சர்வதேச வான்வழிப் போக்குவரத்து சங்கம் (IATA), 2025 ஆம் ஆண்டிற்கான முழுமையான மற்றும் டிசம்பர் மாதத்திற்கான பயணிகள் சந்தை புள்ளிவிவரங்களை வெளியிட்டுள்ளது. இது முன்னெப்போதும் இல்லாத அளவிலான மிக உயர்ந்த தேவையைக் காட்டுகிறது.
2025 ஆம் ஆண்டின் ஒட்டுமொத்த செயல்திறன்: 2025 ஆம் ஆண்டின் மொத்த ஆண்டுத் தேவை (வருவாய் பயணிகள் கிலோமீட்டர் அல்லது RPK மூலம் அளவிடப்படுகிறது) 2024 ஆம் ஆண்டுடன் ஒப்பிடுகையில் 5.3% அதிகரித்துள்ளது. கிடைக்கும் இருக்கை கிலோமீட்டர் (ASK) மூலம் அளவிடப்படும் மொத்தத் திறன், 2025 இல் 5.2% உயர்ந்துள்ளது. ஒட்டுமொத்த பயணிகள் சுமை காரணி (PLF) 83.6% ஐ எட்டியது. இது முந்தைய ஆண்டை விட 0.1 சதவீதப் புள்ளி அதிகமாகும் என்பதுடன், முழு ஆண்டு போக்குவரத்தில் இது ஒரு புதிய சாதனையாகும்.
சர்வதேச மற்றும் உள்நாட்டு போக்குவரத்து:
-
சர்வதேச போக்குவரத்து: 2025 ஆம் ஆண்டின் சர்வதேசத் தேவை 2024 உடன் ஒப்பிடும்போது 7.1% அதிகரித்துள்ளது, மேலும் திறன் 6.8% உயர்ந்துள்ளது. முழு ஆண்டு சர்வதேச சுமை காரணி 83.5% ஆக இருந்தது, இது 2024 ஐ விட 0.2 சதவீதப் புள்ளி அதிகமாகும். இது சர்வதேச சுமை காரணியில் (PLF) எட்டப்பட்ட மிக உயர்ந்த சாதனையாகும்.
-
உள்நாட்டு போக்குவரத்து: 2025 ஆம் ஆண்டிற்கான உள்நாட்டுத் தேவை முந்தைய ஆண்டை விட 2.4% அதிகரித்துள்ளது, அதே சமயம் திறன் 2.5% விரிவடைந்தது. முழு ஆண்டுக்கான சுமை காரணி சராசரியாக 83.7% ஆக இருந்தது (இது 2024 உடன் ஒப்பிடும்போது -0.1 சதவீதப் புள்ளி குறைவாகும்).
டிசம்பர் 2025 நிலவரம்: 2025 டிசம்பர் மாதம் ஆண்டின் வலுவான முடிவாக அமைந்தது. ஒட்டுமொத்த தேவை ஆண்டுக்கு ஆண்டு 5.6% ஆகவும், திறன் 5.9% ஆகவும் உயர்ந்தது. சுமை காரணி 83.7% ஆக பதிவானது.
முக்கிய சவால்கள் மற்றும் கொள்கை மாற்றங்கள்
“2025 ஆம் ஆண்டில் விமானப் பயணங்களுக்கான தேவை 5.3% வளர்ச்சியடைந்தது. இதில் சர்வதேசத் தேவை 7.1% ஆகவும், உள்நாட்டுத் தேவை 2.4% ஆகவும் இருந்தது. இது கோவிட் பெருந்தொற்றுக்குப் பிந்தைய அதீத மீட்சிக்குப் பிறகு, இத்துறை மீண்டும் அதன் வரலாற்று வளர்ச்சிப் பாதையை நோக்கித் திரும்புவதைக் காட்டுகிறது. இந்த வலுவான மற்றும் தொடர்ச்சியான வளர்ச்சி, இரண்டு முக்கிய சவால்களைத் தீவிரமாகக் கவனிக்க வேண்டிய நிலைக்குத் தள்ளியுள்ளது: கார்பன் வெளியேற்றத்தைக் குறைத்தல் (Decarbonization) மற்றும் விநியோகச் சங்கிலி (Supply Chain).”
