ஏப்ரல் 15, 2026 |
, கடந்த வாரம் அந்தமான் கடலில் படகு கவிழ்ந்ததில் குழந்தைகள் உட்பட சுமார் 250 ரோஹிங்கியாக்கள் மற்றும் வங்கதேசத்தவர்கள் பலியாகியிருக்கலாம் என ஐக்கிய நாடுகளின் அமைப்புகள் அச்சம் வெளியிட்டுள்ளன
வங்கதேசத்தில் இருந்து புறப்பட்டு மலேசியா நோக்கிச் சென்ற அந்த இழுவைப் படகு (Trawler), “பலத்த காற்று, சீற்றமான கடல் மற்றும் அதிகப்படியான கூட்ட நெரிசல் காரணமாக மூழ்கியதாக” ஐக்கிய நாடுகளின் அமைப்புகள் தெரிவித்துள்ளன.
வங்கதேச கடலோர காவற்படை AFP செய்தி நிறுவனத்திடம் கூறுகையில், ஏப்ரல் 9 அன்று ஒரு கப்பல் மூலமாக ஒன்பது பேரை மீட்டதாகத் தெரிவித்தது. எனினும், அந்தப் படகு சரியாக எப்போது கவிழ்ந்தது என்பது இன்னும் தெளிவாகத் தெரியவில்லை.
பின்னணி மற்றும் இடப்பெயர்வு
மியான்மரின் பல இன சிறுபான்மையினரில் ஒருவரான ரோஹிங்கியாக்கள், 2017-ல் அங்கு நடந்த கொடூரமான ஒடுக்குமுறைக்குப் பிறகு பல்லாயிரக்கணக்கில் எல்லை தாண்டி வங்கதேசத்திற்குத் தப்பி சென்றுள்ளனர்.. முதன்மையாக முஸ்லீம்களாக இருக்கும் ரோஹிங்கியாக்களுக்கு, பௌத்த மதத்தினர் பெரும்பான்மையாக வாழும் மியான்மர் அரசாங்கம் குடியுரிமையை மறுத்து வருகிறது.
வங்கதேசத்தில் உள்ள மோசமான வாழ்க்கைச் சூழல், சில ரோஹிங்கியாக்களை மலேசியா போன்ற நாடுகளுக்கு பாதுகாப்பான புகலிடம் தேடி, அதிக நெரிசலான படகுகளில் ஆபத்தான பயணங்களை மேற்கொள்ளத் தூண்டுகிறது.
தப்பிப்பிழைத்தவரின் துயரம்
உயிர் தப்பியவர்களில் ஒருவரான 40 வயதான ரஃபிகுல் இஸ்லாம், தான் மீட்கப்படுவதற்கு முன்பு சுமார் 36 மணிநேரம் கடலில் மிதந்ததாக AFP-யிடம் தெரிவித்தார். மேலும், படகில் இருந்து கசிந்த எண்ணெயால் தனது உடல் வெந்ததாகவும் அவர் கூறினார். மலேசியாவில் வேலை கிடைக்கும் என்ற வாக்குறுதியே தன்னை அந்தப் படகில் ஏறத் தூண்டியதாக அவர் குறிப்பிட்டார்.
ஐநா முகமைகளின் அறிக்கைu
“இந்தத் துயரச் சம்பவம், நீண்டகால இடப்பெயர்வு மற்றும் ரோஹிங்கியாக்களுக்கான நிலையான தீர்வுகள் இல்லாததின் மோசமான விளைவுகளைப் பிரதிபலிக்கிறது” என்றுUNHCR) மற்றும் (IOM) இணைந்து வெளியிட்டுள்ள அறிக்கையில் தெரிவிக்கப்பட்டுள்ளது.
அவர்களின் தாயகமான மியான்மரின் ரக்கைன் (Rakhine) மாநிலத்தில் நிலவும் வன்முறையால், பாதுகாப்பான திரும்புதலுக்கான நம்பிக்கை மங்கிவிட்டதாக ” ஐக்கிய நாடுகளின் அமைப்புகள் தெரிவித்துள்ளன. மேலும், அகதி முகாம்களில் குறைந்து வரும் மனிதாபிமான உதவிகள் மற்றும் சவாலான வாழ்க்கைச் சூழல்கள் அவர்களை இத்தகைய ஆபத்தான பயணங்களை மேற்கொள்ளத் தள்ளுகின்றன.
தொடரும் ஆபத்துகள்
இத்தகைய படகுகள் பெரும்பாலும் சிறியதாகவும், நெரிசல் மிக்கதாகவும் இருக்கும். குடிநீர் மற்றும் சுகாதாரம் போன்ற அடிப்படை வசதிகள் அவற்றில் இருப்பதில்லை. இவை எப்போதும் தங்கள் இலக்கை அடைவதில்லை; சிலர் கடலிலேயே உயிரிழக்கின்றனர், மற்றவர்கள் சில நேரங்களில் தடுத்து வைக்கப்படுகிறார்கள் அல்லது நாடு கடத்தப்படுகிறார்கள்.
“மக்கள் போரினாலும் பசியாலும் இறக்கின்றனர். எனவே, இங்கு மெதுவாகச் சாவதை விட கடலில் சாவதே மேலானது என்று சிலர் நினைக்கிறார்கள்” என வங்கதேசத்தின் காக்ஸ் பஜாரில் (Cox’s Bazar) உள்ள ஒரு ரோஹிங்கியா அகதி முன்னதாகத் தெரிவித்திருந்தார்.
ஐநா அமைப்புகள் சர்வதேச சமூகத்திடம், வங்கதேசத்தில் உள்ள ரோஹிங்கியா அகதிகளுக்கும் அவர்களுக்கு ஆதரவளிக்கும் சமூகங்களுக்கும் நிதி உதவியைத் தொடர்ந்து வழங்குமாறு கோரிக்கை விடுத்துள்ளன. மியான்மரில் இடப்பெயர்வுக்குக் காரணமான அடிப்படைப் பிரச்சினைகளைத் தீர்க்கவும், ரோஹிங்கியாக்கள் கண்ணியத்துடன் தாயகம் திரும்பவும் அவசர முயற்சிகள் தேவை என்பதை இந்தத் துயரம் நினைவூட்டுவதாக அவை தெரிவித்தன.
