பல்வேறு துறைகளிலிருந்து ஓய்வூதிய வயதை திருத்தியமைக்குமாறு விடுக்கப்பட்டுள்ள கோரிக்கைகளை அரசாங்கம் தற்போது பரிசீலித்து வருவதாக சுகாதார மற்றும் ஊடகத்துறை அமைச்சரும், அமைச்சரவை பேச்சாளருமான நளிந்த ஜயதிஸ்ஸ தெரிவித்துள்ளார்.
மினுவாங்கொடை ஆதார வைத்தியசாலையில் (Mirigama Base Hospital) புதிதாக நிறுவப்பட்ட சிறுநீரகக் கல் சிகிச்சை பிரிவின் திறப்பு விழாவில் கலந்துகொண்ட பின்னர், ஊடகங்களுக்கு கருத்து வெளியிட்ட ஜயதிஸ்ஸ, ஓய்வூதிய வயதை நீடிக்குமாறு பல தொழில்முறை குழுக்கள் கோரிக்கைகளை சமர்ப்பித்துள்ளதாகக் குறிப்பிட்டார்.
இந்த மேன்முறையீடுகளை இறுதி முடிவெடுப்பதற்கு முன்னர் அரசாங்கம் கவனமாக பரிசீலிக்கும் என்றும் அவர் கூறினார்.
மேன்முறையீட்டு நீதிமன்றம் (CA), உயர் நீதிமன்றம் (SC) மற்றும் மேல் நீதிமன்றங்களில் (HCs) பணியாற்றும் நீதித்துறை உறுப்பினர்கள் மற்றும் சுகாதாரத் துறையைச் சேர்ந்த சில தொழில் வல்லுநர்கள் உட்பட பல துறைகளிலிருந்து கோரிக்கைகள் வந்துள்ளதாக கஜயதிஸ்ஸ தெரிவித்தார்.
இதேபோன்ற கோரிக்கைகள் சிறைச்சாலைத் திணைக்கள அதிகாரிகளாலும் விடுக்கப்பட்டுள்ளதாக அவர் மேலும் கூறினார்.
“தாங்கள் இன்னும் நீண்ட காலத்திற்கு தங்கள் கடமைகளைத் தொடர்ந்து செய்யக்கூடிய தகுதியுடன் இருப்பதாகக் கூறி, ஓய்வூதிய வயதை அதிகரிக்குமாறு ஏனைய தொழில் வல்லுநர்களும் தங்களது கருத்துக்களைத் தெரிவித்துள்ளனர்” என்று அவர் குறிப்பிட்டார்.
இந்த விடயம் குறித்து பல்வேறுபட்ட கருத்துக்கள் நிலவுவதாகக் குறிப்பிட்ட ஜயதிஸ்ஸ, எவ்வாறாயினும் அரசாங்கம் தற்போது கிடைக்கப் பெற்றுள்ள அனைத்து கோரிக்கைகளையும் பரிசீலித்து வருவதாகவும், கவனமான ஆய்வுக்குப் பின்னர் தகுந்த நடவடிக்கை எடுக்கப்படும் என்றும் வலியுறுத்தினார்.
