வாகரைப் பிரதேசத்தின் இயற்கை வளங்களையும் மக்களின் வாழ்வாதாரத்தையும் அழிக்கும் இறால் பண்ணை அபிவிருத்தித் திட்டத்தைக் கைவிட வேண்டும்

950 ஹெக்டேயர் காணிகளை உள்ளடக்கிய முன்மொழியப்பட்ட திட்டத்தினால் சுற்றுச்சூழலுக்கும் ஆயிரக்கணக்கான மக்களின் வாழ்வாதாரத்திற்கும் பாதிப்பு ஏற்படக்கூடும் – கிழக்கு மாகாண சிவில் சமூக செயற்பாட்டாளர்கள் ஒன்றியம் ஆட்சேபனைவெளியிட்டுள்ளது

முக்கிய கோரிக்கைகள்

– வாகரைப் பிரதேசத்தில் முன்மொழியப்பட்டுள்ள இறால் பண்ணை அபிவிருத்தித் திட்டத்தைக் கைவிட வேண்டும்.
– கண்டல் தாவரங்கள், வாவிகள், இயற்கை நீர்நிலைகள் மற்றும் உயிரியல் பன்முகத்தன்மையைப் பாதுகாக்க வேண்டும்.
– பாரம்பரிய மீன்பிடியாளர்கள், விவசாயிகள் மற்றும் இயற்கை வளங்களைச் சார்ந்து வாழும் மக்களின் வாழ்வாதார உரிமைகளை உறுதிப்படுத்த வேண்டும்.
– திட்டம் தொடர்பான சுற்றுச்சூழல் தாக்க மதிப்பீடுகள் மற்றும் உரிய அனுமதிகள் பற்றிய தகவல்களைப் பொதுமக்களுக்கு வெளிப்படுத்த வேண்டும்.
– பாதிக்கப்படக்கூடிய மக்களின் கருத்துகளைப் பெறாமல் இத்திட்டம் தொடர்பில் இறுதித் தீர்மானம் எடுக்கக்கூடாது.

மட்டக்களப்பு மாவட்டத்தின் வாகரைப் பிரதேசத்தில், பணிச்சங்கேணி தொடக்கம் கதிரவெளி வரையிலான சுமார் 950 ஹெக்டேயர் காணிகளை உள்ளடக்கிய வகையில் இறால் பண்ணை அபிவிருத்தித் திட்டமொன்றை நடைமுறைப்படுத்த அரசாங்கம் தீர்மானித்துள்ளதாக அறியமுடிகின்றது.

இத்திட்டம் நடைமுறைப்படுத்தப்படுமானால், வாகரைப் பிரதேசத்தின் இயற்கைச் சூழல், நீர்வளங்கள், கடல்வாழ் உயிரினங்களின் இனப்பெருக்கச் சூழல் மற்றும் மக்களின் பாரம்பரிய வாழ்வாதாரங்கள் பாதிக்கப்படக்கூடும் என்ற ஆழ்ந்த கவலையை எமது கிழக்கு மாகாண சிவில் சமூக செயற்பாட்டாளர்கள் ஒன்றியம் வெளிப்படுத்துகின்றது.

இயற்கை வளங்கள் அழிக்கப்படும் அபாயம்!

வாகரைப் பிரதேசம் வாவிகள், இயற்கை நீர்நிலைகள் மற்றும் பரந்தளவிலான கண்டல் தாவரங்களைக் கொண்ட முக்கியமான சுற்றுச்சூழல் பிரதேசமாகும். இவை மீன், இறால், நண்டு உள்ளிட்ட பல்வேறு நீர்வாழ் உயிரினங்களின் இனப்பெருக்கத்திற்கும் வளர்ச்சிக்கும் இன்றியமையாத வாழிடங்களாக விளங்குகின்றன.

இத்தகைய உணர்திறன் மிக்க இயற்கைச் சூழலில் பெருமளவிலான இறால் பண்ணைகளை அமைப்பதன் மூலம் கண்டல் தாவரங்கள் அழிக்கப்படுதல், நீரின் தரம் பாதிக்கப்படுதல், பண்ணைக் கழிவுகள் இயற்கை நீர்நிலைகளில் கலத்தல் மற்றும் நீர்வாழ் உயிரினங்களின் வாழிடங்கள் சீரழிதல் போன்ற ஆபத்துகள் ஏற்படக்கூடும்.

