காலி: இலங்கையின் தெற்கு கடற்பரப்பில் அமெரிக்க டொர்பிடோ (Torpedo) தாக்குதலுக்கு உள்ளாகி மூழ்கடிக்கப்பட்ட ‘IRIS Dena’ கப்பலில் உயிரிழந்த 84 ஈரான் மாலுமிகளின் உடல்கள் இன்று ஈரானுக்குத் திருப்பி அனுப்பப்பட உள்ளன.
அதிகாரிகளின் தகவல்படி, காலி தேசிய வைத்தியசாலையின் பிரத்யேக குளிரூட்டிகளில் வைக்கப்பட்டிருந்த 45 மாலுமிகளின் உடல்கள், இன்று அதிகாலை மத்தள ராஜபக்ச சர்வதேச விமான நிலையத்திற்கு கொண்டு செல்லப்பட்டன. அங்கிருந்து அவை விசேட விமானம் மூலம் ஈரானுக்கு ஏற்றிச் செல்லப்படவுள்ளன. எஞ்சியுள்ள ஏனைய மாலுமிகளின் உடல்களை அனுப்பி வைப்பதற்கான ஏற்பாடுகளும் தற்போது துரிதகதியில் முன்னெடுக்கப்பட்டு வருகின்றன.
கடந்த மார்ச் 11-ஆம் திகதி காலி பிரதம நீதவான் சமீர தொடங்கொட வழங்கிய நீதித்துறை உத்தரவின் அடிப்படையில் இந்த நடவடிக்கை மேற்கொள்ளப்படுகிறது. உயிரிழந்தவர்களின் உடல்களை கொழும்பிலுள்ள ஈரான் தூதரகத்திடம் ஒப்படைக்குமாறு அவர் வழங்கிய பணிப்புரையைத் தொடர்ந்து, இன்றைய தினம் உடல்கள் விமானம் மூலம் தாயகம் கொண்டு செல்லப்படுகின்றன.
