டிரம்பின் உத்தரவு கிடைத்தால் ஈரான் மீது உக்கிரமான பெரும் தாக்குதல்நடத்த அமெரிக்கா திட்டம்

CNN

அமெரிக்க ஜனாதிபதி டொனால்ட் டிரம்பிடம் இருந்து உத்தரவு கிடைத்த 96 மணி நேரத்திற்குள், ஈரானுக்கு எதிராகப் புதிதாக, சாத்தியமான பெரிய அளவிலான இராணுவ நடவடிக்கைகளைத் தொடங்குவதற்கு மத்திய கிழக்கில் உள்ள அமெரிக்கப் படைகள் தயார் நிலையில் இருப்பதாக இரண்டு அமெரிக்க அதிகாரிகள் தெரிவித்துள்ளனர்.

சாத்தியமான தாக்குதல்களை நடத்துவதற்குப் போதுமான படைகள் தற்போது அப்பகுதியில் குவிக்கப்பட்டுள்ளதாக அந்த வட்டாரங்கள் தெரிவித்தன. ஈரானின் ரேடார்கள், ஏவுகணை செலுத்தும் தளங்கள் மற்றும் விரைவாகச் சீரமைக்கப்படக்கூடிய பிற இராணுவ  வளங்கள்மீது தாக்குதல் நடத்தித் தற்போதைய நிலையைக் தக்கவைக்கும் வழக்கமான நடவடிக்கைகளைத் தாண்டி, புதிய அமெரிக்க இராணுவ நடவடிக்கைகளின் வீச்சு மிக விரிவானதாக இருக்கும் என்று அதிகாரிகள் மேலும் தெரிவித்தனர்.

“இது ஒரு மிகப்பெரிய முயற்சியாக இருக்கும்” என்று அதிகாரி ஒருவர் சிஎன்என் (CNN) ஊடகத்திற்குத் தெரிவித்தார். உள்நாட்டு இராணுவத் திட்டமிடல் விவாதங்களை அறிந்த தற்போதைய மற்றும் முன்னாள் அமெரிக்க அதிகாரிகளாலும் இந்த கருத்து எதிரொலிக்கப்பட்டுள்ளது. டிரம்ப் தாக்குதலுக்கான உத்தரவைப் பிறப்பிப்பாரா இல்லையா என்பதை விட, அது எப்போது நடக்கும் என்பதே கேள்வியாக உள்ளது என அவர்களில் சிலர் கூறுகின்றனர். அமெரிக்க இடைக்காலத் தேர்தலுக்குப் பிறகு, இந்த ஆண்டின் இறுதிக்குள் எப்போது வேண்டுமானாலும் இந்த உத்தரவு வரலாம் என்று அவர்கள் நம்புகிறார்கள்.

சவால்களை ஒப்புக்கொள்ளும் அமெரிக்க அதிகாரிகள்; சாத்தியமான அச்சுறுத்தல்களைச் சுட்டிக்காட்டுகின்றனர்

ஈரானியப் படைகள் இப்போது அமெரிக்க உத்திகளை நன்கு அறிந்து வைத்துள்ளதால், இலக்கு வைக்கப்பட்ட அனைத்துப் பகுதிகளையும் திறம்பட அழிப்பது அமெரிக்க இராணுவத்திற்குக் கடினமாக இருக்கும். இருப்பினும், அமெரிக்க மத்திய கட்டளை (CENTCOM) மற்றும் பென்டகன் தலைவர்கள் ஈரானின் எரிசக்தி உள்கட்டமைப்பு, இராணுவ தளங்கள் மற்றும் அணுசக்தி வசதிகளை உள்ளடக்கிய விரிவான இலக்கு பட்டியலை உருவாக்கியுள்ளனர்.

இடைக்காலத் தேர்தலுக்குப் பிறகு என்ன செய்வது என்பது குறித்து டிரம்ப் இன்னும் இறுதி முடிவு எடுக்கவில்லை என்றாலும், அவர் பெரிய அளவிலான நடவடிக்கையை எடுப்பதற்கே அதிக விருப்பத்துடன் இருப்பதாக அதிகாரிகள் கூறுகின்றனர். இருப்பினும், டிரம்ப் கடந்த காலத்தில் சில நடவடிக்கைகளை நோக்கிச் செல்வது போல் தோன்றி, கடைசி நேரத்தில் பின்வாங்கியதையும் அதிகாரிகள் சுட்டிக்காட்டுகின்றனர்.

இதற்குப் பதிலளிக்க வெள்ளை மாளிகை மறுத்துவிட்டது.

