வாகன இறக்குமதிக்கு அரசாங்கம் புதிதாக விதித்துள்ள 50% கூடுதல் கட்டணம் (Surcharge) காரணமாக, வாகனங்களின் விலைகள் குறைந்தது 1.5 மில்லியன் ரூபாய் (15 லட்சம் ரூபாய்) வரை அதிகரிக்கும் என்றும், இதனால் நுகர்வோர் வாகனங்களை வாங்கும் திறன் மேலும் மோசமடையும் என்றும் இலங்கை வாகன இறக்குமதியாளர்கள் சங்கம் (VIASL) எச்சரித்துள்ளது.
வர்த்தமானி மூலம் அறிவிக்கப்பட்டுள்ள இந்த கூடுதல் கட்டணமானது, ஏற்கனவே நடைமுறையிலுள்ள சுங்க வரிகள் மற்றும் அண்மைய வெளிநாட்டு நாணய மாற்று விகித உயர்வுகளுக்கு மேலதிகமாக விதிக்கப்பட்டுள்ளதாக இலங்கை வாகன இறக்குமதியாளர்கள் சங்கத்தின் ஊடகப் பேச்சாளர் அரோஷ ரொட்ரிகோ ஊடகங்களிடம் தெரிவித்தார்.
“எவராலும் வாங்க முடியாத அளவிற்கு வாகனங்களின் விலைகள் உயர்ந்து வருகின்றன. இதற்கு மேல் விதிக்கப்பட்டுள்ள புதிய கூடுதல் கட்டணமானது வாகன இறக்குமதியாளர்களால் தாங்கிக்கொள்ள முடியாத ஒன்றாகும். பல வாகனங்களின் விலைகள் 1.5 மில்லியன் முதல் 2.5 மில்லியன் ரூபாய் வரை அதிகரிக்கும்” என்று ரொட்ரிகோ கூறினார்.
தனிப்பட்ட முறையில் இறக்குமதி செய்யப்படும் வாகனங்கள் அல்லது முகவர்கள் (Dealerships) மூலம் விற்பனை செய்யப்படும் வாகனங்கள் என அனைத்து வாகனங்களுக்குமான சுங்க வரி இந்த கூடுதல் கட்டணம் காரணமாக அதிகரிக்கும் என்று அவர் விளக்கினார். “நிச்சயமாக, வாகனங்களின் விலையில் குறைந்தபட்சம் 1.5 மில்லியன் ரூபாய் அதிகரிப்பு இருக்கும். ஆனால் இது வாகனத்திற்கு வாகனம் மாறுபடும்” என்றும் அவர் மேலும் கூறினார்.
மே 15ஆம் தேதிக்கு முன்னர் கடன் கடிதங்களை (Letters of Credit – LC) ஏற்கனவே திறந்தவர்களுக்கு இந்த கூடுதல் கட்டணத்திலிருந்து விலக்கு அளிக்கப்படும் என்றும், இருப்பினும் அமெரிக்க டாலர் மற்றும் ஜப்பானிய யென் ஆகியவற்றின் மதிப்பு உயர்வு காரணமாக அவர்கள் இன்னும் அதிக செலவுகளை எதிர்கொள்ள வேண்டியிருக்கும் என்றும் ரொட்ரிகோ குறிப்பிட்டார்.
இந்த கூடுதல் கட்டணம், நாணய மதிப்பு இறக்கங்கள் மற்றும் அண்மையில் சமூக பாதுகாப்பு பங்களிப்பு வரி (Social Security Contribution Levy – SSCL) 2.5% ஆக உயர்த்தப்பட்டமை ஆகியவற்றின் கூட்டுத் தாக்கம் காரணமாக சந்தையில் வாகனங்களின் விலைகள் கணிசமாக உயரும் என்று இலங்கை வாகன இறக்குமதியாளர்கள் சங்கம் (VIASL) எச்சரித்துள்ளது.
