துபாயில் மூன்று ஆண்டுகளுக்கும் மேலாகத் தங்கியிருக்கும் ஒரு பெண்ணும் அவரது குழந்தையும், உதவி கோரி சமூக வலைதளங்களில் வெளியிட்ட வீடியோவைத் தொடர்ந்து, இது குறித்து முறையான விசாரணை ஆரம்பிக்கப்பட்டுள்ளதாக வெளிநாட்டு அலுவல்கள் பிரதி அமைச்சர் அருண் ஹேமச்சந்திர செவ்வாய்க்கிழமை உறுதிப்படுத்தினார்.
தன்னை மீண்டும் நாட்டிற்கு அழைத்துச் செல்லுமாறு ஜனாதிபதி மற்றும் வெளிநாட்டு அமைச்சரிடம் அந்தப் பெண் பேஸ்புக் (Facebook) மூலம் நேரடியாக வேண்டுகோள் விடுத்திருந்தார்.
அந்தப் பெண் வெளியிட்டுள்ள பதிவில் கூறியிருப்பதாவது:
“மாரடைப்பு காரணமாக நீண்ட காலம் மருத்துவமனையில் அனுமதிக்கப்பட்டிருந்த எனது கணவர் உயிரிழந்ததையடுத்து, என்னால் ஐக்கிய அரபு அமீரகத்தை விட்டு வெளியேற முடியவில்லை. செலுத்தப்படாத மருத்துவக் கட்டணங்கள் காரணமாக, துபாய் மருத்துவமனை ஒன்று எனது கடவுச்சீட்டை (Passport) சுமார் மூன்று ஆண்டுகளாகத் தடுத்து வைத்துள்ளது. இதனால் எனக்கும் எனது குழந்தைக்கும் செல்லுபடியாகும் பயண ஆவணங்கள் இல்லாமல் போய்விட்டன.”
மேலும், தனது பெயரில் பெறப்பட்ட தங்குமிடத்திற்கான வாடகைக் காசோலைகளை (Post-dated checks) தன்னால் தற்போது செலுத்த முடியாததால், சட்ட ரீதியான மற்றும் நிதி ரீதியான சிக்கல்களையும் எதிர்கொள்வதாக அவர் குறிப்பிட்டுள்ளார்.
“தற்போது எனக்கு சட்ட ரீதியான பிரச்சினைகளும் உள்ளன, ஏனெனில் எனது பெயரில் தங்குமிடத்தைப் பெற்றிருந்தேன்… அந்தப் பணத்தைச் செலுத்த என்னிடம் வழியில்லை. இப்போதும் என்னிடம் தீர்வு எதுவுமில்லை… அத்துடன் எனக்கும் எனது குழந்தைக்கும் செல்லுபடியாகும் விசாக்கள் இல்லை, அதனால் எங்கும் வேலை பெறவும் முடியவில்லை” என்று அவர் அந்தப் பதிவில் தெரிவித்துள்ளார்.
தான் அரசாங்கத்திடம் நிதி இழப்பீடு எதையும் கோரவில்லை என்றும், தனது தாய்நாட்டிற்குத் திரும்புவதற்குத் தேவையான உதவியை மட்டுமே எதிர்பார்ப்பதாகவும் அவர் வலியுறுத்தியுள்ளார்.
இது குறித்து செய்தியாளர்களிடம் பேசிய பிரதி அமைச்சர் அருண் ஹேமச்சந்திர, தான் அந்தப் பெண்ணுடன் தனிப்பட்ட முறையில் பேசியதாகவும், அவர் தற்போது இலங்கைத் தூதரகத்தில் முறையான வாக்குமூலத்தை அளித்துள்ளதாகவும் தெரிவித்தார்.
“எனது அலுவலகம், அபுதாபியில் உள்ள எமது தூதரகம் மற்றும் ஐக்கிய அரபு அமீரக அதிகாரிகளுடன் நெருக்கமாக இணைந்து இந்தப் பிரச்சினையைக் கையாண்டு வருகிறது. முறையான அதிகாரப்பூர்வ வழிமுறைகள் மூலம் அவரையும் குழந்தையையும் மீண்டும் நாட்டிற்கு அழைத்து வரத் தேவையான ஏற்பாடுகள் செய்யப்பட்டு வருகின்றன” என்று பிரதி அமைச்சர் கூறினார்.
இருப்பினும், நிலுவையில் உள்ள நிதி கோரிக்கைகள் மற்றும் சட்டப் பொறுப்புகள் குறித்து அதிகாரிகள் தற்போது மீளாய்வு செய்து வருவதாகவும், அவர்கள் நாடு திரும்புவதற்கான குறிப்பிட்ட காலக்கெடு இன்னும் நிர்ணயிக்கப்படவில்லை என்றும் அவர் மேலும் தெரிவித்தார்.
