லங்கா பிரீமியர் லீக் (LPL) டி20 கிரிக்கெட் தொடர் இன்று (வெள்ளிக்கிழமை) தொடங்கவிருந்த நிலையில், கிரிக்கெட் வீரர் ஒருவருக்குப் பெருந்தொகையை லஞ்சமாகக் கொடுக்க முயன்ற குற்றச்சாட்டில் JAFFNA KINGS இந்திய இணை உரிமையாளர் (Co-owner) இலங்கை பொலிஸாரால் கைது செய்யப்பட்டுள்ளார்.
பாதிக்கப்பட்ட கிரிக்கெட் வீரர், சுமார் 10 நாட்களுக்கு முன்பே இந்த லஞ்ச முயற்சி குறித்துப் பொலிஸாருக்கு இரகசியத் தகவல் வழங்கி எச்சரித்திருந்தார். இந்த அதிரடிக் கைது நடவடிக்கை, எல்.பி.எல் தொடர் ஆரம்பமாவதற்கு சில மணிநேரங்களுக்கு முன்பாக இடம்பெற்றுள்ளது.
சம்பவத்தின் பின்னணி:
விளையாட்டுத் துறை புலனாய்வுப் பிரிவின் (Sports Investigation Unit) பரிசோதகர் சுபுன் விதானகே வழங்கிய தகவலின்படி, கொழும்பிலுள்ள ஹோட்டல் ஒன்றில் வைத்து கிரிக்கெட் வீரர் ஒருவருக்கு 9.5 மில்லியன் ரூபாயை ($28,700) வழங்க முற்பட்ட போதே சந்தேக நபரான மன்ஜோத் கல்ரா (Manjot Kalra) கைது செய்யப்பட்டுள்ளார்.
அவர் விரைவில் நீதிமன்றத்தில் நீதவான் முன்னிலையில் ஆஜர்படுத்தப்படவுள்ளார்.
லஞ்ச முயற்சி குறித்து முதலில் அணுகப்பட்டபோதே, அந்த வீரர் உடனடியாக பொலிஸாருக்குத் தகவல் வழங்கியுள்ளார். பாதுகாப்பு காரணங்களுக்காக அந்த வீரரின் விபரங்களை பொலிஸார் வெளியிடவில்லை.
இன்று இரவு கொழும்பில் யாழ்ப்பாணம் (Jaffna) மற்றும் காலி (Galle) அணிகளுக்கு இடையிலான முதலாவது போட்டியுடன் ஆறாவது எல்.பி.எல் தொடர் ஆரம்பமாகவிருந்த நிலையிலேயே இந்தச் சம்பவம் நிகழ்ந்துள்ளது. கைது செய்யப்பட்டுள்ள மன்ஜோத் கல்ரா, யாழ்ப்பாணம் அணியின் இணை உரிமையாளர் ஆவார்.
தொடரும் ஊழல் குற்றச்சாட்டுகள்:
லங்கா பிரீமியர் லீக் தொடர் ஆரம்பம் முதலே இத்தகைய ஊழல் மற்றும் ஆட்ட நிர்ணயக் குற்றச்சாட்டுகளால் தொடர்ந்து பாதிக்கப்பட்டு வருகிறது.
கடந்த ஜனவரி மாதம், தம்புள்ளை தண்டர்ஸ் (Dambulla Thunders) அணியின் பிரித்தானிய உரிமையாளரான, வங்காளதேசத்தில் பிறந்த தமீம் ரஹ்மான், வீரர்களை ஆட்ட நிர்ணயத்திற்குத் தூண்ட முயன்ற குற்றச்சாட்டை நீதிமன்றத்தில் ஒப்புக்கொண்டார்.
அவருக்கு 4 ஆண்டுகள் இடைநிறுத்தப்பட்ட சிறைத்தண்டனையும், 24 மில்லியன் ரூபாய் அபராதமும் விதிக்கப்பட்டது.
விளையாட்டுத் துறையில் ஊழலை ஒழிக்கும் நோக்கில், கடந்த 2019 ஆம் ஆண்டு இலங்கையில் இயற்றப்பட்ட கடுமையான சட்டத்தின் கீழேயே இத்தகைய கடுமையான நடவடிக்கைகள் மற்றும் தண்டனைகள் வழங்கப்பட்டு வருகின்றன.
