அநுராதபுரம் மற்றும் குருநாகல் மாவட்டங்களில்இயற்கை அனர்த்தத்தினால் முழுமையாக சேதமடைந்த வீடுகளுக்கு இழப்பீடு வழங்குதல் மற்றும் புதிய வீடுகளை அமைக்கும் திட்டங்கள் ஜனவரி 9 ஆம் திகதி அநுராதபுரம் மற்றும் குருநாகல் மாவட்டங்களில் ஆரம்பிக்கப்படும் என ஜனாதிபதி அனுரகுமாரதிசநாயக்க தெரிவித்துள்ளார்.
நாடாளுமன்றக் கட்டடத்தில் இன்று (07) நடைபெற்ற நிதி, திட்டமிடல் மற்றும் பொருளாதார அபிவிருத்தி தொடர்பான அமைச்சுகளின் ஆலோசனைக் குழு கூட்டத்தில் கலந்துகொண்டு உரையாற்றும் போதே ஜனாதிபதி இதனைத் தெரிவித்தார்.
கூட்டத்தின் முக்கிய அம்சங்கள்:
-
‘டிட்வா’ (Ditwah) சூறாவளி நிவாரணம்: டிட்வா சூறாவளியினால் பாதிக்கப்பட்ட மக்களுக்கான மீள்குடியேற்றம் மற்றும் பயிர்ச் சேதங்களுக்கான இழப்பீடு வழங்கும் தற்போதைய நிலை குறித்து விரிவாகக் கலந்துரையாடப்பட்டது.
-
பயிர்ச் சேத இழப்பீடு: துல்லியமான தரவுகள் மற்றும் சரிபார்க்கப்பட்ட புள்ளிவிவரங்களின் அடிப்படையில் விவசாயிகளுக்கு விரைவாக இழப்பீடு வழங்குமாறு விவசாயத் திணைக்களம் மற்றும் விவசாயச் சேவைகள் திணைக்களத்திற்கு ஜனாதிபதி உத்தரவிட்டுள்ளார்.
-
சிறு மற்றும் நடுத்தர தொழில்முயற்சியாளர்கள் (SME): பாதிக்கப்பட்ட தொழிலதிபர்களுக்கான கடன் திட்டங்கள் குறித்து வங்கிகளுடன் இணைந்து விழிப்புணர்வு நிகழ்ச்சிகளை நடத்துவதன் அவசியத்தை ஜனாதிபதி வலியுறுத்தினார்.
-
பதிவு செய்யப்படாத வணிகங்கள்: தேசிய பொருளாதாரத்திற்கு பங்களிக்கும் அனைத்து வணிகங்களையும் பதிவு செய்வதன் முக்கியத்துவத்தை சுட்டிக்காட்டிய ஜனாதிபதி, அனர்த்தத்தினால் பாதிக்கப்பட்ட பதிவு செய்யப்படாத சிறு வணிகர்களுக்கும் நிவாரணம் வழங்க அரசாங்கம் பரிசீலித்து வருவதாகவும், இது தொடர்பான அறிக்கைகளை சமர்ப்பிக்குமாறு மாவட்டச் செயலாளர்களுக்கு அறிவுறுத்தப்பட்டுள்ளதாகவும் தெரிவித்தார்.
-
அபிவிருத்தி இலக்குகள்: அபிவிருத்தித் திட்டங்களுக்காக ஒதுக்கப்படும் நிதியை வினைத்திறனாகப் பயன்படுத்த வேண்டும் என்றும், தவறினால் நிர்ணயிக்கப்பட்ட காலக்கெடுவுக்குள் இலக்குகளை அடைய முடியாது என்றும் அவர் எச்சரித்தார்.
வாழ்வாதார மேம்பாடு: பாதிக்கப்பட்ட மக்களின் வாழ்வாதாரத்தை அனர்த்தத்திற்கு முந்தைய நிலைக்கு கொண்டு வருவது மட்டும் இலக்கல்ல, மாறாக அவர்களின் வாழ்க்கைத்தரத்தை முன்னரை விட உயர் மட்டத்திற்கு உயர்த்துவதே அரசாங்கத்தின் நோக்கம் என ஜனாதிபதி இதன்போது உறுதியளித்தார்.
