நாங்கள் டெல் அவிவ் நகரின் எல்லைப்பகுதியில் இருந்தபோது, சரியாக நாங்கள் காரில் உள்ளே நுழையும் வேளையில் எச்சரிக்கை சைரன்கள் ஒலிக்கத் தொடங்கின.
எங்களுக்கு முன்னால் தாக்குதல் நடந்த இடத்தைப் பார்க்க முடிகிறது; ஒரு சில கார்கள் முற்றிலும் அழிக்கப்பட்டுள்ளன, தீப்பற்றி எரிந்து கொண்டிருக்கிறது, மேலும் இங்குள்ள மக்களிடையே ஒருவித பீதி நிலவுகிறது.
தங்களுக்குத் தெரிந்தவர்கள் எவருக்காவது காயம் ஏற்பட்டுள்ளதா என்பதை அறிய ஏராளமான மக்கள் அந்தப் பகுதியை நோக்கி ஓடி வருகிறார்கள். இது மக்கள் அதிகம் வசிக்கக்கூடிய ஒரு குடியிருப்புப் பகுதியாகும்.
ஈரானின் பெரும்பாலான ஏவுகணைகள் சுட்டு வீழ்த்தப்படுகின்றன, ஆனால் சில ஏவுகணைகள் தப்பித்து உள்ளே வருகின்றன.
இந்த ஏவுகணைகளில் சில வானத்திலேயே உடைந்து ‘கிளஸ்டர் பாம்’ (cluster bombs) எனப்படும் சிறிய குண்டுகளாக மாறுகின்றன. இவை கீழே விழும்போது பெரிய அளவிலான சேதத்தை ஏற்படுத்தாவிட்டாலும், இவை உயிருக்கு ஆபத்தானவை.
சவுதி அரேபியாவின் தலைநகருக்கு அருகிலுள்ள அல்-கர்ஜ் (Al-Kharj) பகுதியில் அமைந்துள்ள சவுதி அரேபியாவின் பிரின்ஸ் சுல்தான் விமானப்படை தளம் (PSAB), ஈரான் நடத்திய தொடர்ச்சியான ஏவுகணை மற்றும் ட்ரோன் தாக்குதல்களுக்கு உள்ளாகியுள்ளது.
இந்த விமானப்படை தளம் ஏராளமான அமெரிக்கப் போர் விமானங்களின் தளமாக விளங்குகிறது. ரியாத் மற்றும் கிழக்கு மாகாணப் பகுதிகளில் குறைந்தது 10 ட்ரோன்களை தாங்கள் இடைமறித்து அழித்துள்ளதாக சவுதி பாதுகாப்பு அமைச்சகம் தெரிவித்துள்ளது.
ஈரானின் ஃபார்ஸ் (Fars) செய்தி நிறுவனம், இந்தத் தளத்தின் மீது தாங்கள் ஏவுகணைகளை ஏவித் தாக்கியுள்ளதாகத் தெரிவித்துள்ளது.
