ஹோமாகம பொலிஸ் நிலையத்தில் விசாரணைக்காக தடுத்துவைக்கப்பட்டிருந்த 29 வயது இளைஞன் உயிரிழந்தமை குறித்து ஆழ்ந்த கரிசனையை வெளியிட்டுள்ள இலங்கை சட்டத்தரணிகள் சங்கம் இளைஞன் உயிரிழந்த சூழ்நிலைகள் குறித்து பக்கச்சார்பற்ற உடனடி வெளிப்படையான விசாரணைகளை கோரியுள்ளது.
இலங்கை சட்டத்தரணிகள் சங்கம் மேலும் தெரிவித்துள்ளதாவது
இசாரா ஹர்சககுமார என்ற இரண்டு பிள்ளைகளின் தந்தை போதைப்பொருள விசாரணை தொடர்பாக கைதுசெய்யப்பட்டிருந்தார்.
25ம் திகதி ஹோமாகம பொலிஸ்நிலையத்திற்கு தாங்கள் சென்றவேளை அவரின் உடலில் காயங்னகளை அவதானித்ததாக குறிப்பிட்டுள்ள உறவினர்கள் அந்த காயங்கள் அவர் மிகமோசமாக தாக்கப்பட்டுள்ளார் என்பதை புலப்படுத்தின என குறிப்பிட்டுள்ளனர்.
எனினும் பொலிஸ் பேச்சாளர் வேறுவிதமான தகவல்களை வெளியிட்டுள்ளார்,சந்தேகநபருக்கு உடல்நல பாதிப்பு ஏற்பட்டது அவர் மருத்துவமனையில் அனுமதிக்கப்பட்டவேளை உயிரிழந்தார் என அவர் குறிப்பிட்டுள்ளார்.
இவ்வாறு முரண்பாடான தகவல்கள் வெளியாகியுள்ளதால் மரணம் நிகழ்ந்த சூழ்நிலையை உறுதிப்படுத்துவதற்கு நம்பகதன்மை மிக்க சுயாதீன விசாரணை அவசியம்.
அரசிற்கு பொலிஸாரால் தடுத்துவைக்கப்பட்டுள்ளவர்களின் உயிர்களை உடல்நலத்தை பாதுகாக்கவேண்டிய அடிப்படை கடப்பாடுள்ளது,
பொலிஸ் காவலில் வன்முறை அல்லது மனிதாபிமானமற்ற முறையில் நடத்தப்பட்டமை தொடர்பான குற்றச்சாட்டுகளை பாரதூரமானவையாக கருதவேண்டும்,குற்றமிழைத்தவர்கள் யார் என்பது உறுதியானால் சட்டத்தின் கீழ் அவர்களை பொறுப்புக்கூறலிற்கு உட்படுத்தவேண்டும் என இலங்கை சட்டத்தரணிகள் சங்கம் தெரிவித்துள்ளது.
