மத்திய கிழக்கு விமானச் சேவைகள்: சர்வதேச விமான நிறுவனங்களின் தற்போதைய நிலைவரம்

அமெரிக்கா மற்றும் இஸ்ரேல் தரப்பிலிருந்து ஈரான் மீது நடத்தப்பட்ட தாக்குதல்களைத் தொடர்ந்து வெடித்த போர்ப் பதற்றங்கள் காரணமாக, மத்திய கிழக்கு (மேற்கு ஆசிய) பிராந்தியத்திற்கான விமானச் சேவைகளை சர்வதேச நிறுவனங்கள் பல தற்காலிகமாக நிறுத்தியிருந்தன. தற்போது சில நிறுவனங்கள் தங்களது சேவைகளை படிப்படியாக மீட்டெடுத்து வரும் நிலையிலும், பல முக்கிய விமான நிறுவனங்கள் துபாய், அபுதாபி, ரியாத், தோஹா, பெய்ரூட் மற்றும் டெல் அவிவ் ஆகிய நகரங்களுக்கான சேவைகளை ஆகஸ்ட் அல்லது அக்டோபர் மாதம் வரை பிற்போட்டுள்ளன.

சர்வதேச ஊடக அறிக்கைகளின்படி, முக்கிய சர்வதேச விமான நிறுவனங்களின் தற்போதைய செயல்பாட்டு நிலைவரங்கள் கீழே தரப்பட்டுள்ளன:

இடைநிறுத்தப்பட்ட அல்லது பிற்போடப்பட்ட விமானச் சேவைகள்:

• பிரிட்டிஷ் எயார்வேஸ் (British Airways):

  • தோஹாவுக்கான சேவைகள் ஆகஸ்ட் 1 அன்றும், ரியாத் சேவைகள் ஆகஸ்ட் 8 அன்றும் மீண்டும் ஆரம்பமாகவுள்ளன.

  • துபாய், பஹ்ரைன், அம்மான் மற்றும் டெல் அவிவ் ஆகிய நகரங்களுக்கான சேவைகள் அக்டோபர் 25 வரை இடைநிறுத்தப்பட்டுள்ளன. ஜெத்தாவுக்கான சேவை முற்றாக நிறுத்தப்பட்டுள்ளது.

• லுஃப்தான்சா குரூப் (Lufthansa Group): பிராந்தியத்தில் மிக நீண்ட கால இடைநிறுத்தத்தை இந்த நிறுவனம் அறிவித்துள்ளது.

  • லூஃப்தான்சா மற்றும் சுவிஸ் (SWISS) எயார்லைன்ஸ் நிறுவனங்களின் துபாய் விமானங்கள் செப்டம்பர் 13 வரையும், அபுதாபி, அம்மான், பெய்ரூட், தம்மாம், ரியாத் மற்றும் டெஹ்ரான் ஆகிய நகரங்களுக்கான சேவைகள் அக்டோபர் 24 வரையும் இடைநிறுத்தப்பட்டுள்ளன.

  • பிரஸ்ஸல்ஸ் எயார்லைன்ஸ் (Brussels Airlines) டெல் அவிவ் சேவையை அக்டோபர் 24 வரை நிறுத்தியுள்ளது.

• 

• சிங்கப்பூர் எயார்லைன்ஸ் (Singapore Airlines): சிங்கப்பூர் – துபாய் இடையிலான சேவைகள் அக்டோபர் 24 வரை தற்காலிகமாக நிறுத்தப்பட்டுள்ளன.

• எயார் கனடா (Air Canada): டெல் அவிவ் மற்றும் துபாய் சேவைகள் அக்டோபர் 24 வரை இடைநிறுத்தப்பட்டுள்ளன.

• கதே பசிபிக் (Cathay Pacific): துபாய்க்கான பயணிகள் சேவை அக்டோபர் 25 அன்றும், ரியாத் சேவை அக்டோபர் 26 அன்றும் மீண்டும் தொடங்கப்படவுள்ளன.

• டெல்டா எயார் லைன்ஸ் (Delta Air Lines): நியூயோர்க் – டெல் அவிவ் சேவை செப்டம்பர் 6 இல் மீண்டும் ஆரம்பமாகவுள்ள அதேவேளை, அட்லாண்டா – டெல் அவிவ் சேவை டிசம்பர் 18 வரை பிற்போடப்பட்டுள்ளது. பாஸ்டன் – டெல் அவிவ் சேவை காலவரையறையின்றி ஒத்திவைக்கப்பட்டுள்ளது.

