ஊழலே பொருளாதார வீழ்ச்சிக்குக் காரணம்’

அரசு நிறுவனங்களில் நிலவும் ஊழல், நாட்டின் பொருளாதாரத்தைப் பாதிப்பதோடு மட்டுமல்லாமல் அதன் வீழ்ச்சிக்கும் வழிவகுத்துள்ளது என்று கொழும்பு மேல் நீதிமன்ற நீதிபதி முகமது மிஹால் சுட்டிக்காட்டியுள்ளார்.

நான்கு ஊழல் வழக்குகளில் குற்றவாளியாகக் காணப்பட்ட முன்னாள் பிரதி அமைச்சர் சரண குணவர்தனவுக்கு தலா 4 ஆண்டுகள் வீதம், மொத்தம் 16 ஆண்டுகள் கடுங்காவல் சிறைத்தண்டனை விதித்துத் தீர்ப்பளித்த போதே நீதிபதி இவ்வாறு குறிப்பிட்டார்.

72 ஆண்டுகள் தண்டனை 16 ஆண்டுகளாகக் குறைந்தது எப்படி?

முன்னாள் பிரதி அமைச்சர் சரண குணவர்தனவுக்கு எதிராகத் தாக்கல் செய்யப்பட்ட 4 வழக்குகளின் கீழ் உள்ள 18 குற்றச்சாட்டுகளுக்கும் தலா 4 ஆண்டுகள் வீதம் மொத்தம் 72 ஆண்டுகள் கடுங்காவல் சிறைத்தண்டனை விதிக்கப்பட்டது.

இருப்பினும், ஒவ்வொரு வழக்கிற்குமான தண்டனைகளை ஏககாலத்தில் (ஒரே நேரத்தில்) அனுபவிக்க உத்தரவிட்ட நீதிபதி, 4 வழக்குகளுக்கான தண்டனைகளையும் ஒன்றன்பின் ஒன்றாக (தொடர்ச்சியாக) அனுபவிக்க வேண்டும் என உத்தரவிட்டார். இதன் காரணமாக அவர் இறுதித் தீர்ப்பின்படி மொத்தம் 16 ஆண்டுகள் சிறைத்தண்டனையை அனுபவிக்க நேரிடும். அத்துடன் அவருக்கு 18 இலட்சம் ரூபாய் அபராதமும் விதிக்கப்பட்டுள்ளது.

வழக்கின் பின்னணி என்ன?

கடந்த 2006ஆம் ஆண்டு அபிவிருத்தி லொத்தர் சபையின் (Development Lotteries Board) தலைவராகவும், தலைமை நிர்வாக அதிகாரியாகவும் சரண குணவர்தன பணியாற்றிய போது இந்த ஊழல் நடந்துள்ளது.

வெளித்தரப்பு ஒன்றிற்கு சட்டவிரோத லாபம் ஈட்டித் தரும் நோக்கில், வாடகை அடிப்படையில் 3 வாகனங்களைப் பெறுவதற்காக அபிவிருத்தி லொத்தர் சபையின் நிதியிலிருந்து முறையே ரூ. 1.56 மில்லியன், ரூ. 1.521 மில்லியன் மற்றும் ரூ. 960,000 ஆகிய தொகைகளை முன்பணமாக வழங்கியுள்ளார். இதன் மூலம் அரசாங்கத்திற்குப் பாரிய நிதி இழப்பை ஏற்படுத்தியதாகக் குற்றம் சாட்டி, லஞ்ச ஊழல் ஒழிப்பு ஆணைக்குழுவினால் 2022ஆம் ஆண்டு இந்த வழக்குகள் தாக்கல் செய்யப்பட்டன.

நீதிமன்றில் அரசுத் தரப்பு மற்றும் பிரதிவாதி வாதம்

சரண குணவர்தன சார்பில் முன்னிலையான சட்டத்தரணி ரஞ்சன் சில்வா, “பிரதிவாதிக்கு தற்போது 62 வயதாகிறது. அவர் அரசியலில் இருந்து முற்றிலும் ஓய்வு பெற்று வியாபாரத்தில் ஈடுபட்டு வருகிறார். மீண்டும் அரசியலுக்கு வரும் எண்ணம் இல்லை” எனக் கூறி குறைந்தபட்ச தண்டனை வழங்குமாறு கோரினார்.

எனினும், அரசுத் தரப்பில் முன்னிலையான சட்டத்தரணி அசிதா அந்தோனி இதனை வன்மையாக மறுத்து வாதாடினார்:

“அரசு அதிகாரிகளின் இவ்வாறான ஊழல் நடவடிக்கைகளே அண்மைக் காலத்தில் நாடு எதிர்கொண்ட பொருளாதார வீழ்ச்சிக்குக் காரணமாக அமைந்தது. இதனால் மக்கள் எரிவாயுவிற்கும் எரிபொருளுக்கும் வரிசையில் நிற்க வேண்டிய நிலை ஏற்பட்டது. பொதுப் பணத்தைப் பாதுகாக்க வேண்டிய பொறுப்பில் இருந்துகொண்டு இவர் ஊழலை ஊக்குவித்துள்ளார். எனவே, சமூகத்திற்குப் பாடமாக அமையும் வகையில் இவருக்குக் கடுமையான தண்டனை வழங்கப்பட வேண்டும்.”

நீதிபதியின் தீவிரம்

பிரதிவாதி தரப்பு விடுத்த கருணை மனுவை நிராகரித்த மேல் நீதிமன்ற நீதிபதி முகமது மிஹால், அரசு நிறுவனங்களில் நடக்கும் ஊழல்கள் மக்கள் மத்தியில் அந்த நிறுவனங்கள் மீதான நம்பிக்கையைச் சீர்குலைப்பதாகக் கூறினார். எனவே, மற்ற அரசு அதிகாரிகளுக்கு எச்சரிக்கையாக அமையும் வகையிலேயே இந்த 16 ஆண்டு கடுங்காவல் சிறைத்தண்டனை வழங்கப்படுவதாகத் தனது தீர்ப்பில் அவர் திட்டவட்டமாக அறிவித்தார்.