பிரித்தானிய வர்த்தகத் தூதுவர் லோர்ட் ஹனெட் இலங்கைக்கு விஜயம்; உயர்நிலை பேச்சுவார்த்தைகள் ஆரம்பம்

இருதரப்பு வர்த்தகம் மற்றும் முதலீட்டு உறவுகளை வலுப்படுத்தும் நோக்கில், இலங்கைக்கான பிரித்தானியாவின் வர்த்தகத் தூதுவர் லோர்ட் ஹனெட் (Lord Hannett of Everton) உத்தியோகபூர்வ விஜயமொன்றை மேற்கொண்டு இன்று (17) கொழும்பு வந்தடைந்துள்ளார்.

கடந்த ஓராண்டு காலப்பகுதிக்குள் அவர் இலங்கைக்கு மேற்கொள்ளும் இரண்டாவது விஜயம் இதுவாகும். ஜூன் 17 முதல் 19 ஆம் திகதி வரை இலங்கையில் தங்கியிருக்கும் அவர், அரசாங்க அமைச்சர்கள், உயர் அதிகாரிகள் மற்றும் வர்த்தக சமூகத்தினரைச் சந்தித்து உயர்நிலை பேச்சுவார்த்தைகளை முன்னெடுக்கவுள்ளார்.

இலங்கை ஏற்றுமதிப் பொருட்களுக்கு இந்த ஆண்டின் தொடக்கத்தில் பிரித்தானியாவினால் வழங்கப்பட்ட மேம்படுத்தப்பட்ட பூஜ்ஜிய-வரிச் சலுகையைத் (Zero-Tariff Access) தொடர்ந்து, இரு நாடுகளுக்கும் இடையிலான வர்த்தகப் பிணைப்பை மேலும் ஆழமாக்குவதே இந்த விஜயத்தின் முக்கிய நோக்கமாகும் என கொழும்பிலுள்ள பிரித்தானிய உயர்ஸ்தானிகராலயம் தெரிவித்துள்ளது.

தனது இந்த விஜயத்தின் போது, கைத்தொழில் மற்றும் தொழில்முனைவோர் அபிவிருத்தி அமைச்சர் சுனில் ஹந்துன்னெத்தி, பிரதி அமைச்சர் சதுரங்க அபேசிங்க மற்றும் ஏற்றுமதி அபிவிருத்திச் சபை (EDB), வர்த்தகத் திணைக்களம் ஆகியவற்றின் சிரேஷ்ட அதிகாரிகளை லோர்ட் ஹனெட் சந்தித்துப் பேசவுள்ளார். இச்சந்திப்புகளில் இலங்கையின் பொருளாதாரச் சீர்திருத்த நிகழ்ச்சி நிரல், பிரித்தானிய நிறுவனங்களுக்கான சந்தை அணுகல் மற்றும் பிரித்தானியாவின் ‘வளரும் நாடுகளுக்கான வர்த்தகத் திட்டம்’ (DCTS) மூலம் இலங்கையின் ஏற்றுமதி வளர்ச்சிக்குக் கிடைத்துள்ள புதிய வாய்ப்புகள் குறித்து ஆராயப்படவுள்ளது.

அரசாங்கத் தரப்புடனான பேச்சுவார்த்தைகளுக்கு மேலாக, ‘பிரிட்டனுடனான வணிகக் குழு’ (Council for Business with Britain) உள்ளிட்ட முன்னணி வணிகத் தலைவர்களைச் சந்தித்து முதலீட்டு நம்பிக்கைகள் குறித்து அவர் கருத்துக்களைப் பரிமாறிக் கொள்ளவுள்ளார். அத்துடன், இலங்கையில் இயங்கி வரும் யுனிலீவர் (Unilever), எச்.எஸ்.பி.சி (HSBC), கோட்ஸ் த்ரெட் எக்ஸ்போர்ட்ஸ் (Coats Thread Exports), அக்சஸ் மோட்டார்ஸினால் நிர்வகிக்கப்படும் லேண்ட் ரோவர் (Land Rover) உலகளாவிய கண்காட்சி மையம், ரைஸ் எனெர்ஜி (Ryse Energy) மற்றும் த பொடி ஷொப் (The Body Shop) போன்ற பிரித்தானிய வர்த்தக நிறுவனங்களுக்கும் அவர் நேரில் விஜயம் செய்யவுள்ளார்.

ஆடைத் துறைப் பிரதிநிதிகள், இலங்கையின் சிறு மற்றும் நடுத்தர அளவிலான (SME) ஏற்றுமதியாளர்கள் மற்றும் இளம் தொழில்முனைவோரையும் அவர் சந்திக்கவுள்ளார். மேலும், இலங்கையின் மனிதவள மேம்பாடு மற்றும் தொழில்வாய்ப்புகளுக்குப் பிரித்தானிய கல்வி நிறுவனங்கள் வழங்கி வரும் பங்களிப்புகள் குறித்து உயர் கல்வித் துறையினருடனும் அவர் கலந்துரையாடவுள்ளார்.

இது குறித்து லோர்ட் ஹனெட் கருத்துத் தெரிவிக்கையில், “வளரும் நாடுகளுக்கான வர்த்தகத் திட்டத்தின் (DCTS) கீழ் பூஜ்ஜிய-வரிச் சலுகைகள் அமலுக்கு வந்துள்ளதால், பிரிட்டனுக்கான ஏற்றுமதியை அதிகரிக்க இலங்கைக்கு ஒரு வலுவான தளம் கிடைத்துள்ளது. இந்த சீர்திருத்தங்கள் மூலம் பெரும் பலனடையவுள்ள ஆடைத் துறை (Apparel Sector) இந்த வாய்ப்பை எவ்வாறு பயன்படுத்துகிறது என்பதை அறிய நான் ஆர்வமாக உள்ளேன். கொள்கை ஸ்திரத்தன்மை மற்றும் ஒழுங்குமுறை வெளிப்படைத்தன்மையை உறுதிப்படுத்துவதன் மூலம் இலங்கை தனது வர்த்தகச் சுமுகத்தன்மையை (Ease of doing business) மேலும் மேம்படுத்த வேண்டும்” எனக் குறிப்பிட்டுள்ளார்