பொருளாதார வளர்ச்சிக்கு பாராளுமன்றமே பொறுப்பு என மத்திய வங்கி ஆளுநர் தெரிவிப்பு: அரசின் சீர்திருத்தங்களை வரவேற்றார் நிதியியல் குழுத் தலைவர் ஹர்ஷ

இலங்கையின் சாத்தியமான பொருளாதார வளர்ச்சியை (potential growth) 4%-5% என்ற தற்போதைய மட்டத்திற்கு அப்பால் கொண்டு செல்வதற்குத் தேவையான கடினமான கட்டமைப்புச் சீர்திருத்தங்களை (structural reforms) பாராளுமன்றமே முன்னெடுக்க வேண்டும் என்றும், அது மத்திய வங்கியின் கைகளில் இல்லை என்றும் இலங்கை மத்திய வங்கியின் ஆளுநர் கலாநிதி நந்தலால் வீரசிங்க  தெரிவித்தார். பாராளுமன்ற நிதி பற்றிய குழு (CoPF) கூட்டத்தின் போது தெரிவிக்கப்பட்ட இக்கருத்திற்கு அரசாங்க மற்றும் எதிர்க்கட்சிப் பிரதிநிதிகள் இருதரப்பிலிருந்தும் ஆதரவு கிடைத்தது.

மத்திய வங்கி உயர் பொருளாதார வளர்ச்சியை வழங்க வேண்டும் என்ற எதிர்பார்ப்பை நிராகரித்த கலாநிதி வீரசிங்க, நாட்டின் தற்போதைய உற்பத்தித் திறனுக்குள் பொருளாதாரம் இயங்குவதற்கு மட்டுமே பணவியல் கொள்கையால் (monetary policy) உதவ முடியுமே தவிர, நாட்டின் உற்பத்தித் திறனை மத்திய வங்கியினால் தன்னிச்சையாக விரிவாக்க முடியாது என வாதிட்டார்.

நாட்டின் சாத்தியமான வளர்ச்சியை 6%-7% என்ற நிலையான மட்டத்திற்கு உயர்த்தும் பொறுப்பை மக்களால் தேர்ந்தெடுக்கப்பட்ட பிரதிநிதிகளின் மீதே அவர் சுமத்தினார். வர்த்தகம், முதலீடு, சுங்கம், காணி சந்தை மற்றும் தொழிலாளர் துறை சார்ந்த சீர்திருத்தங்கள் இதற்கு அவசியமாகும் என்றும் அவர் குறிப்பிட்டார்.

மத்திய வங்கி அதிகாரிகள், அரசாங்கத்தின் பிரதி அமைச்சர் மற்றும் எதிர்க்கட்சி நாடாளுமன்ற உறுப்பினர்களை ஒன்றிணைத்த இக்கலந்துரையாடலானது, இலங்கையின் பொருளாதாரக் கட்டுப்பாடுகளை பண விரிவாக்கம் (monetary expansion) அல்லது குறுகிய கால நிதித் தூண்டுதல்கள் (fiscal stimulus) மூலம் மட்டுமே தீர்க்க முடியாது என்ற பரந்த புரிதலை வெளிப்படுத்தியது.

முக்கியமாக, அரசாங்கத்தின் சீர்திருத்தத் திசையை வரவேற்ற நிதி பற்றிய குழுவின் (CoPF) தலைவரும் எதிர்க்கட்சியான (SJB) நாடாளுமன்ற உறுப்பினருமான கலாநிதி ஹர்ஷ டி சில்வா, கட்டமைப்பு மாற்றத்தின் அவசியமானது கட்சி அரசியலுக்கு அப்பாற்பட்டதாக இருக்க வேண்டும் என்பதை ஒப்புக்கொண்டார்.

உண்மையான வளர்ச்சிக்கும் (actual growth) சாத்தியமான வளர்ச்சிக்கும் இடையிலான வேறுபாட்டைப் புரிந்துகொள்வதே மத்திய வங்கியின் பொறுப்பை அறிந்து கொள்ள முக்கியமானது என கலாநிதி வீரசிங்க கூறினார். “மத்திய வங்கியினால் நாட்டின் வளர்ச்சிக்கான சாத்தியத்தை அதிகரிக்க முடியாது. நாடு தனது சாத்தியமான மட்டத்தில் வளர்வதற்கே மத்திய வங்கியினால் உதவ முடியும்” என்று அவர் கூறினார்.

