகியுள்ளது.
விமானியின் மனநிலை குறித்த சந்தேகம்: இந்த விபத்துக்கு முக்கிய சந்தேக நபராக விமானத்தின் கமாண்டர் சுமீத் சபர்வால் (Captain Sumeet Sabharwal) கருதப்படுகிறார். அவர் மன அழுத்தத்தால் (Depression) பாதிக்கப்பட்டிருந்ததாக விசாரணை வட்டாரங்கள் தெரிவிக்கின்றன. விவாகரத்து உள்ளிட்ட தனிப்பட்ட பிரச்சினைகளால் அவர் கவலையில் இருந்ததாகக் கூறப்பட்டாலும், அவரது தந்தை இக்குற்றச்சாட்டுகளை முற்றாக மறுத்துள்ளார்.
எதிர்காலப் பரிந்துரைகள்: இந்த விபத்தின் இறுதி அறிக்கையில், விமானிகளின் மனநலத்தை (Mental Health) தொடர்ச்சியாகக் கண்காணித்தல் மற்றும் உளவியல் ரீதியான மதிப்பீடுகளைக் கட்டாயமாக்குதல் போன்ற பரிந்துரைகள் இடம்பெறலாம் என எதிர்பார்க்கப்படுகிறது