“இதில் முதலாவதான கார்பன் வெளியேற்றத்தைக் குறைத்தல் என்பது, எதிர்கால நீண்ட கால வளர்ச்சியைப் பாதுகாக்கும். விமானப் போக்குவரத்துத் துறையால் பொருளாதாரம் வளரும் நாடுகளும், இணைப்பை (Connectivity) விரும்பும் குடிமக்களைக் கொண்ட நாடுகளும் இதற்கு ஆதரவாக இருக்க வேண்டும். குறிப்பாக, எரிசக்தித் துறையில் நிலையான விமான எரிபொருள் (Sustainable Aviation Fuel – SAF) உற்பத்தியை வேகமாக அதிகரிக்க, அரசாங்கங்கள் ஆதரவான நிதிக் கொள்கை கட்டமைப்பை வழங்க வேண்டும்,
“இரண்டாவதாக, விநியோகச் சங்கிலி சவால்கள் (Supply chain challenges), 2025 ஆம் ஆண்டில் விமான நிறுவனங்களுக்கு மிகப்பெரிய தலைவலியாக அமைந்தன. மக்கள் தெளிவாக அதிகளவில் பயணம் செய்ய விரும்பினர், ஆனால் புதிய விமானங்கள் மற்றும் இயந்திரங்களின் (engines) நம்பகத்தன்மையற்ற விநியோக அட்டவணைகள், பராமரிப்புத் திறன் குறைபாடுகள் மற்றும் அதன் விளைவாக ஏற்பட்ட செலவு அதிகரிப்பு ஆகியவற்றால் விமான நிறுவனங்கள் தொடர்ச்சியான ஏமாற்றத்தையே சந்தித்தன. இந்தச் செலவு அதிகரிப்பு 11 பில்லியன் டாலருக்கும் அதிகமாக இருக்கும் என மதிப்பிடப்பட்டுள்ளது.
விமான நிறுவனங்கள் இந்தப் பயணத் தேவையைச் சமாளிப்பதற்காக, பழைய விமானங்களை நீண்ட காலம் சேவையில் வைத்திருந்தும், ஒவ்வொரு விமானத்திலும் கூடுதல் இருக்கைகளை நிரப்பியும் போராடினார். பயணிகள் சுமை காரணி (load factor) கிட்டத்தட்ட 84% ஆக இருந்ததிலிருந்து, இந்த நடவடிக்கைகள் ஒரு தற்காலிகத் தீர்வாக (band aid) இருந்தன என்பது தெளிவாகிறது, ஆனால் எமக்கு ஒரு நிரந்தரத் தீர்வே தேவை.
2025 ஆம் ஆண்டு விநியோகச் சங்கிலி நெருக்கடியின் மிக மோசமான ஆண்டாகவும் (nadir), 2026 ஆம் ஆண்டு அதிலிருந்து மீண்டு வரும் ஆண்டாகவும் அமைய வேண்டியது அவசியமாகும். ஒவ்வொரு புதிய விமானமும் சத்தமற்ற, தூய்மையான மற்றும் அதிக கொள்ளளவு கொண்ட பயண விருப்பங்களை வழங்கும்—இதுவே விமான நிறுவனங்களும் அவர்களது வாடிக்கையாளர்களும் எதிர்பார்க்கும் ஒன்றாகும்,” என்று ஐஏடிஏ (IATA) அமைப்பின் பணிப்பாளர் நாயகம் வில்லி வால்ஷ் (Willie Walsh) தெரிவித்தார்.
சர்வதேசப் பயணிகள் சந்தை
2024 ஆம் ஆண்டுடன் ஒப்பிடுகையில், 2025 இல் முழு ஆண்டு சர்வதேசப் போக்குவரத்து 7.1% அதிகரித்துள்ளது, அதே சமயம் அதன் கொள்ளளவு (Capacity) 6.8% உயர்ந்துள்ளது. டிசம்பர் மாதத்தைப் பொறுத்தவரை, சர்வதேசத் தேவை 7.7% வளர்ந்தது, கொள்ளளவு 7.9% அதிகரித்தது; எனினும், பயணிகள் சுமை காரணி (Load factor) 2024 டிசம்பருடன் ஒப்பிடுகையில் 0.1% குறைந்து 83.9% ஆகக் காணப்பட்டது.