சர்வதேச நாணய நிதியம் (IMF) இலங்கையின் சாத்தியமான வளர்ச்சியை சுமார் 3% ஆக மதிப்பிட்டுள்ள நிலையில், மத்திய வங்கி அதனைச் சற்று அதிகமாக, அதாவது தோராயமாக 4%-5% ஆகக் கருதுவதாக கலாநிதி வீரசிங்க தெரிவித்தார்.

பொருளாதார நடவடிக்கை இந்தச் சாத்தியமான மட்டத்துடன் சீரமைக்கப்பட்டிருப்பதை உறுதி செய்வதும், வளர்ச்சி அதைவிடக் குறையும் போது கொள்கைகளைத் தளர்த்துவதும், பொருளாதாரம் சூடாகும்போது (overheating) கொள்கைகளைக் கட்டுப்படுத்துவதுமே மத்திய வங்கியின் பணியாகும் என்றார்.

எனினும், சாத்தியமான வளர்ச்சியை 6-7% ஆக உயர்த்துவதற்கு மத்திய வங்கியின் எல்லைக்கு அப்பாற்பட்ட வேறுபட்ட தலையீடுகள் தேவைப்படுகின்றன. “வளர்ச்சிச் சாத்தியக்கூறு 6, 7% வரை செல்ல வேண்டுமானால், நாட்டின் உற்பத்தித் திறனை விரிவாக்கக்கூடிய பிற சீர்திருத்தங்கள் நம்மிடம் இருக்க வேண்டும்,” என்று அவர் கூறினார்.

கவனம் செலுத்தப்பட வேண்டிய துறைகளைப் பட்டியலிட்ட அவர், வர்த்தகம் மற்றும் முதலீட்டுக் கொள்கை, சுங்க நிர்வாகம், தொழில்களை இலகுவாக நடத்தும் சூழல் (ease of doing business), காணிச் சந்தை மற்றும் தொழிலாளர் சந்தைச் சீர்திருத்தங்கள் ஆகியவை உற்பத்தித் திறனை விரிவாக்க அத்தியாவசியமானவை எனச் சுட்டிக்காட்டினார்.

“இவற்றை மத்திய வங்கியினால் செய்ய முடியாது. அதனால்தான் தேர்ந்தெடுக்கப்பட்ட அதிகாரிகள் இந்தச் சீர்திருத்தங்கள் அனைத்தையும் செய்ய வேண்டியுள்ளது. அப்போதுதான் நாட்டின் சாத்தியமான வளர்ச்சி 5 முதல் 6, 7 சதவீதம் வரை உயர முடியும்” என கலாநிதி வீரசிங்க கூறினார்.

இருப்பினும், 7% சாத்தியமான வளர்ச்சி என்பது கட்டமைப்புச் சீர்திருத்தங்கள் மூலம் எதிர்காலத்தில் சாத்தியமாகக்கூடிய ஒரு மாதிரியே தவிர, இலங்கையின் தற்போதைய திறன் குறித்த நிறுவப்பட்ட மதிப்பீடு அல்ல என்றும் அவர் எச்சரித்தார்.

“தற்போது இலங்கையில் நமது சாத்தியமான வளர்ச்சி 7% என்று கூறும் எந்த அறிவியல் பூர்வ ஆய்வும் இருப்பதாக நான் நினைக்கவில்லை” என்று கூறிய அவர், மத்திய வங்கியின் சொந்த மதிப்பீடு சுமார் 4.5% ஆக உள்ளது என்பதை மீண்டும் வலியுறுத்தினார்.

கடந்த இரு தசாப்தங்களாக வர்த்தகத் துறை (tradable sector) சுருங்கி வருவதையும், வர்த்தகமற்ற துறை (non-tradable sector) விரிவடைந்து வருவதையும் சுட்டிக்காட்டிய கலாநிதி வீரசிங்க, இந்த அமைப்பியல் சமநிலையின்மை மாற்றப்பட வேண்டும் என எச்சரித்தார்.

