கிளிநொச்சி மாவட்ட பிராந்திய தொழில்துறை மன்ற (Regional Industrial Forum) அங்குரார்பண ஆரம்ப கட்ட கலந்துரையாடல், மாவட்ட அரசாங்க அதிபர் எஸ். முரளிதரன் அவர்களின் தலைமையில், மூன்றாம் நிலை மற்றும் தொழிற்கல்வி ஆணைக்குழுவின் தொழில்துறை தொடர்புகளுக்கான பணிப்பாளர் அனுர வீரக்கோன், மூன்றாம் நிலை மற்றும் தொழிற்கல்வி ஆணைக்குழுவின் உதவிப் பணிப்பாளர் வஜிர பண்டார மற்றும் உதவிப் பணிப்பாளர் W.D. பிரபாத் மதுசங்க ஆகியோரின் பங்குபற்றுதலுடன் இன்றைய தினம் (08.07.2026) காலை 9.00 மணிக்கு மாவட்ட செயலக மாநாட்டு மண்டபத்தில் நடைபெற்றது.
இக் கலந்துரையாடலில் அனைவரையும் வரவேற்று மாவட்ட அரசாங்க அதிபர் கருத்து தெரிவிக்கையில்,
கிளிநொச்சி மாவட்ட தொழில்துறை மன்றமானது 2018 காலப்பகுதியில் ஆரம்பிக்கப்பட்ட போதும், அதன் செயற்பாடுகள் ஸ்தம்பித நிலையிலேயே காணப்பட்டது.
இந் நிலையில் தேசிய ரீதியான தரவுகளை நோக்கும்போது, கிளிநொச்சி மாவட்டத்தின் வேலையின்மை வீதம் மிக அதிகமாக காணப்படுவதாக தெரிவித்த மாவட்ட அரசாங்க அதிபர் அவர்கள், கிளிநொச்சி மாவட்டத்தில் பல்வேறுபட்ட வேலைவாய்ப்பு சந்தர்ப்பங்கள் காணப்படுகின்றன எனத் தெரிவித்தார்.
அதேபோன்று, பாடசாலை கல்வியை பூர்த்தி செய்தவர்கள், பல்கலைக்கழகம் மற்றும் தொழில்நுட்ப கல்லூரிகளில் கற்கைநெறிகளை பூர்த்தி செய்தவர்கள் என பல்வேறுபட்ட திறன்களைக் கொண்டுள்ள இளம்வயதினர் உள்ளனர். எனவே, கிளிநொச்சி மாவட்டத்தில் இந்த தொழில்துறை மன்றம் ஒன்றை உருவாக்குவதன் மூலமாக பல்வேறுபட்ட திறன்களைக் கொண்டுள்ளவர்கள் அவர்களுக்கான சிறப்பான வழிகாட்டுதல்களை பெற்றுக்கொள்ள முடியுமென தெரிவித்தார்.
தொடர்ந்து, மூன்றாம் நிலை மற்றும் தொழிற்கல்வி ஆணைக்குழுவின் செயற்பாடுகள் மற்றும் தொடர்புடைய நிறுவனங்கள் சார்ந்த கட்டமைப்பு விடயங்கள் தொடர்பாக விளக்கமளிக்கப்பட்டது.
தொடர்ந்து, கிளிநொச்சி மாவட்ட தொழில்துறை மன்ற நிர்வாக உறுப்பினர்கள் தெரிவு செய்யப்பட்டு, தொழிற்பாடுகளை முன்கொண்டு செல்வது தொடர்பாக விரிவாக கலந்துரையாடப்பட்டது.
இக்கலந்துரையாடலில் மேலதிக அரசாங்க அதிபர், மேலதிக அரசாங்க அதிபர் (காணி), மாவட்ட செயலக பிரதம பொறியியலாளர், பிரதம உள்ளக கணக்காளர், கணக்காளர், கல்வித்துறை சார்ந்த அதிகாரிகள், மூன்றாம் நிலை மற்றும் தொழிற்கல்வி ஆணைக்குழுவின் தொடர்புடைய திணைக்களத் தலைவர்கள், மாவட்ட திறன் அபிவிருத்தி இணைப்பாளர், மாவட்ட செயலக மற்றும் பிரதேச செயலக துறைசார்ந்த உத்தியோகத்தர்கள் கலந்து கொண்டனர்.
