பாகிஸ்தானுக்கான இலங்கை உயர்ஸ்தானிகர் ரியர் அட்மிரல் ஃப்ரெட் செனவிரத்ன, பாகிஸ்தான் வர்த்தக சபையின் (PBC) தலைவர் டாக்டர் ஜீலாஃப் முனீர் அவர்களுடனான சந்திப்பை கடந்த பிப்ரவரி 6, 2026 அன்று கராச்சியில் மேற்கொண்டார். ‘English Biscuit Manufacturers’ (EBM) நிறுவனத்தின் முகாமைத்துவப் பணிப்பாளராகவும் தலைமைச் செயலதிகாரியாகவும் விளங்கும் டாக்டர் முனீர், பாகிஸ்தானின் முதன்மையான வர்த்தகக் கொள்கை மேம்பாட்டு அமைப்பிற்குத் தலைமை தாங்குகிறார்.
இந்தக் கலந்துரையாடலின் போது, இலங்கையின் தற்போதைய பொருளாதார மற்றும் அரசியல் சூழல் குறித்து உயர்ஸ்தானிகர் விளக்கமளித்தார். நாட்டின் மேம்பட்டு வரும் பொருளாதார நிலை, அரசியல் ஸ்திரத்தன்மை மற்றும் வெளிநாட்டு முதலீடுகளுக்கு உகந்த சூழல் நிலவுவது குறித்து அவர் வலியுறுத்தினார். புதிய அரசாங்கத்தின் கொள்கை முன்னுரிமைகள், பொருளாதாரச் சீர்திருத்தங்கள் மற்றும் இலங்கை – பாகிஸ்தான் இடையிலான இருதரப்பு வர்த்தக உறவுகளை மேம்படுத்துவதற்கான வாய்ப்புகள் குறித்தும் அவர் எடுத்துரைத்தார்.
இலங்கையிலுள்ள முதலீட்டு வாய்ப்புகளை ஆராய்வதற்காக, பாகிஸ்தானின் முன்னணி வர்த்தகத் தலைவர்கள் மற்றும் முதலீட்டாளர்கள் அடங்கிய தூதுக்குழுவொன்றை இலங்கைக்கு அழைத்து வருமாறு பாகிஸ்தான் வர்த்தக சபையின் தலைவருக்கு உயர்ஸ்தானிகர் அழைப்பு விடுத்தார்.
இந்தச் சந்திப்பிற்கு ஹைதராபாத்தில் உள்ள இலங்கையின் கௌரவ தூதுவர் மஹ்மூத் மாண்ட்விவாலா ஏற்பாடு செய்திருந்ததுடன், இஸ்லாமாபாத் மற்றும் கராச்சியில் உள்ள இலங்கையின் ஏனைய இராஜதந்திர அதிகாரிகளும் இதில் கலந்துகொண்டனர்.
