துபாய் மற்றும் கொழும்பு இடையே எமிரேட்ஸ் (Emirates) நிறுவனம் தனது இரண்டாவது தினசரி A350 விமானச் சேவையை ஆகஸ்ட் 8 முதல் அறிமுகப்படுத்தவுள்ளது. இது பயணிகளுக்கு எமிரேட்ஸின் அதிநவீன புதிய தலைமுறை விமானம் மற்றும் மக்களிடையே பெரும் வரவேற்பைப் பெற்றுள்ள ‘பிரீமியம் எகனாமி’ (Premium Economy) வகுப்பு ஆகியவற்றை அனுபவிப்பதற்கான கூடுதல் வாய்ப்புகளை வழங்கி, அவர்களின் பயண அனுபவத்தை மேலும் மேம்படுத்தும். தற்போது இந்த விமான சேவையில் ஈடுபடுத்தப்பட்டு வரும் போயிங் 777 (Boeing 777) விமானத்திற்குப் பதிலாக இந்த A350 விமானம் மாற்றப்படவுள்ளது.
EK648/649 விமான சேவையில் இந்த கூடுதல் A350 விமானத்தை ஈடுபடுத்துவதன் மூலம் இவ்வழித்தடத்திற்கான பிரீமியம் எகனாமி இருக்கைகளின் எண்ணிக்கை இரட்டிப்பாகும். இது இலங்கைக்கு வரும் மற்றும் இலங்கையிலிருந்து செல்லும் பயணிகளுக்கு மேம்பட்ட வசதிகளை வழங்குவதில் எமிரேட்ஸ் கொண்டுள்ள அர்ப்பணிப்பை மீண்டும் உறுதிப்படுத்துகிறது. எமிரேட்ஸ் நிறுவனம் தற்போது ஏர்பஸ் A350 மற்றும் போயிங் 777 ஆகிய விமானங்களின் கலவையுடன் கொழும்பிற்கு தினசரி நான்கு விமானச் சேவைகளை இயக்கி வருகின்றது.
எமிரேட்ஸின் இரண்டாவது A350 விமான சேவை துபாய் சர்வதேச விமான நிலையத்திலிருந்து தினமும் உள்ளூர் நேரப்படி மாலை 16:10 மணிக்கு புறப்பட்டு, இரவு 22:10 மணிக்கு பண்டாரநாயக்க சர்வதேச விமான நிலையத்தை வந்தடையும். மறுமார்க்கமாக, EK649 விமானம் கொழும்பிலிருந்து அதிகாலை 02:55 மணிக்கு புறப்பட்டு, காலை 05:50 மணிக்கு துபாயைச் சென்றடையும் (அனைத்தும் உள்ளூர் நேரங்கள்).
எமிரேட்ஸின் A350 விமானம் அனைத்து வகுப்புகளிலும் கூடுதல் இடவசதியுடன் கூடிய பிரகாசமான, காற்றோட்டமான அறைகளைக் கொண்டுள்ளதுடன், விமான நிறுவனத்தின் அதிநவீன புதிய அம்சங்களையும் கொண்டுள்ளது. இதில் அதிவேகமாகச் செயல்படும் 4K மற்றும் 4K HDR தொடுதிரை பொழுதுபோக்கு சாதனங்கள், வேகமான வைஃபை (Wi-Fi) வசதி மற்றும் அகலமான நடைபாதைகள் உள்ளிட்ட பல நுணுக்கமான வசதிகள் ஒவ்வொரு வகுப்பிலும் சேர்க்கப்பட்டுள்ளன.
இந்த A350 பயண அனுபவத்தின் மையமாக விளங்குவது எமிரேட்ஸின் விருது பெற்ற ‘பிரீமியம் எகனாமி’ வகுப்பாகும். இது ஏற்கனவே பயணிகளிடையே மிகவும் விரும்பப்படும் ஒன்றாக மாறியுள்ளது. விசாலமான 2-3-2 இருக்கை அமைப்பைக் கொண்ட இவ்வகுப்பில், நேர்த்தியான மரவேலைப்பாடுகளுடன் கூடிய வெளிர் நிற தோல் (cream leather) இருக்கைகள் உள்ளன. ஒவ்வொரு இருக்கையும் 19.5 அங்குல அகலமும், 40 அங்குல இடைவெளியும் (pitch), 8 அங்குலம் பின்னோக்கிச் சாயும் வசதியும், 6 வழிகளில் மாற்றியமைக்கக்கூடிய தலைப்பகுதியையும் (headrest) கொண்டுள்ளது. மேலும், 13.3 அங்குலத் திரை சிறந்த பொழுதுபோக்கு அனுபவத்தை வழங்குகிறது. வரவேற்பு பானம் மற்றும் பருவகால உணவுப் பட்டியல்கள் முதல் பிரத்யேக பயணத் தேவைகள் அடங்கிய கிட் (amenity kit), சுற்றுச்சூழலுக்கு உகந்த முறையில் தயாரிக்கப்பட்ட போர்வை மற்றும் பெரிய அளவிலான தலையணை என பிரீமியம் எகனாமி அனுபவத்தின் ஒவ்வொரு விவரமும் மிகக் கவனமாக வடிவமைக்கப்பட்டுள்ளது. அத்துடன், தரையில் (விமான நிலையத்தில்) பயணிகளுக்கு முன்னுரிமை அடிப்படையிலான போர்டிங் வசதி, துபாய் சர்வதேச விமான நிலையத்தில் பிரத்யேக செக்-இன் பகுதி மற்றும் 35 கிலோ வரையான சாமான்களை எடுத்துச்செல்லும் அனுமதி ஆகியன வழங்கப்படுகின்றன.
எமிரேட்ஸ் நிறுவனம் 2025 மார்ச் மாதத்தில் கொழும்பு வழித்தடத்தில் முதன்முதலாக இந்த A350 விமானத்தை வெற்றிகரமாக அறிமுகப்படுத்தி, இலங்கையில் தனது பிரீமியம் எகனாமி அனுபவத்தைத் தொடங்கியது. அதன் தொடர்ச்சியாகவே இந்த இரண்டாவது தினசரி சேவையும் அமைகிறது. இந்த விரிவாக்க நடவடிக்கை இலங்கை சந்தையில் எமிரேட்ஸ் நிறுவனம் மேற்கொண்டு வரும் தொடர்ச்சியான முதலீட்டை அடிக்கோடிட்டுக் காட்டுகிறது.
எமிரேட்ஸ் நிறுவனம் கொழும்பு-துபாய் வழித்தடத்தில் வெவ்வேறு நேரங்களில் இயங்கும் மூன்று இடைநில்லா (non-stop) தினசரி விமானச் சேவைகளையும், மாலே (Male) ஊடாக பயணிக்கும் ஒரு தினசரி சேவையையும் வழங்குகிறது.
இலங்கையிற்கான தனது விமானச் சேவையின் 40 ஆவது ஆண்டை இந்த வருடம் நிறைவு செய்யும் எமிரேட்ஸ் நிறுவனம், கொழும்பை அதன் உலகளாவிய வலையமைப்பில் உள்ள சுமார் 140 இடங்களுடன் இணைப்பதன் மூலம் சுற்றுலா மற்றும் வர்த்தகத் துறைகளுக்கு ஆதரவளிப்பதோடு, வாடிக்கையாளர்களுக்கு அதன் அடையாளமான “Fly Better” பயண அனுபவத்தையும் வழங்கி வருகிறது.