எனவே, விரிவானதும் சுயாதீனமானதுமான சுற்றுச்சூழல் தாக்க மதிப்பீடு மற்றும் பொதுமக்களின் கருத்தறிதல் இல்லாமல் இத்திட்டத்தை முன்னெடுப்பது பொறுப்பான அபிவிருத்தி அணுகுமுறையாக அமையாது.

மக்களின் பாரம்பரிய வாழ்வாதாரங்களுக்கு அச்சுறுத்தல்!

வாகரைப் பிரதேச மக்களில் கணிசமானோர் பாரம்பரிய மீன்பிடி, விவசாயம், தேன் சேகரித்தல், காட்டு உணவுப் பொருட்கள் மற்றும் பழங்களைச் சேகரித்து விற்பனை செய்தல் உள்ளிட்ட இயற்கை வளங்களை அடிப்படையாகக் கொண்ட தொழில்களில் தங்கியுள்ளனர்.

இப்பிரதேசத்தில் மாற்றுத் தொழில்வாய்ப்புகள் குறைவாகக் காணப்படும் நிலையில், இயற்கை வளங்கள் பாதிக்கப்படுமானால் அதனைச் சார்ந்து வாழும் குடும்பங்கள் கடுமையான பொருளாதார நெருக்கடிகளை எதிர்கொள்ள வேண்டிய நிலை ஏற்படும்.

இறால் பண்ணைகளின் கழிவுகளால் நீர்நிலைகள் மாசடைவது, மீன் மற்றும் நண்டு இனங்களின் பெருக்கம் பாதிக்கப்படுவது அல்லது பாரம்பரிய மீன்பிடிப் பகுதிகளுக்கான அணுகல் குறைவது போன்ற நிலைமைகள் உருவானால், மீன்பிடியாளர்களின் வருமானம் குறைவதுடன் உள்ளூர் உணவுப் பாதுகாப்பும் பாதிக்கப்படலாம்.

அபிவிருத்தி என்ற பெயரில் மக்களின் வாழ்வாதாரங்கள் பாதிக்கப்படுவதை ஏற்றுக்கொள்ள முடியாது. மக்களின் வாழ்வாதாரப் பாதுகாப்பை உறுதிப்படுத்துவதே உண்மையான மக்கள் நல அபிவிருத்தியாகும்.

இயற்கைச் சமநிலையைப் பாதுகாப்பது அவசியம்!

வாவிகளுக்கும் கடலுக்கும் இடையிலான இயற்கையான நீரியல் தொடர்புகள், நீரின் உவர்ப்புத்தன்மை மற்றும் ஏனைய சூழலியல் நிலைமைகள் ஆகியவை நீர்வாழ் உயிரினங்களின் வாழ்க்கைச் சுழற்சியில் முக்கிய பங்கு வகிக்கின்றன.

இத்தகைய இயற்கை அமைப்புகளில் ஏற்படும் மாற்றங்கள் மீன்வள உற்பத்தியையும் அப்பகுதியைச் சார்ந்த மக்களின் பொருளாதாரத்தையும் பாதிக்கக்கூடும்.

இயற்கை வளங்கள் தற்போதைய தலைமுறைக்கு மட்டுமே சொந்தமானவை அல்ல. அவை எதிர்காலத் தலைமுறையினருக்கும் பாதுகாப்பாகக் கையளிக்கப்பட வேண்டிய பொதுச் சொத்துகளாகும்.

குறுகியகால பொருளாதார நன்மைகளை முன்னிலைப்படுத்தி, நீண்டகால சுற்றுச்சூழல் பாதிப்புகளுக்கு வழிவகுக்கக்கூடிய திட்டங்களை முன்னெடுப்பதைத் தவிர்க்க வேண்டும்.

பிரதேச சபைக் கலந்துரையாடலில் ஆட்சேபனைகள் முன்வைப்பு!

இறால் பண்ணை அபிவிருத்தித் திட்டம் தொடர்பாக வாகரைப் பிரதேச சபைத் தவிசாளர் தலைமையில் அண்மையில் நடைபெற்ற கலந்துரையாடலில், சிவில் சமூகப் பிரதிநிதிகள் உள்ளிட்ட பல்வேறு தரப்பினரால் இத்திட்டத்தின் எதிர்காலப் பாதிப்புகள் தொடர்பில் கவலைகளும் ஆட்சேபனைகளும் முன்வைக்கப்பட்டதாக அறியமுடிகின்றது.

