வினாத்தாள் கசிவுகள் (exam paper leaks) மற்றும் தேர்வு நடைமுறைகளிள் நிகழ்ந்த முறைகேடுகளுக்கு எதிராக வாரக்கணக்கில் இடம்பெற்ற தீவிர போராட்டங்களைத் தொடர்ந்து, இந்தியாவின் கல்வி அமைச்சர் தர்மேந்திர பிரதான் தனது பதவியை ராஜினாமா செய்துள்ளார்.
இந்தப் போராட்டங்களை ‘காக்ரோச் ஜனதா கட்சி’ (Cockroach Janta Party – CJP) என்ற அமைப்பு முன்னெடுத்து நடத்தியது. இது ஒரு உண்மையான அரசியல் கட்சி அல்ல; மாறாக, ஒரு நையாண்டிப் பிரச்சாரமாக (satirical campaign) தொடங்கி, பின்னர் நாடு தழுவிய மக்கள் இயக்கமாக உருவெடுத்த ஒன்றாகும்.
இந்தியாவில் நரேந்திர மோடியின் அரசாங்கத்திற்கு எதிராக சமீபத்திய ஆண்டுகளில் உருவெடுத்த மிகப்பரிய எதிர்ப்புக் குரல்களில் ஒன்றாக இந்தப் போராட்டங்கள் அமைந்தன. புதுடெல்லியில் ஆயிரக்கணக்கானோர் முகாமிட்டுப் போராட்டத்தில் ஈடுபட்ட நிலையில், இப்போராட்டம் நாடு முழுவதற்கும் பரவியது.
சமூக ஆர்வலர் சோனம் வாங்சுக் (Sonam Wangchuk) காவல்துறையினரால் வலுக்கட்டாயமாக மருத்துவமனைக்குக் கொண்டு செல்லப்பட்டதைத் தொடர்ந்து, இந்த இயக்கம் கடந்த வாரம் மேலும் வேகம் பெற்றது. அவர் தனது 26 நாட்கள் நீடித்த உண்ணாவிரதப் போராட்டத்தை வெள்ளிக்கிழமை முடிவுக்குக் கொண்டுவந்தார்.
நாடாளுமன்றத்தை நோக்கிப் பேரணியாகச் சென்ற போராட்டக்காரர்கள் மீது காவல்துறை நடத்திய தடியடி மற்றும் அடக்குமுறைகளும் பொதுமக்கள் மத்தியில் பெரும் கொந்தளிப்பை ஏற்படுத்தின.
சில இளைஞர்களை மூத்த நீதிபதி ஒருவர் “காக்ரோச்” (கரப்பான் பூச்சி) என்று குறிப்பிட்டதை அடுத்து, போராட்டக்காரர்கள் அந்த வார்த்தையைத் தங்களின் மன உறுதி மற்றும் எதிர்ப்புக் குறியீடாக (symbol of resilience and defiance) ஏற்றுக்கொண்டனர்.
அமைச்சர் தர்மேந்திர பிரதானின் ராஜினாமா குறித்த செய்தி வெளியானதும், மத்திய டெல்லியிலுள்ள சி.ஜே.பி அமைப்பின் முதன்மைப் போராட்டக் களத்தில் மிகப்பெரிய கொண்டாட்டங்கள் வெடித்தன.
கூட்டத்தினரின் காதைப் பிளக்கும் ஆரவாரத்திற்கு மத்தியில், தற்காலிகமாக அமைக்கப்பட்ட மேடையில் இருந்து உணர்ச்சிவசப்பட்ட குரலில் அலறிய சி.ஜே.பி அமைப்பின் நிறுவனர் அபிஜீத் திப்கே, “நாம் அதைச் சாதித்துவிட்டோம்!” என்று உரக்கக் கூறினார்.
தொடர்ந்து பேசிய அவர், அனைவரது முயற்சிகளுக்கும் ஆதரவிற்கும் நன்றி தெரிவித்ததோடு, சமூக ஆர்வலர் சோனம் வாங்சுக்குடன் இணைந்து வாரக்கணக்கில் உண்ணாவிரதப் போராட்டத்தில் ஈடுபட்ட மாணவர்களுக்குச் சிறப்பு நன்றியையும் தெரிவித்துக் கொண்டார்
“போராட்டம் இன்னும் முடியவில்லை”: சி.ஜே.பி (CJP) அறிவிப்பு!
வெளியிடப்பட்ட நேரம்: 15:24
முக்கிய மருத்துவப் பொதுத்தடைத் தேர்வு ரத்து செய்யப்பட்டதைத் தொடர்ந்து தற்கொலை செய்துகொண்ட மாணவர்களின் குடும்பங்களுக்கு நஷ்டஈடு வழங்கப்பட வேண்டும் என்ற தங்களது கோரிக்கையை எக்காரணம் கொண்டும் கைவிடப்போவதில்லை என்றும், இந்த போராட்டம் இன்னும் முடிவடையவில்லை என்றும் சி.ஜே.பி (CJP) அமைப்பின் நிறுவனர் திப்கே ‘X’ தளத்தில் வெளியிட்டுள்ள அறிக்கையில் தெரிவித்துள்ளார்.
கடந்த ஜூலை 20 அன்று ஆயிரக்கணக்கான சி.ஜே.பி ஆதரவாளர்கள் நாடாளுமன்றத்தை நோக்கிப் பேரணியாகச் செல்ல முயன்றபோது, போராட்டக்காரர்கள் மீது அளவுக்கு அதிகமான பலத்தைப் பயன்படுத்திய காவல்துறை அதிகாரிகள் மீது நடவடிக்கை எடுக்கப்பட வேண்டும் என்ற கோரிக்கையையும் திப்கே மீண்டும் வலியுறுத்தினார்.
“நினைவில் வைத்துக்கொள்ளுங்கள், கரப்பான் பூச்சிகளுடன் மோதாதீர்கள்” என்றும் அவர் தனது அறிக்கையில் மேலும் சேர்த்துக் குறிப்பிட்டுள்ளார்.
