ஐஎம்எஃப்-இன் ஆண்டிறுதி இருப்பு இலக்கு சாத்தியமற்றது: நாடாளுமன்ற உறுப்பினர் ஹர்ஷ டி சில்வா விமர்சனம்!

சர்வதேச நாணய நிதியத்தின் (IMF) நீடிக்கப்பட்ட நிதி வசதி (EFF) திட்டத்தின் கீழ் உடன்படப்பட்டுள்ள 8.6 பில்லியன் டொலர் மொத்த உத்தியோகபூர்வ கையிருப்பு இலக்கை இந்த ஆண்டு எட்ட முடியாது என்றும், தற்போதைய பொருளாதார சூழ்நிலையில் இது யதார்த்தமற்றது என்றும் பொது நிதி பற்றிய குழுவின் (COPF) தலைவர் கலாநிதி ஹர்ஷ டி சில்வா தெரிவித்துள்ளார்.

. மேலும், தற்போதைய இருப்பு நிலை உள்நாட்டு பரிமாற்றங்கள் (Domestic Swaps) மூலமே கட்டியெழுப்பப்பட்டுள்ளது என்றும் அவர் சுட்டிக்காட்டினார்.

“இந்த இலக்கு யதார்த்தமான ஒன்றல்ல. கடந்த ஆறு மாதங்களை விட அடுத்த ஆறு மாதங்கள் சிறப்பாக இருக்கும் என்று நாம் எதிர்பார்க்க முடியாது. இப்போது பராமரிக்கப்படும் கையிருப்பில், 2 பில்லியன் டொலருக்கும் அதிகமான தொகை உள்நாட்டு பரிமாற்றங்களின் விளைவாக வந்ததாகும். ஆனால் சீனப் பரிமாற்றம் (Chinese Swap) பற்றி மட்டுமே அனைவரும் பேசுகிறார்கள்” என்று ஹர்ஷ டி சில்வா கூறினார்.

குறைக்கப்பட்ட இலக்கும் தற்போதைய நிலையும்

கடந்த மே மாதம் சர்வதேச நாணய நிதியம் தனது ஐந்தாவது மற்றும் ஆறாவது மீளாய்வுகளின் முடிவில் வெளியிட்ட அறிக்கையின்படி, 2026ஆம் ஆண்டின் இறுதியில் இலங்கை 11 பில்லியன் டொலர் கையிருப்பை வைத்திருக்க வேண்டும் என்ற முந்தைய இலக்கு மாற்றப்பட்டு, அது 8.6 பில்லியன் டொலராகக் குறைக்கப்பட்டது. மேலும், 2028ஆம் ஆண்டில் இத்திட்டம் முடிவடையும் போது இலங்கையின் இருப்பு நிலை 13.9 பில்லியன் டொலராக இருக்க வேண்டும் என்றும் ஐஎம்எஃப் இலக்கு நிர்ணயித்துள்ளது.

இலங்கை மத்திய வங்கியின் (CBSL) சமீபத்திய அறிக்கையின்படி, ஏப்ரல் மாத இறுதியில் 6.7 பில்லியன் டொலராக இருந்த இலங்கையின் மொத்த உத்தியோகபூர்வ கையிருப்பு, மே மாதத்தில் 1.6% அதிகரித்து 6.8 பில்லியன் டொலராக  (6,873 மில்லியன் டாலர்) உயர்ந்துள்ளது. இந்த கையிருப்பில் சீன மக்கள் வங்கியின் (PBOC) நாணயப் பரிமாற்ற வசதியும் உள்ளடங்கியுள்ளது என்று மத்திய வங்கி உறுதிப்படுத்தியுள்ளது.

உள்நாட்டு பரிமாற்றங்கள் தற்காலிகமானவை

இது குறித்து மேலும் விளக்கிய ஹர்ஷ டி சில்வா, “தற்போதுள்ள கையிருப்பில் உள்ள 2 பில்லியன் டொலருக்கும் அதிகமான உள்நாட்டுப் பரிமாற்றங்களை மொத்த தொகையான 6 பில்லியன் மற்றும் 8 பில்லியன் டொலர்களில் இருந்து கழிக்க வேண்டும். மற்ற மத்திய வங்கிகளுடனும் இத்தகைய பரிமாற்றங்கள் செய்யப்பட்டுள்ளன. உள்நாட்டு பரிமாற்றங்கள் என்பவை தற்காலிக சேர்க்கைகளே தவிர, அவை நமக்குச் சொந்தமானவை அல்ல. இவை நிகர சர்வதேச இருப்பை (Net International Reserves) அதிகரிக்காது” என்றார்.

கடந்த 2021ஆம் ஆண்டு கையெழுத்திடப்பட்ட இருதரப்பு நாணயப் பரிமாற்ற ஒப்பந்தத்தை, இலங்கை மத்திய வங்கியும் சீன மக்கள் வங்கியும் கடந்த 2024இல் மேலும் மூன்று ஆண்டுகளுக்குப் புதுப்பித்தன. இதன்படி, தோராயமாக 1.4 பில்லியன் டாலர் (10 பில்லியன் யுவான்) பெறுமதியான இந்த நாணயப் பரிமாற்ற வசதியை இலங்கை 2027ஆம் ஆண்டின் இறுதிக்குள் சீனாவிற்குத் திருப்பிச் செலுத்த வேண்டிய பொறுப்பில் உள்ளது.

இலக்கை எட்டுவது கடினம்

“நாணய நிதியத்துடனான ஒப்பந்தத்தில், திட்டம் முடியும் போது மொத்த கையிருப்பு இலக்கு 14 பில்லியன் டாலராக இருந்தது. அது சாத்தியமற்றது என்பதால் தற்போது திருத்தப்பட்டுள்ளது. எனவே, இந்த ஆண்டு 8 பில்லியன் டாலர் இலக்கை எட்ட வேண்டும் என்றால், அதற்கு வழியே இல்லை. இந்த இலக்கை அடைய முடியாது என்பதே எனது நம்பிக்கை” என்று பொது நிதி பற்றிய குழுவின் தலைவர் ஹர்ஷ டி சில்வா மேலும் தெரிவித்தார்.