இந்தத் தாக்குதலுக்கான காரணம் என்னவென்று இன்னும் தெளிவாகத் தெரியவில்லை என காவல்துறை தெரிவிப்பு.
வடக்கு ஜெர்மனியில் நடந்த துப்பாக்கிச் சூட்டுச் சம்பவத்தில் ஐந்து பெரியவர்கள் (Adults) கொல்லப்பட்டுள்ளதாகக் காவல்துறை தெரிவித்துள்ளது.
ஜெர்மனிய காவல்துறையின் ஊடகப் பேச்சாளர் ஒருவர் கூறுகையில், வடக்கு ஜெர்மனியின் ஸ்டேட் (Stade) நகரில் உள்ள இளைஞர் மையம் (Youth centre) ஒன்றில் செவ்வாய்க்கிழமை இந்தத் துப்பாக்கிச் சூடு நடத்தப்பட்டதாகவும், தாக்குதலுக்கான நோக்கம் இன்னும் தெளிவாகத் தெரியவில்லை என்றும் குறிப்பிட்டார்.
இச்சம்பவம் தொடர்பாக, துப்பாக்கிச் சூடு நடத்தியதாகச் சந்தேகிக்கப்படும் நபர் உட்பட இரண்டு பேர் கைது செய்யப்பட்டுள்ளதாகக் காவல்துறை ‘தி இன்டிபென்டென்ட்’ (The Independent) ஊடகத்திற்குத் தெரிவித்துள்ளது.
இந்தத் தாக்குதலுடன் தொடர்புடைய வேறு யாரையும் தற்போதைக்குத் தேடவில்லை என்றும், பொதுமக்களுக்கு இனி எந்தவொரு ஆபத்தும் இல்லை என்று தாங்கள் நம்புவதாகவும் அவர்கள் மேலும் கூறியுள்ளனர்.
லூன்பெர்க் (Lüneburg) காவல் துறை தனது சமூக ஊடகப் பதிவொன்றில்: “ஸ்டேட் (Stade) நகரில் தற்போது காவல்துறையின் விசேட நடவடிக்கை ஒன்று முன்னெடுக்கப்பட்டு வருகிறது. எனவே, அப்பகுதியை முழுமையாகத் தவிர்த்துக் கொள்ளுங்கள்!” எனக் குறிப்பிட்டுள்ளது.
ஸ்டேட் (Stade) என்பது வடக்கு ஜெர்மனியில் உள்ள ஹாம்பர்க் (Hamburg) நகரின் மேற்கே அமைந்துள்ள 50,000 மக்கள் தொகையைக் கொண்ட ஒரு நகரமாகும்.
ஜெர்மனிய காவல்துறை தங்களின் உத்தியோகபூர்வ வாட்ஸ்அப் (WhatsApp) குழுவில் வெளியிட்டுள்ள பதிவில்: “ஸ்டேட் நகரின் டான்கர்ஸ்ஸ்ட்ராஸ் (Dankersstraße) வீதியில் தற்போது ஒரு பெரிய அளவிலான காவல்துறை நடவடிக்கை முன்னெடுக்கப்பட்டு வருகின்றது.
உங்களின் சொந்தப் பாதுகாப்பு கருதி அப்பகுதியிலிருந்து வெளியேறுமாறும், அந்த இடத்திற்குச் செல்வதைத் தவிர்க்குமாறும் கேட்டுக்கொள்கிறோம்.
சம்பவ இடத்தில் இருக்கும் அவசரக்கால மீட்புப் பணியாளர்களின் அறிவுறுத்தல்களைப் பின்பற்றுங்கள்” என்று தெரிவித்துள்ளது