பென்டகனின் மூத்த அதிகாரி ஒருவர் சிஎன்என் ஊடகத்திற்கு அளித்த அறிக்கையில், “பாதுகாப்புத் துறை என்பது திட்டமிடும் ஒரு அமைப்பாகும். ஜனாதிபதி உத்தரவிடும் இராணுவ விருப்பங்களை உருவாக்குவதும் அதைச் செயல்படுத்துவதுமே அதன் பணியாகும்” என்று தெரிவித்துள்ளார்.

சமீபத்திய அமெரிக்க உளவுத்துறை மதிப்பீடுகளின்படி, அமெரிக்கா மற்றும் சாத்தியமான இஸ்ரேலின் புதுப்பிக்கப்பட்ட தாக்குதல்களுக்கான சாத்தியக்கூறுகளை ஈரானும் ஹூதி கிளர்ச்சியாளர்களும் மிகவும் தீவிரமாக எடுத்துக்கொண்டுள்ளதாக இது தொடர்பாக அறிந்த மேலும் இரண்டு வட்டாரங்கள் தெரிவித்துள்ளன.

அமெரிக்காவும் இஸ்ரேலும் ஈரானுக்கு எதிராகப் புதிய இராணுவ நடவடிக்கைகளைத் தொடங்கினால், பிராந்தியத்திலும் அதற்கு அப்பாலும் உள்ள அமெரிக்கப் பணியாளர்கள் மற்றும் வசதிகளை இலக்கு வைத்து டெஹ்ரானும் ஹூதிகளும் உடனடியாகப் பதிலடி கொடுப்பார்கள் என்று அந்த வட்டாரங்கள் தெரிவித்தன.

தேசிய உளவுத்துறையின் இயக்குநர் ஜே கிளேட்டன், வெளியுறவுச் செயலாளர் மார்கோ ரூபியோவுக்கு அனுப்பிய அக்டோபர் 23 தேதியிட்ட ரகசியமற்ற குறிப்பில், “அமெரிக்கப் பணியாளர்களை இலக்கு வைப்பதற்கான முயற்சிகளை ஈரான் கணிசமாக அதிகரித்துள்ளது” மற்றும் சதித்திட்டங்கள் “மத்திய கிழக்கு மற்றும் சில பிற நாடுகளில் முன்னேறிய நிலையை எட்டியுள்ளன” என்று அமெரிக்க உளவுத்துறை கண்டறிந்துள்ளதாக சிஎன்என் முன்னதாக செய்தி வெளியிட்டிருந்தது.

இந்தக் கட்டத்தில் அமெரிக்கப் பணியாளர்கள் அல்லது இஸ்ரேலுக்கு எதிராக ஈரானும் ஹூதிகளும் தன்னிச்சையாகத் தாக்குதல்களை நடத்த வாய்ப்பில்லை என்றும், ஆனால் அமெரிக்க அல்லது இஸ்ரேலிய படைகளால் ஈரான் முதலில் தாக்கப்பட்டால் பதிலடி கொடுக்கத் தயங்க மாட்டார்கள் என்றும் அமெரிக்க உளவுத்துறை அதிகாரிகள் நம்புகின்றனர்.

ஆனால், ஈரான் மற்றும் ஹூதிகளால் ஏற்படும் பிராந்திய அச்சுறுத்தலே, வரவிருக்கும் நாட்களில் மத்திய கிழக்கு முழுவதும் உள்ள தனது தூதரகங்களில் இருந்து அமெரிக்கப் பணியாளர்களை அமைதியாகத் திரும்பப் பெறுவதைத் தொடரும் என எதிர்பார்க்கப்படுவதற்கான ஒரு காரணமாகும்.

சவூதி அரேபியாவின் ரியாத்தில் உள்ள அமெரிக்கத் தூதரகம் மட்டுமே பணியாளர்களை வெளியேற உத்தரவிடப்பட்ட ஒரே அமெரிக்க இராஜதந்திர மையமாக இருக்கும் நிலையில், பிற தூதரகங்களுக்கும் இதேபோன்ற வழிமுறைகள் கிடைக்கும் என்றும், உத்தரவு பெறாத தூதரகங்களின் பணியாளர்களின் எண்ணிக்கை குறைக்கப்படும் என்றும் வட்டாரங்கள் தெரிவிக்கின்றன.

கூடுதலாக, அடுத்த படைப் பரிமாற்றத்தின் ஒரு பகுதியாக மத்திய கிழக்கிற்கு அனுப்பப்படவிருந்த அவசியமற்ற அமெரிக்க இராணுவப் பணியாளர்கள் இனி அனுப்பப்பட மாட்டார்கள் என்று தெரிவிக்கப்பட்டுள்ளது. இது பிராந்தியத்தில் தீவிரமடையும் மோதல் சாத்தியக்கூறை அடிக்கோடிட்டுக் காட்டுகிறது.