“கடந்த 20 ஆண்டுகளாக வர்த்தகத் துறை தொடர்ந்து சுருங்கி வருகிறது, வர்த்தகமற்ற துறை விரிவடைந்து வருகிறது. இது மாற்றப்பட வேண்டும். அதுவே இந்த நாட்டின் எதிர்காலம்” என்றார். இந்த போக்கை மாற்றாவிட்டால், வெளிப்புற நிதி இடைவெளியைக் கடன்கள் மூலமே நிரப்ப வேண்டிய நிலை இலங்கைக்குத் தொடர்ந்து ஏற்படும் என்றும் அவர் எச்சரித்தார்.

மத்திய வங்கியின் பணவியல் கொள்கைச் சபை உறுப்பினரும் கொழும்புப் பல்கலைக்கழகத்தின் பொருளியல் பேராசிரியருமான பேராசிரியர் பிரியங்க துனுசிங்க, ஆளுநரின் மதிப்பீட்டை ஆமோதித்தார். நிலையான வளர்ச்சிக்கு உற்பத்தித் திறன், மனித மூலதனம், தொழில்நுட்பத் திறன் மற்றும் போட்டித்தன்மை ஆகியவற்றில் முன்னேற்றம் தேவை என்று வாதிட்டார்.

இலங்கை ஒரு மேல்-நடுத்தர வருவாய் கொண்ட பொருளாதாரமாக உருவெடுக்க வேண்டுமானால், கண்டுபிடிப்புகள், தொழிலாளர்களின் திறன்கள் மற்றும் உற்பத்தித்திறனை அதிகரிக்கும் முதலீடுகளுக்கு அதிக முக்கியத்துவம் அளிக்க வேண்டும் என்றார்.

நாட்டின் நீண்டகால வளர்ச்சிச் சாத்தியத்தைத் திறப்பதற்கு வர்த்தக தாராளமயமாக்கல், சாதகமான முதலீட்டுச் சூழல் மற்றும் தொழிலாளர் சந்தைச் சீர்திருத்தங்கள் அவசியமான மாற்றங்கள் என பேராசிரியர் துனுசிங்க சுட்டிக்காட்டினார்.

“உற்பத்தித் திறனை அதிகரிப்பது, தொழிலாளர் பங்கேற்பை உயர்த்துவது மற்றும் அந்நிய நேரடி முதலீடுகளை ஈர்ப்பதன் மூலமே நம்மால் வளர்ச்சிச் சாத்தியத்தைத் தொட முடியும். அதைச் செய்யத் தவறினால், நமது வளர்ச்சிச் சாத்தியத்தை அதிகரிக்க முடியாது, மேலும் 4 முதல் 5 சதவீதம் வரை மட்டுமே தொடர்ந்து இருப்போம்” என்று அவர் கூறினார்.

நீண்டகாலப் பொருளாதார வளர்ச்சியைத் தீர்மானிக்கும் காரணிகள் குறித்த ஆய்வுகளை மேற்கோள் காட்டிய அவர், உற்பத்தித் திறன், மனித மூலதன உருவாக்கம் மற்றும் வர்த்தகத் திறப்பு ஆகியவை தலா வருமானத்தில் நிலையான முன்னேற்றங்களைத் தீர்மானிக்கும் காரணிகளாகும் என்றார்.

மூலதனத்தை ஊட்டுவதன் மூலம் பொருளாதார நடவடிக்கைகளைத் தற்காலிகமாக முடுக்கிவிடுவதற்கும், பொருளாதாரத்தின் அடிப்படை வளர்ச்சித் திறனை உயர்த்துவதற்கும் இடையே உள்ள வேறுபாட்டை அவர் விளக்கினார்.

“குறுகிய காலத்தில், அரசாங்கம் சில மூலதனங்களை இடுவதன் மூலமாகவோ அல்லது பண உருவாக்கத்தை ஏற்படுத்துவதன் மூலமாகவோ வளர்ச்சியை 5 முதல் 6 சதவீதம் வரை உயர்த்த முடியும், ஆனால் அதைத் தக்கவைக்க முடியாது” என்று அவர் எச்சரித்தார்.