இதனைத் தொடர்ந்து, திட்டத்தை நடைமுறைப்படுத்துவதற்கு எதிரான காரணங்களை எழுத்துமூலம் சமர்ப்பிக்க முடியும் எனத் தீர்மானிக்கப்பட்டதாகவும் அறியமுடிகின்றது.

அந்த அடிப்படையில், எமது கிழக்கு மாகாண சிவில் சமூக செயற்பாட்டாளர்கள் ஒன்றியம், 11.10.2026 திகதியிட்டு வாகரைப் பிரதேச சபைத் தவிசாளரிடம் உத்தியோகபூர்வ முறைப்பாட்டைச் சமர்ப்பிக்கின்றது.

இம்முறைப்பாட்டின் ஊடாக, முன்மொழியப்பட்டுள்ள இறால் பண்ணை அபிவிருத்தித் திட்டத்தைக் கைவிடுவதற்கான நடவடிக்கைகளை மேற்கொள்ளுமாறும், சுற்றுச்சூழல் பாதுகாப்பு மற்றும் மக்களின் வாழ்வாதார உரிமைகளை உறுதிப்படுத்துமாறும் கோரிக்கை விடுக்கப்பட்டுள்ளது.

மேலும், திட்டம் தொடர்பான சுற்றுச்சூழல் தாக்க மதிப்பீடுகள், அனுமதிகள் மற்றும் நிலப் பயன்பாட்டுத் திட்டங்கள் தொடர்பான தகவல்களைப் பொதுமக்களுக்கு வெளிப்படுத்துவதுடன், உள்ளூர் மக்கள், மீன்பிடியாளர்கள், விவசாயிகள் மற்றும் சிவில் சமூகப் பிரதிநிதிகளின் கருத்துகளுக்கும் உரிய முக்கியத்துவம் அளிக்கப்பட வேண்டும் என வலியுறுத்தப்பட்டுள்ளது.

மக்கள் நலனுக்கு முன்னுரிமை அளிக்க வேண்டும்!

வாகரைப் பிரதேசம் வெறுமனே அபிவிருத்தித் திட்டங்களை நடைமுறைப்படுத்துவதற்கான நிலப்பரப்பு அல்ல. அது பல தலைமுறைகளாக இயற்கையோடு இணைந்து வாழ்ந்துவரும் மக்களின் வாழ்விடமாகவும், அவர்களின் உணவுப் பாதுகாப்பையும் வாழ்வாதாரத்தையும் உறுதிப்படுத்தும் இயற்கை வளங்களின் தாயகமாகவும் விளங்குகின்றது.

மக்களின் வாழ்வாதாரங்களைப் பாதித்து, இயற்கைச் சூழலைச் சீரழித்து முன்னெடுக்கப்படும் எந்தவொரு திட்டத்தையும் உண்மையான மக்கள் நல அபிவிருத்தியாகக் கருத முடியாது.

எனவே, வாகரைப் பிரதேசத்தில் முன்மொழியப்பட்டுள்ள இறால் பண்ணை அபிவிருத்தித் திட்டத்தைக் கைவிடுவதற்கு உரிய நடவடிக்கைகளை மேற்கொள்ளுமாறும், மக்களின் கருத்துகளுக்கும் சுற்றுச்சூழல் பாதுகாப்புக்கும் முன்னுரிமை அளித்து செயற்படுமாறும் வாகரைப் பிரதேச சபை உள்ளிட்ட சம்பந்தப்பட்ட அரச நிறுவனங்களிடம் வலியுறுத்திக் கேட்டுக்கொள்கின்றோம்.

இயற்கை வளங்களைப் பாதுகாப்போம்!
மக்களின் வாழ்வாதார உரிமைகளை உறுதிப்படுத்துவோம்!
மக்களின் சம்மதமின்றி அவர்களின் எதிர்காலத்தைத் தீர்மானிக்க வேண்டாம்!

ச. சிவயோகநாதன்
தலைவர்,
கிழக்கு மாகாண சிவில் சமூக செயற்பாட்டாளர்கள் ஒன்றியம்.