மத்திய கட்டளையின் (CENTCOM) தளபதி அட்மிரல் பிராட் கூப்பர் ஞாயிற்றுக்கிழமை  விஜயம்ஹோர்முஸ்நீரிணைக்கு விஜயம் மேற்கொண்டார். அமெரிக்க இராணுவம் ஈரானிய துறைமுகங்கள் மீதான முற்றுகையைப் பராமரித்து வரும் அதே வேளையில், முக்கியமான கடல் வழியே செல்லும் கப்பல் போக்குவரத்திற்கும் உதவி வருகிறது.

நீரிணையை ஹெலிகாப்டரில் சுற்றிப் பார்த்த கூப்பர், “தற்போதைய செயல்பாட்டுச் சூழலைக் அவதானித்தார்” என்றும்,  ஈரானிய கண்ணிவெடிகளை அகற்றிய படைவீரர்களை அவர் சந்தித்ததாகவும் CENTCOM தெரிவித்துள்ளது.

“நாங்கள் எங்கள் வளைகுடா பங்காளிகள் மற்றும் கப்பல் துறையுடன் தோளோடு தோள் நின்று தொடர்ந்து செயல்படுகிறோம்” என்று கூப்பர் ஒரு செய்திக்குறிப்பில் தெரிவித்துள்ளார். “இந்த விஜயம்ஹோர்முஸ்நீரிணை வழியிலான தொடர்ச்சியான  போக்குவரத்து சுதந்திரத்திற்கான எங்கள் வலுவான அர்ப்பணிப்பை உறுதிப்படுத்துகிறது.”

ஹோர்முஸ்நீரிணையைக் கடக்கும்  கப்பல்களின் எண்ணிக்கை அதிகரித்துள்ள போதிலும், ஈரானியத் தாக்குதல்கள் பற்றிய அச்சுறுத்தல் காரணமாக கச்சா எண்ணெய் விலைகள் உயர்வாகவே உள்ளன. ஜலசந்தியைச் சுற்றியுள்ள தற்போதைய நிலைமை நீண்ட காலத்திற்கு “நிலையானது அல்ல” என்பதை அமெரிக்க அதிகாரி ஒருவர் ஒப்புக்கொண்டார். மேலும், கடைசி நேர இராஜதந்திர திருப்புமுனை ஏற்படாவிட்டால், மோதலை முடிவுக்குக் கொண்டுவருவதற்கான பரந்த உத்தி வெள்ளை மாளிகையிடம் உள்ளதா என்ற கேள்விகள் இருந்தாலும், டிரம்ப் இராணுவ நடவடிக்கையைத் தேர்ந்தெடுப்பதற்கு இதுவும் ஒரு காரணமாகும்.

மேலதிகத் தாக்குதல்களுக்கு அழுத்தம் கொடுக்கும் இஸ்ரேல்

இஸ்ரேலிய பிரதமர் பெஞ்சமின் நெதன்யாகு ஈரானுக்கு எதிராகப் புதிய தாக்குதல்களை நடத்த அழுத்தம் கொடுத்து வருகிறார். ஆனால் டிரம்ப் நிர்வாகம் கூட்டு நடவடிக்கைகளை நடத்தத் தயாராகும் வரை காத்திருக்குமாறு அமெரிக்க அதிகாரிகள் அவரிடம் கேட்டுக்கொண்டுள்ளதாக இரண்டு அமெரிக்க அதிகாரிகளும் இஸ்ரேலிய பாதுகாப்பு வட்டாரமும் தெரிவித்துள்ளன.

“தேர்தலுக்கு முன்னதாக ஈரானில் கூட்டுத் தாக்குதல் நடத்துவதற்கு நெதன்யாகு உண்மையில் விரும்பினார் மற்றும் டிரம்பை சமாதானப்படுத்த முயன்றார், ஆனால் டிரம்ப் அதற்குப் பச்சைக்கொடி காட்டவில்லை” என்று இஸ்ரேலிய பாதுகாப்பு வட்டாரம் சிஎன்என் ஊடகத்திடம் தெரிவித்தது. எனினும், பிரதமரின் அலுவலகம் இது “போலியான செய்தி” என்று கூறியுள்ளது.

டிரம்ப் இதை நிராகரித்ததற்கு ஒரு காரணம், இஸ்ரேலிய பாதுகாப்புப் படைச் தலைமை அதிகாரி இயால் ஜமீர், கூட்டுப் படைத் தலைவர் ஜெனரல் டான் கெயினிடம், இது இஸ்ரேலில் நடக்கும் தேர்தலைப் பாதிக்கும் என்றும் அதை ஒத்திவைக்க வழிவகுக்கும் என்றும் கூறியதாகும்.