-
ஆசிய-பசிபிக் விமான நிறுவனங்கள்: 2024 ஆம் ஆண்டுடன் ஒப்பிடுகையில், 2025 முழு ஆண்டு சர்வதேசப் போக்குவரத்தில் 10.9% உயர்வைப் பதிவு செய்துள்ளன. கொள்ளளவு 10.2% அதிகரித்ததுடன், சுமை காரணி 0.5% உயர்ந்து 84.4% ஐ எட்டியது. மற்ற அனைத்து பிராந்தியங்களையும் விட, 2025 ஆம் ஆண்டை மிக வேகமான வளர்ச்சி விகிதத்துடனும், அதிகப்படியான சுமை காரணியுடனும் இப்பிராந்தியம் நிறைவு செய்தது. டிசம்பர் 2025 இல் போக்குவரத்து, 2024 டிசம்பருடன் ஒப்பிடுகையில் 7.5% அதிகரித்துள்ளது.
-
ஐரோப்பிய விமான நிறுவனங்கள்: 2024 உடன் ஒப்பிடுகையில், முழு ஆண்டு போக்குவரத்து 6.0% உயர்ந்துள்ளது. கொள்ளளவு 5.9% அதிகரித்ததுடன், சுமை காரணி 0.1% உயர்ந்து 84.1% ஆக இருந்தது. டிசம்பர் மாதத்தில், 2024 இன் அதே மாதத்துடன் ஒப்பிடும்போது தேவை 8.4% அதிகரித்துள்ளது
-
மத்திய கிழக்கு விமான நிறுவனங்கள்: 2024 உடன் ஒப்பிடுகையில், 2025 இல் போக்குவரத்து 6.7% அதிகரித்துள்ளது. கொள்ளளவு (Capacity) 5.8% உயர்ந்ததுடன், சுமை காரணி (Load factor) 0.7 சதவீதம் உயர்ந்து 81.6% ஆக இருந்தது. டிசம்பர் மாதத் தேவை, 2024 இன் இதே மாதத்துடன் ஒப்பிடுகையில் 9.5% அதிகரித்துள்ளது.
-
வட அமெரிக்க விமான நிறுவனங்கள்: 2024 உடன் ஒப்பிடும்போது 2025 இல் ஆண்டு போக்குவரத்து 2.1% உயர்ந்துள்ளதாகப் பதிவாகியுள்ளது. கொள்ளளவு 2.4% அதிகரித்தது, ஆனால் சுமை காரணி 0.2 சதவீதம் குறைந்து 83.9% ஆக இருந்தது. 2025 ஆம் ஆண்டில் அனைத்து பிராந்தியங்களிலும் போக்குவரத்து மற்றும் கொள்ளளவு வளர்ச்சியில் மிகக் குறைந்த வேகத்தைப் பதிவு செய்த பிராந்தியம் இதுவாகும். டிசம்பர் 2025 போக்குவரத்து முந்தைய ஆண்டை விட 3.5% அதிகரித்தது.
-
லத்தீன் அமெரிக்க விமான நிறுவனங்கள்: 2024 முழு ஆண்டுடன் ஒப்பிடுகையில், 2025 இல் 8.6% போக்குவரத்து வளர்ச்சியைப் பதிவு செய்துள்ளன. ஆண்டு கொள்ளளவு 10.2% உயர்ந்தது, ஆனால் சுமை காரணி 1.2 சதவீதம் குறைந்து 83.6% ஆனது (இது அனைத்து பிராந்தியங்களிலும் பதிவான மிகக் கடுமையான சுமை காரணி வீழ்ச்சியாகும்). டிசம்பர் மாதத் தேவை, 2024 டிசம்பருடன் ஒப்பிடுகையில் 8.2% அதிகரித்துள்ளது.
-
ஆப்பிரிக்க விமான நிறுவனங்கள்: முந்தைய ஆண்டுடன் ஒப்பிடுகையில், 2025 இல் ஆண்டு போக்குவரத்து 7.8% உயர்ந்துள்ளது. முழு ஆண்டு கொள்ளளவு 6.5% அதிகரித்ததுடன், சுமை காரணி 0.9 சதவீதம் உயர்ந்து 74.9% ஆக இருந்தது. இது மற்ற பிராந்தியங்களுடன் ஒப்பிடுகையில் மிகக் குறைந்த சுமை காரணியாக இருந்தாலும், ஆப்பிரிக்காவைப் பொறுத்தவரை இது ஒரு சாதனை அளவாகும்; மேலும் அனைத்து பிராந்தியங்களிலும் பதிவான வலுவான சுமை காரணி உயர்வும் இதுவேயாகும். டிசம்பர் 2025 இல் ஆப்பிரிக்க விமான நிறுவனங்களின் போக்குவரத்து, 2024 டிசம்பரை விட 10.3% அதிகரித்துள்ளது.
