நெல்லுக்கான நியாயமான நிர்ணய விலையை அரசாங்கம் அறிவித்து வழங்க வேண்டும் என வலியுறுத்தி கிளிநொச்சி மாவட்ட விவசாயிகள் இன்றைய தினம் கவனயீர்ப்பு பேரணியொன்றை முன்னெடுத்தனர்.
கிளிநொச்சி நகரிலுள்ள சித்தி விநாயகர் ஆலய முன்றலில் இருந்து ஆரம்பமான பேரணி, கிளிநொச்சி மாவட்ட செயலகம் வரை முன்னெடுக்கப்பட்டது.
பேரணியில் கலந்து கொண்ட விவசாயிகள் தங்களது கோரிக்கைகளை வலியுறுத்தும் பதாகைகள் மற்றும் வாசகங்களை ஏந்தியவாறு கவனயீர்ப்பில் ஈடுபட்டனர்.
இதனைத் தொடர்ந்து, நெல்லுக்கான நிர்ணய விலையை உடனடியாக அறிவித்து நடைமுறைப்படுத்துமாறு கோரி தயாரிக்கப்பட்ட மகஜர், கிளிநொச்சி மாவட்ட அரசாங்க அதிபர் திரு. சுப்பிரமணியம் முரளிதரன் அவர்களிடம் கையளிக்கப்பட்டது.
குறித்த மகஜர் ஜனாதிபதி அவர்களுக்கும் மாவட்ட ஒருங்கிணைப்புக் குழுத் தலைவர், விவசாய அமைச்சர் ஆகியோருக்கு அனுப்பி வைக்குமாறு கிளிநொச்சி மாவட்ட அரசாங்க அதிபர் திரு. சுப்பிரமணியம் முரளிதரன் அவர்களிடம் மகஜர் கையளிக்கப்பட்டது.
நெல் உற்பத்திக்கான செலவுகள் தொடர்ச்சியாக அதிகரித்து வரும் நிலையில், விவசாயிகளின் வாழ்வாதாரத்தை பாதுகாக்கும் வகையில் அரசாங்கம் உரிய நிர்ணய விலையை அறிவிக்க வேண்டும் என போராட்டத்தில் ஈடுபட்ட விவசாயிகள் வலியுறுத்தினர்.