செவ்வாய்க்கிழமை நடைபெறவிருந்த வாக்கெடுப்பிற்கு 48 மணி நேரத்திற்கும் குறைவான நேரத்திற்கு முன்பாக ஜமீருக்கும் நெதன்யாகுவிற்கும் இடையே “முன்னெப்போதும் இல்லாத” மோதல் ஏற்பட்டதாக இஸ்ரேலின் சேனல் 12 நியூஸ் ஞாயிற்றுக்கிழமை செய்தி வெளியிட்டது. அந்த அறிக்கையின்படி, ஈரான் தொடர்பாக அரசியல் தலைமையிடமிருந்து ஜமீர் ஒரு வழிகாட்டுதலைப் பெற்றார். ஆனால் அதைச் செயல்படுத்துவதற்கு முன் ஆழமான விவாதம் மற்றும் சட்டபூர்வமான அனுமதிகளை அவர் கோரினார். அந்த நடவடிக்கை உடனடி மோதலைத் தூண்டக்கூடிய தவறான கணக்கீட்டிற்கு வழிவகுக்கும் என்று அவர் அஞ்சினார்.

பாதுகாப்பு அமைச்சர் இஸ்ரேல் காட்ஸ், இந்த அறிக்கை “முற்றிலும் ஆதாரமற்றது மற்றும் பொய்யானது” என்று கூறினார்.

கடந்த வாரத்தில் ஈரானுக்கு எதிராக மேலதிகத் தாக்குதல்களை நடத்துவதற்கான சாத்தியக்கூறுகளுக்கு இஸ்ரேல் தயாராகி வந்ததுடன், அந்த புதிய தாக்குதல்களுக்கு ஆதரவளிக்குமாறு அமெரிக்க அதிகாரிகளிடம் வலியுறுத்தி வந்தது. ஆனால் டிரம்ப் உட்பட மூத்த அமெரிக்க அதிகாரிகள் இஸ்ரேலை சற்று பொறுத்திருக்குமாறு கூறியுள்ளனர். மாறாக இரு நாடுகளும் விரைவில் கூட்டு நடவடிக்கைகளைத் தொடங்கும் என்று சுட்டிக்காட்டினர்.

இஸ்ரேல் உடனடி மேலதிகத் தாக்குதல்களுக்கான திட்டங்களை தற்காலிகமாக ஒத்திவைத்துள்ளதாகத் தெரிகிறது. ஆனால் அமெரிக்காவுடன் இணைந்து சாத்தியமான கூட்டு நடவடிக்கைகளுக்காகத் தயாராகி வருகிறது. இது அமெரிக்க இடைக்காலத் தேர்தலுக்குப் பிறகு நடக்க வாய்ப்புள்ளது.

ஏவுகணைப் பாதுகாப்பிற்கு அமெரிக்காவின் ஆதரவு தேவைப்படுவதாலும் இஸ்ரேல் ஈரான மீதான புதிய தாக்குதல்களை ஒத்திவைக்க ஒப்புக்கொண்டதாகத் தெரிகிறது. ஈரானும் ஹூதிகளும் தாக்குதலுக்குப் பதிலடி கொடுக்க வாய்ப்புள்ளதுடன், போரின் போது இஸ்ரேலின் தற்காப்பு வெடிமருந்துகளின் இருப்பு குறைந்துள்ளது.

நெதன்யாகு மற்றும் அவரது கூட்டாளிகளுக்கு ஏதோவொரு “முன்னேற்றத்தை” காட்டுவதையும் ஈரானிய ஆட்சியின் வலிமையைக் குறைப்பதையும் தாண்டி தெளிவான உத்திப்பூர்வ நோக்கம் எதுவும் இன்னும் இல்லை என்று சமீபத்திய அமெரிக்க உளவுத்துறை மதிப்பீடுகள் குறிப்பிடுகின்றன.

ஈரானில் உள்ள ஆட்சியை வீழ்த்துவதே ஐடிஎஃப் (IDF), மொசாத் மற்றும் பிற பாதுகாப்புப் பிரிவுகளுக்குத் தான் இட்ட கட்டளை என்று இந்த வாரம் நடைபெற்ற இராணுவ அதிகாரி பட்டமளிப்பு விழாவில் நெதன்யாகு பேசும்போது குறிப்பிட்டிருந்தார்.

“திட்டங்கள் தயாராக உள்ளன, டிரம்பின் ஒப்புதலுக்காகக் காத்திருக்கின்றன, இது இடைக்காலத் தேர்தலுக்குப் பிறகு இருக்கலாம்” என்று அந்த வட்டாரம் சிஎன்என் ஊடகத்திற்குத் தெரிவித்துள்ளது.