சர்வதேச கடற்பரப்பை கடந்து தமிழக மீனவர்கள் இலங்கை கடற்பரப்பிற்குள் நுழைவதை நிறுத்தவேண்டும் என இந்தியாவின் நிலைப்பாட்டை கடற்றொழில், நீரியல் மற்றும் கடல்வளங்கள்அமைச்சர் இராமலிங்கம் சந்திரசேகர் வரவேற்றுள்ளார்.
இது தொடர்பில் அமைச்சர் மேலும் தெரிவித்துள்ளதாவது
இலங்கை கடற்பரப்பிற்குள் அத்துமீறி நுழையும் ஏனைய நாடுகளின் மீனவர்கள் தடைசெய்யப்பட்ட மீன்பிடி முறைகளில் ஈடுபடுவதால் வடபகுதி மீனவர்களின் வாழ்வாதாரத்திற்கு பெரும் பாதிப்பு ஏற்படுகின்றது என இலங்கை தொடர்ச்சியாக கரிசனை வெளியிட்டு வந்துள்ளதை கருத்தில் கொள்ளும்போது இந்தியாவின் இந்த நிலைப்பாடு முக்கியத்துவம்வாய்ந்தது.
இலங்கை கடற்பரப்பிற்குள் அத்துமீறி நுழைந்து தடைசெய்யப்பட்ட மீன்பிடி முறைகளை பயன்படுத்துவதால் கடல்சார் வளங்களுக்கும் உள்ளுர் மீனவர்களின் வாழ்வாதாரத்திற்கும் பாதிப்பு ஏற்படுகின்றது.
இலங்கையின் கடல்சார் வளங்களையும் சூழலையும் பாதுகாக்கும் பொறுப்பு இலங்கை அரசாங்கத்தினுடையது.எங்கள் கடற்பரப்பிற்குள் இடம்பெறும் அத்துமீறல்கள் குறித்து நாங்கள் தொடர்ச்சியாக முறைப்பாடு செய்து வந்துள்ளோம்.
சர்வதேச கடல் எல்லையை மதிக்கும் அதேவேளை இரு தரப்புமீனவர்களுக்கும் மீன்பிடிப்பதற்கும் வாழ்வாதாரத்திற்கும் உள்ள உரிமையை பாதுகாப்பதும் முக்கியமானது.
இந்தியாவிற்கும் இலங்கைக்கும் இடையில் நீண்டகாலமாக காணப்பட்ட இராஜதந்திர புரிந்துணர்வின் அடிப்படையிலேயே கச்சதீவு மற்றும் கடல்சார் எல்லைகள் தொடர்பான உடன்படிக்கைகளில் இரண்டு நாடுகளும் கைச்சாத்திட்டனஇந்த விடயத்தில் இலங்கையின் நிலைப்பாடு தெளிவானது என அமைச்சர் தெரிவித்துள்ளார்.