• ஏஜியன் எயார்லைன்ஸ் (Aegean Airlines): துபாய் சேவை ஆகஸ்ட் 31 வரையும், எர்பில் மற்றும் பாக்தாத் சேவைகள் செப்டம்பர் 30 வரையும் நிறுத்தப்பட்டுள்ளன.

• ஏர்பால்டிக் (airBaltic): துபாய் சேவை அக்டோபர் 24 வரை நிறுத்தி வைக்கப்பட்டுள்ளது.

• ஃபின்னையர் (Finnair): தோஹா சேவை அக்டோபர் 2 வரை நிறுத்தப்பட்டுள்ளதுடன், ஈராக், ஈரான், சிரியா மற்றும் இஸ்ரேல் வான்பரப்புகளை இந்நிறுவனம் முற்றாகத் தவிர்த்து வருகிறது.

• ஜப்பான் எயார்லைன்ஸ் (Japan Airlines): டோக்கியோ – தோஹா இடையிலான இருதரப்பு சேவைகளும் ஆகஸ்ட் 31 மற்றும் செப்டம்பர் 1 வரை நிறுத்தப்பட்டுள்ளன.

• விஸ் எயார் (Wizz Air): ஐரோப்பாவிலிருந்து துபாய், அபுதாபி மற்றும் அம்மான் ஆகிய நகரங்களுக்கான சேவைகள் செப்டம்பர் பாதி வரை நிறுத்தி வைக்கப்பட்டுள்ளன.

வழமைக்குத் திரும்பும் பிராந்திய மற்றும் சில சர்வதேச சேவைகள்:

சர்வதேச நிறுவனங்கள் பல பின்வாங்கினாலும், மத்திய கிழக்கு பிராந்தியத்தைச் சேர்ந்த சில முக்கிய நிறுவனங்கள் மாற்று வான்வழிகளைப் பயன்படுத்தித் தங்களது சேவைகளைத் தொடர்ந்து வருகின்றன:

• எமிரேட்ஸ் மற்றும் எதிஹாட் (Emirates & Etihad): துபாயை தளமாகக் கொண்ட எமிரேட்ஸ் மற்றும் அபுதாபியை தளமாகக் கொண்ட எதிஹாட் ஆகியன தங்களது உலகளாவிய விமான வலையமைப்பை அநேகமாக வழமையான அட்டவணையின் படியே இயக்கி வருகின்றன.

• கத்தார் எயார்வேஸ் (Qatar Airways): தோஹாவை தளமாகக் கொண்ட இந்நிறுவனம் ஜூன் மற்றும் ஜூலை மாதங்களில் படிப்படியாகத் தனது சேவைகளை மீளமைத்து, தற்போது உலகளாவிய ரீதியில் 150 க்கும் மேற்பட்ட இலக்குகளுக்கு விமானங்களை இயக்கி வருகிறது.

• எயார் பிரான்ஸ் (Air France): ஏனைய ஐரோப்பிய நிறுவனங்களுடன் ஒப்பிடுகையில் எயார் பிரான்ஸ் ஏற்கனவே ரியாத், டெல் அவிவ் மற்றும் துபாய் ஆகிய நகரங்களுக்கான சேவைகளை ஜூலை தொடக்கத்தில் மீள ஆரம்பித்துள்ளதுடன், பெய்ரூட் சேவையை ஜூலை 21 இல் ஆரம்பிக்கத் திட்டமிட்டுள்ளது.

பயணிகளுக்கான குறிப்பு: தற்போதைய புவிசார் அரசியல் சூழலில் வான்பரப்பு மூடல்கள் மற்றும் பாதுகாப்பு எச்சரிக்கைகள் நாளாந்தம் மாற்றமடையக் கூடியவை என்பதால், பயணிகள் தங்களது பயணங்களை மேற்கொள்ளும் முன்னர் அந்தந்த விமான நிறுவனங்களின் உத்தியோகபூர்வ இணையத்தளங்கள் மூலம் விமான நிலவரங்களை உறுதிப்படுத்துமாறு கேட்டுக்கொள்ளப்படுகிறார்கள்.