கடன் திருப்பிச் செலுத்துதல் குறித்து இலங்கை, ஆஸ்திரேலியா தொடர்ந்து பேச்சுவார்த்தை

அண்மையில் 2.5 மில்லியன் அமெரிக்கடொலர் நிதி மோசடி செய்யப்பட்ட போதிலும், இலங்கையின் ஒட்டுமொத்த வெளிநாட்டுக் கடன் மறுசீரமைப்பு மற்றும் வழமைக்குக் கொண்டு வரும் முயற்சிகள் எவ்வித மேலதிகப் பிரச்சினைகளும் இன்றி சுமுகமாக முன்னோக்கி நகர்ந்து வருவதாக நிதி அமைச்சின் வட்டாரங்கள் உறுதிப்படுத்தியுள்ளன.

நிதியமைச்சும் அதன் கடன் மறுசீரமைப்பு ஆலோசனைக் குழுவும், இந்தத் திசைதிருப்பப்பட்ட நிதிக்கான கணக்கியல் நடைமுறைகளைக் கையாள்வது குறித்து ‘எக்ஸ்போர்ட் ஃபைனான்ஸ் ஆஸ்திரேலியா’ (Export Finance Australia) நிறுவனத்துடன் தொடர் பேச்சுவார்த்தைகளில் ஈடுபட்டுள்ளன. 42.5 மில்லியன்டொலர் மொத்தத் தொகையில், 22.9 மில்லியன் டொலர் தவணைப் பணத்தைப் பெற வேண்டிய நிறுவனம் இதுவாகும். நாட்டின் இறையாண்மை கடன் தரமதிப்பீட்டிற்கு (Sovereign Credit) எவ்வித பாதிப்பும் ஏற்படாத வகையில் இதனைத் தீர்ப்பதே இப்பேச்சுவார்த்தையின் நோக்கமாகும்.

அரசாங்கம் தனது கட்டணத்தைச் செலுத்தும் கடப்பாட்டை உரிய நேரத்தில், சரியான நோக்குடன் நிறைவேற்றியுள்ளதால், திருடப்பட்ட 2.5 மில்லியன் டொலர் தொகையானது நாட்டின் கடன் தவணவத் தவறியதாகவோ (Default) அல்லது புதிய வெளிநாட்டுக் கடன் நிலுவையாகவோ கருதப்பட முடியாது என அரசாங்கம் உத்தியோகபூர்வமாகத் தெரிவித்துள்ளது.

சர்வதேச நாணய நிதியத்தின் (IMF) அண்மைய நாட்டு அறிக்கையின்படி, பௌதீக அல்லது டிஜிட்டல் உள்கட்டமைப்புகள் மீதான இணையத் தாக்குதல்கள், தொழில்நுட்பக் கோளாறுகள் அல்லது செயற்கை நுண்ணறிவு (AI) தொழில்நுட்பங்களின் தவறான பயன்பாடு போன்ற காரணங்களால் முக்கியமான உள்கட்டமைப்புகளுக்கு இடையூறுகள் ஏற்படலாம் என எச்சரிக்கப்பட்டுள்ளது.

ஆஸ்திரேலிய அரசாங்கத்திற்குச் செலுத்த வேண்டிய 2.5 மில்லியன் டொலர் வெளிநாட்டுக் கடன் தொகை, இணையக் குற்றச் சம்பவம் (Cybercrime) காரணமாகக் கிடைக்காமல் போனதால், நவம்பர் மாதம் முதல் புதிய வெளிநாட்டுக் கடன் நிலுவைகளுக்கான தொடர்ச்சியான ‘அளவிடக்கூடிய செயல்திறன் அளவுகோல்’ (Quantitative Performance Criterion – QPC) பின்பற்றப்படவில்லை என்று அந்த அறிக்கை சுட்டிக்காட்டியுள்ளது.

நிதி அமைச்சகம் ஜூன் மாத இறுதிக்குள் இதற்கான நிலையான செயல்பாட்டு நடைமுறைகளை (SOP) அமல்படுத்தவுள்ளதுடன், ஆகஸ்ட் மாத இறுதிக்குள் புதிய கடன் மேலாண்மை தகவல் அமைப்பை (Meridien) செயல்பாட்டிற்கு கொண்டு வரவுள்ளது. இந்த ‘மெரிடியன்’ (Meridien) அமைப்பானது, கணக்கு விவரங்கள் மற்றும் செலுத்தப்படும் தொகைகளை மிகவும் துல்லியமாக சரிபார்க்க உதவும்.

பொதுக் கடன் மேலாண்மை அலுவலகத்தின் (PDMO) தரவுகளின்படி, 2026 மார்ச் மாத இறுதியில் அரசாங்கத்தின் வெளிநாட்டுக் கடன் 37.47 பில்லியன் டொலராகக் காணப்பட்டது. இது 2025 ஆம் ஆண்டின் இறுதியுடன் ஒப்பிடுகையில் 195 மில்லியன் டொலர் பெயரளவு (Nominal) குறைவைக் காட்டுகிறது.

இருதரப்புக் கடன் வழங்குநர்களில் (Bilateral Creditors), இலங்கைக்கான மிகப்பெரிய கடன் வழங்குநராக சீனா தொடர்ந்து நீடிக்கிறது. அதன் நிலுவைக் கடன் 4.99 பில்லியன் டொலராக உள்ளது. இதற்கு அடுத்தபடியாக ஜப்பான் 2.31 பில்லியன் டொலரையும், இந்தியா 856 மில்லியன் டொலரையும், கடனாக வழங்கியுள்ளன.

பல்முனை கடன் வழங்குநர்களில் (Multilateral Creditors), ஆசிய அபிவிருத்தி வங்கி (ADB) 6.95 பில்லியன் டொலர் கடன் தொகையுடன் முதலிடத்தில் உள்ளது. உலக வங்கி 4.67 பில்லியன் டொலருடனும், சர்வதேச நாணய நிதியம் (IMF) 1.93 பில்லியன் டொலருடனும் அதற்கு அடுத்தடுத்த இடங்களில் உள்ளன.