முகநூல் (Facebook) பதிவு ஒன்றின் காரணமாக மரண தண்டனை விதிக்கப்பட்டிருந்த இலங்கையரான சிவராசா அனோஜனுக்கு எதிரான அனைத்து சட்ட நடவடிக்கைகளையும் கைவிட சவுதி அரேபிய அதிகாரிகள் தீர்மானித்துள்ளதாக வெளிவிவகார அமைச்சர் விஜித ஹேரத் உறுதிப்படுத்தியுள்ளார்.
வெளிவிவகார அமைச்சரின் கூற்றுப்படி, அனோஜனுக்கு எதிராக எஞ்சியிருந்த சட்ட நடவடிக்கைகளைத் தொடர்வதில்லை என்றும், அவரை வழக்கு விசாரணைகளிலிருந்து விடுவிப்பதாகவும் சவுதி அரேபியாவின் (Public Prosecution) 2026 நவம்பர் 9 அன்று தீர்மானித்துள்ளது.
சவுதி அதிகாரிகளால் ஆட்சேபனைக்குரியதாகக் கருதப்பட்ட முகநூல் பதிவு தொடர்பிலான குற்றச்சாட்டுகளின் அடிப்படையில், கிழக்கத்திய மாகாணத்தில் உள்ள சவுதி மேல்முறையீட்டு நீதிமன்றத்தினால் 2026 செப்டம்பர் 17 அன்று அனோஜனுக்கு மரண தண்டனை விதிக்கப்பட்டது.
இராஜதந்திர மற்றும் இதர தலையீடுகளைத் தொடர்ந்து, சவுதி நீதிமன்றம் அவரது மரண தண்டனையை 2026 அக்டோபர் 14 அன்று ரத்து செய்தது. இருப்பினும், ஏனைய தண்டனைகள் அமலில் இருந்ததால், அவரை முழுமையாக விடுவிப்பதை உறுதிசெய்வதற்காக இலங்கை அதிகாரிகள் இராஜதந்திர முயற்சிகளைத் தொடர்ந்து மேற்கொண்டு வந்தனர்.
சவுதி பொது அரசுத் தரப்பின் இந்த அண்மைக்காலத் தீர்மானம், எஞ்சிய சட்ட நடவடிக்கைகளுக்கும் முற்றுப்புள்ளி வைத்துள்ளதோடு, அனோஜன் இலங்கை திரும்புவதற்கும் வழியமைத்துள்ளது.
அனோஜனை மீண்டும் இலங்கைக்கு அழைத்து வருவதற்கான தேவையான நடவடிக்கைகளை அரசாங்கம் மேற்கொள்ளும் என்று வெளிவிவகார அமைச்சர் விஜித ஹேரத் தெரிவித்தார். அவர் அடுத்த ஓரிரு வாரங்களுக்குள் இலங்கை திரும்புவார் என எதிர்பார்க்கப்படுகிறது.
இதற்கிடையில், அனோஜனின் குடும்ப உறுப்பினர்கள் இன்று வெளிவிவகார அமைச்சுக்கு விஜயம் செய்து, அவரது விடுதலையை உறுதி செய்யப் பங்காற்றிய ஜனாதிபதி அனுர குமார திசாநாயக்க, வெளிவிவகார அமைச்சு மற்றும் அனைத்து அரச நிறுவனங்களுக்கும் அதிகாரிகளுக்கும் தங்களது நன்றியைத் தெரிவித்துக் கொண்டனர்.
ஜனாதிபதி அனுரகுமாரதிசநாயக்கவின் வழிகாட்டல், வெளிவிவகார அமைச்சின் இராஜதந்திர தலையீடுகள் மற்றும் ஏனைய அதிகாரிகளின் முயற்சிகளே இந்த முடிவுக்குக் காரணம் என்று அமைச்சர் ஹேரத் குறிப்பிட்டுள்ளார்.
மேலும், சவூதி அரேபிய அரசாங்கம், அதன் நீதித்துறை, சவூதி மற்றும் இலங்கை இராஜதந்திர அதிகாரிகள் மற்றும் இவ்வழக்கிற்கு உதவுவதற்காக சவூதி அரேபியா சென்ற சட்டத்தரணிகள் குழுவிற்கும் அவர் தனது நன்றியைத் தெரிவித்துக் கொண்டார்.
