அமெரிக்காவிற்கான இலங்கையின் தூதுவராகப் பணியாற்றிவிட்டு ஓய்வுபெற்றுத் திரும்பும் மகிந்த சமரசிங்க, இலங்கை ஏற்றுமதிகள் மீது அமெரிக்கா விதித்துள்ள வரிகளைக் குறைப்பது தொடர்பான சாதகமான செய்தி இன்னும் சில தினங்களில் இலங்கைக்குக் கிடைக்கும் என்று தெரிவித்துள்ளார்.
தனது தூதரகப் பணிக்காலம் நிறைவடைவதை முன்னிட்டு, வாஷிங்டனில் உள்ள பௌத்த விகாரை ஒன்றில் ஏற்பாடு செய்யப்பட்டிருந்த விசேட நிகழ்வொன்றில் கலந்துகொண்டு உரையாற்றும் போதே அவர் இந்தத் தகவலை வெளியிட்டார்.
வாஷிங்டனில் தனது சேவைக்காலம் குறித்துக் குறிப்பிட்ட அவர், தற்போதைய அரசாங்கம் தன்னைத் பதவியிலிருந்து விலகுமாறு ஒருபோதும் கேட்கவில்லை என்று சுட்டிக்காட்டினார். தற்போதைய புதிய அரசாங்கம் ஆட்சிக்கு வந்தபோது, கடந்த அரசாங்கத்தால் நியமிக்கப்பட்ட 17 தூதுவர்கள் சேவையில் இருந்ததாகவும், அவர்களில் 16 பேர் தங்களது பணிக்காலம் முடிவடைவதற்கு முன்னரே திருப்பி அழைக்கப்பட்ட நிலையில், தன்னை மட்டும் தொடர்ந்து கடமையாற்றுமாறு அரசாங்கம் கேட்டுக்கொண்டதாகவும் அவர் கூறினார்.
“தற்போதைய அரசாங்கம் என்னை விலகக் கோரவில்லை என்பதை நான் முதலில் கூற வேண்டும். இந்த அரசாங்கம் ஆட்சிக்கு வந்தபோது, கடந்த அரசினால் நியமிக்கப்பட்ட 17 தூதுவர்கள் இருந்தனர். அவர்களில் 16 பேர் பதவிக்காலம் முடிவதற்குள் திருப்பி அழைக்கப்பட்ட போதிலும், என்னை தொடர்ந்து கடமையாற்றுமாறு கேட்டுக்கொண்டனர். நான் இந்த அரசாங்கத்துடன் மிகச் சிறந்த முறையில் இணைந்து பணியாற்றினேன், எந்தவொரு பிரச்சினையும் எழவில்லை” என்று அவர் குறிப்பிட்டார்.
மேலும், அண்மையில் தான் ஜனாதிபதி அநுர குமார திஸாநாயக்கவுடன் தொடர்புகொண்டு, இலங்கை ஏற்றுமதிகள் மீதான அமெரிக்க வரி விகிதங்களை மேலும் குறைக்கும் முயற்சியுடன் தொடர்புடைய வர்த்தமானி அறிவித்தல் ஒன்றில் ஜனாதிபதியின் கையொப்பத்தைப் பெற்றதாக சமரசிங்க வெளிப்படுத்தினார்.
“அந்த வர்த்தமானி அறிவித்தலின் ஊடாக, வரி விகிதத்தை மேலும் குறைக்கும் திட்டத்தின் ஒரு பகுதியாக மிக விரைவில் இலங்கை மக்களுக்கு நல்லதொரு செய்தியை வழங்க முடியும் என எதிர்பார்க்கிறோம். எனது அரசியல் கருத்துக்கள் அல்லது கொள்கைகள் எதுவாக இருந்தாலும், நான் இந்தத் தூதுவர் பதவியை ஏற்ற நாள் முதல் அரசியலில் ஈடுபடவில்லை. நான் யாருக்கும் ஆதரவாகப் பிரச்சாரம் செய்யவில்லை, அரசியல் நடவடிக்கைகளில் என்னை ஈடுபடுத்திக் கொள்ளவும் இல்லை. அதனால்தான் எனது குழுவுடன் இணைந்து தாய்நாட்டிற்காகவும் நாட்டுக்காகவும் என்னால் வெற்றிகரமாகப் பணியாற்ற முடிந்தது,” என்று தூதுவர் தெரிவித்தார்.
முன்னாள் ஜனாதிபதி கோட்டாபய ராஜபக்சவினால், 2021 நவம்பர் 29 அன்று மகிந்த சமரசிங்க அமெரிக்காவிற்கான இலங்கைத் தூதுவராக நியமிக்கப்பட்டார். பின்னர் அவர் டிசம்பர் 1, 2021 அன்று வாஷிங்டனில் உள்ள இலங்கைத் தூதரகத்தில் உத்தியோகபூர்வமாகக் கடமைகளைப் பொறுப்பேற்றார்.
தனது தூதரகப் பணி முடிவடைந்த பின்னர் மீண்டும் தீவிர அரசியலில் ஈடுபடக்கூடும் என்ற யூகங்களுக்குப் பதிலளித்த சமரசிங்க, கட்சி அரசியலுக்குத் திரும்புவதை திட்டவட்டமாக மறுத்துள்ளார்.
“நான் இலங்கைக்குத் திரும்பிய பின்னரும் எனது தாய்நாட்டிற்காகத் தொடர்ந்து பணியாற்றுவேன். அந்த சேவை என்றும் நிறுத்தப்படாது. இன்னும் கூடுதல் அர்ப்பணிப்புடன் நாட்டிற்குச் சேவை செய்வேன், ஆனால் அது அரசியல் மூலம் அல்ல. நான் எந்தவொரு அரசியல் கட்சியிலும் இணைய மாட்டேன். அரசியலில் ஈடுபடாமலேயே நாட்டிற்குச் சேவை செய்ய முடியும்,” என்று அவர் கூறினார்.
இருப்பினும், தேசிய நலன் கருதி தனது நிபுணத்துவமோ அல்லது சேவையோ அரசாங்கத்திற்குத் தேவைப்பட்டால், அதற்கு உதவத் தயாராக இருப்பதாகவும் அவர் மேலும் தெரிவித்தார்.
“இந்த அரசாங்கத்தின் திட்டங்களுக்கு என்னால் பங்களிக்க முடியும் என்று அவர்கள் நம்பி எனது உதவியைக் கோரினால், நாட்டிற்காக அந்தச் சேவையை வழங்க நான் ஒருபோதும் தயங்கமாட்டேன்,” என்றார்.
அத்துடன், தனது வெளியேற்றம் என்பது முற்றிலும் தனது தனிப்பட்ட முடிவே தவிர, அரசாங்கத்தின் எந்தவொரு உத்தரவினாலும் எடுக்கப்பட்டதல்ல என்பதையும் அவர் தெளிவுபடுத்தினார்.
“அரசாங்கம் என்னை ஒருபோதும் நாடு திரும்புமாறு கேட்கவில்லை. உண்மையில், நான் டிசம்பர் மாதம் வரை இப்பதவியில் நீடித்திருக்க முடியும். நான் இன்னும் சில காலம் இருக்க விரும்புகிறேன் என்று கூறியிருந்தால், அவர்களும் அதற்கு மகிழ்ச்சியுடன் அனுமதித்திருப்பார்கள். ஏனென்றால் எங்களுக்குள் எந்தப் பிரச்சினையும் இருந்ததில்லை. நான் எப்போதும் ஒரு நல்ல உறவை பேணி வந்துள்ளேன்,” என்று அவர் மேலும் தெரிவித்தார்.
