இலங்கையின் மிக முக்கிய சுற்றுலா மற்றும் பயணக் கண்காட்சியான ‘சஞ்சாரக உதாவா 2026’ (Sancharaka Udawa 2026) இன் 13ஆவது பதிப்பு, பிரதமர் ஹரினி அமரசூரியவின் தலைமையில் வெள்ளிக்கிழமை (15) கொழும்பு BMICH இல் ஆரம்பித்து வைக்கப்பட்டது.
இலங்கை சுற்றுலாத்துறை (Sri Lanka Tourism) வெளியிட்டுள்ள தகவலின்படி, இந்தத் தொடக்க விழாவானது நாட்டின் சுற்றுலாத்துறை நாட்காட்டியில் ஒரு முக்கிய மைல்கல்லாக அமைந்ததோடு, இரண்டு நாட்கள் நடைபெறும் துடிப்புமிக்க கண்காட்சிகள், தொழில்முறைத் தொடர்புகளை ஏற்படுத்துதல் (Networking) மற்றும் அறிவுப் பகிர்வு ஆகியவற்றிற்கான அடித்தளத்தையும் அமைத்துள்ளது.
இந்த ஆரம்ப விழாவில் பிரதமர் ஹரினி அமரசூரிய முதன்மை விருந்தினராகக் கலந்துகொண்டு சிறப்பித்ததோடு, தொழிலாளர் அமைச்சர் மற்றும் நிதியியல், திட்டமிடல் பிரதி அமைச்சர் அனில் ஜயந்த மற்றும் சுற்றுலாத்துறை பிரதி அமைச்சர் பேராசிரியர் ருவன் ரணசிங்க ஆகியோரும் கலந்துகொண்டனர்.
சுற்றுலா ஊக்குவிப்புப் பணியகத்துடன் (SLTPB) இணைந்து, இலங்கை உள்வரும் சுற்றுலா முகவர்கள் சங்கம் (SLAITO) ஏற்பாடு செய்துள்ள இந்த ‘சஞ்சாரக உதாவா 2026’ கண்காட்சியில், சுற்றுலாத்துறையின் அனைத்துப் பிரிவுகளையும் பிரதிநிதித்துவப்படுத்தும் வகையில் 250 க்கும் மேற்பட்ட கண்காட்சியாளர்களும் 300 க்கும் அதிகமான சாவடிகளும் (Stalls) இடம்பெற்றுள்ளன. முதன்முறையாக, வெளிநாட்டு வர்த்தகக் கொள்வனையாளர்களும் இக்கண்காட்சிக்கு வருகை தந்துள்ளதால், உள்ளூர் சுற்றுலாத்துறை பங்காளிகள் சர்வதேச சந்தைகளுடன் தொடர்புகொள்வதற்கான முன்னோடி இல்லாத வாய்ப்புகள் உருவாக்கப்பட்டுள்ளன.
உள்ளூர் சேவை வழங்குநர்களுக்கான திறன் மேம்பாடு, உள்கட்டமைப்பு வசதிகளை மேம்படுத்துதல் மற்றும் வர்த்தக நாம அங்கீகாரம் (Brand visibility) ஆகியவற்றுக்கான இலங்கை சுற்றுலாத்துறையின் அர்ப்பணிப்பை இந்தத் தொடக்க விழா அடிக்கோடிட்டுக் காட்டியது.
சுற்றுலா தொடர்பான அரசாங்கத் திணைக்களங்களுக்கு இலவச சாவடிகள் வழங்கப்பட்டதுடன், முன்னணிப் பல்கலைக்கழகங்களுடனான பங்களிப்பு மூலம் வலுவான இளைஞர் பங்களிப்பும் கல்வித்துறை சார்ந்த ஈடுபாடும் உறுதி செய்யப்பட்டன. இது சுற்றுலாத்துறையின் எதிர்காலத்தை வடிவமைப்பதில் அடுத்த தலைமுறையினர் தீவிரப் பங்காற்ற வழிவகுத்துள்ளது.
இந்த நிகழ்விற்கு யுனைடெட் மோட்டார்ஸ் (United Motors) மற்றும் அரலிய ஹோட்டல் குழுமம் (Araliya Group of Hotels) ஆகியவை டயமண்ட் அனுசரணையாளர்களாகவும் (Diamond Sponsors), ஹில்டன் கொழும்பு (Hilton Colombo) உத்தியோகபூர்வ உபசரிப்பு பங்காளராகவும், மவுண்ட் லேவினியா ஹோட்டல் (Mount Lavinia Hotel) உணவு வழங்கல் (Catering) பங்காளராகவும் செயற்பட்டன. இவர்களின் பங்களிப்பானது இலங்கையின் விருந்தோம்பல் துறையின் வலிமையையும் ஒற்றுமையையும் வெளிப்படுத்தியது.
வெள்ளிக்கிழமை உத்தியோகபூர்வமாக ஆரம்பித்து வைக்கப்பட்ட இக்கண்காட்சி, வணிகங்களுக்கு இடையிலான சந்திப்புகள் (B2B meetings), குழு விவாதங்கள் மற்றும் கூட்டுழைப்பையும் அறிவுப் பகிர்வையும் வளர்ப்பதற்காக வடிவமைக்கப்பட்ட பயிற்சிப் பட்டறைகளுடன் இன்றைய தினம் (16) வரை தொடர்ந்து நடைபெறுகின்றது.
‘சஞ்சாரக உதாவா 2026’ இன் விளைவாக, பிராந்திய சுற்றுலா சேவை வழங்குநர்களுக்கான முன்பதிவுகளில் (Bookings) கணிசமான அதிகரிப்பு ஏற்படும் என எதிர்பார்ப்பதாக இலங்கை சுற்றுலாத்துறை தெரிவித்துள்ளது. இது இலங்கை ஒரு பன்முகத்தன்மை கொண்ட மற்றும் துடிப்புமிக்க சுற்றுலாத் தளம் என்ற நிலையை மீண்டும் உறுதிப்படுத்துகிறது.
நாட்டின் உலகளாவிய நற்பெயரை உயர்த்தும், தொழில்துறை வளர்ச்சியை ஊக்குவிக்கும் மற்றும் அரசாங்கம், கல்வித்துறை மற்றும் தனியார் பங்காளிகளுக்கு இடையிலான உறவுகளை வலுப்படுத்தும் இத்தகைய வரலாற்றுச் சிறப்புமிக்க நிகழ்வுகளுக்கு தொடர்ந்து ஆதரவளிக்கத் தான் அர்ப்பணிப்புடன் இருப்பதாக இலங்கை சுற்றுலாத்துறை மேலும் குறிப்பிட்டுள்ளது.