பணவியல் அல்லது நிதி விரிவாக்கத்தைக் கட்டமைப்பு முன்னேற்றங்களுக்கு மாற்றாகக் கருதுவதற்கு எதிராக எச்சரித்த பேராசிரியர் துனுசிங்க, அது நிலையற்ற பொருளாதார நிலைமைகளை உருவாக்கும் அபாயத்தைச் சுட்டிக்காட்டினார்.

கொழும்புக்கு அப்பால் தொழில்துறை விரிவாக்கத்தை வசதி செய்யும் நோக்கில், வர்த்தகக் கொள்கையை அமல்படுத்துதல், 11 பொருளாதார மண்டலங்களை உருவாக்குதல் மற்றும் உள்கட்டமைப்பில் அரசாங்க முதலீடு செய்தல் ஆகிய நடவடிக்கைகளை தொழில் மற்றும் தொழில்முனைவோர் மேம்பாட்டுப் பிரதி அமைச்சர் சதுரங்க அபேசிங்க விவரித்தார்.

சிறிய மற்றும் நடுத்தர அளவிலான தொழில் துறைக்கான ஆதரவு மற்றும் கல்வித் துறையில் மாற்றங்கள் ஆகியவையும் பரந்த சீர்திருத்தத் திட்டத்தின் கூறுகளாகும் என்று அவர் கூறினார்.

அபிவிருத்தி நிதி குறித்துப் பேசிய அவர், நிதியமைச்சானது சந்தைக்கு சுமார் 100 பில்லியன் ரூபாய் குறைந்த வட்டி மூலதனத்தைக் கிடைக்கச் செய்து வருவதாகவும், இந்த முயற்சி இந்த ஆண்டில் சிறப்பாகச் செயல்பட்டுள்ளதாகவும் தெரிவித்தார்.

விவசாயம் மற்றும் மீன்பிடித்தல் போன்ற துறைகளின் சீர்திருத்தங்களுடன் இந்தத் தலையீடுகளும் இணைந்து, தனியார் துறை வழங்க எதிர்பார்க்கப்படும் வளர்ச்சிக்குப் பங்களிக்கும் என்று அபேசிங்க வாதிட்டார்.

 நாடாளுமன்ற உறுப்பினரும் நிதி பற்றிய குழுவின் தலைவருமான கலாநிதி ஹர்ஷ டி சில்வா, சீர்திருத்தங்களின் அவசியம் குறித்து உருவாகியுள்ள ஒத்த கருத்தை வரவேற்றார். பொருளாதார மாற்றத்தைத் தொடர்ச்சியாகத் தடுத்து நிறுத்திய அரசியல் வேறுபாடுகளுக்கு அப்பால் நாடு நகர வேண்டும் என்றார்.

“நாம் கட்சி A, கட்சி B அல்லது கட்சி C ஐச் சேர்ந்தவர்களாக இருந்தாலும், இந்தப் பள்ளத்திலிருந்து வெளியேற வேண்டுமானால் நாட்டின் உற்பத்திக் துறையை வளர்க்க வேண்டும் என்பதை நாம் ஒப்புக்கொள்ள வேண்டும், இல்லையா? சீர்திருத்தங்கள் செய்யப்பட வேண்டும். எனவே சீர்திருத்தம் விஷயத்தில் அனைவரும் ஒரே நிலையில் இருப்பது குறித்து நான் மகிழ்ச்சியடைகிறேன்” என்று கலாநிதி டி சில்வா கூறினார்.

வர்த்தக சீர்திருத்தங்கள் உட்பட முந்தைய சீர்திருத்த முயற்சிகள் எதிர்ப்பை எதிர்கொண்டதை நினைவுகூர்ந்த அவர், மாற்றத்தின் அவசியத்தை அரசியல் களத்தின் அனைத்துத் தரப்பினரும் ஒப்புக்கொள்ள முன்வந்துள்ளதை வரவேற்றார். “நான் உண்மையிலேயே மகிழ்ச்சியடைகிறேன், ஏனென்றால் நீண்ட காலமாக இந்த நாட்டில் சீர்திருத்தங்கள் நிராகரிக்கப்பட்டன. இப்போது அனைவரும் ஒரே பக்கத்தில் இருப்பது மகிழ்ச்சியளிக்கிறது,” என்றார்.