சர்வதேச நாணய நிதியத்தின் (IMF) முகாமைத்துவ பணிப்பாளர் கிறிஸ்டலீனா ஜோர்ஜீவா (Kristalina Georgieva) தலைமையிலான உயர்மட்டக் குழுவினர், மூன்று நாள் உத்தியோகபூர்வ விஜயத்தை மேற்கொண்டு இன்று (16) பிற்பகல் இலங்கை வந்தடைந்தனர்.
கட்டுநாயக்க பண்டாரநாயக்க சர்வதேச விமான நிலையத்தில் இக்குழுவினரை தொழிலாளர் அமைச்சரும், நிதி மற்றும் திட்டமிடல் பிரதி அமைச்சருமான கலாநிதி அனில் ஜயந்த பெர்னாண்டோ மற்றும் ஏனைய அதிகாரிகள் வரவேற்றனர்.
‘டிட்வா’ (Ditwah) சூறாவளி ஏற்பட்ட சேதங்களை நேரடியாகப் பார்வையிடுவதற்கும் அதன் பாதிப்புகளை மதிப்பீடு செய்வதற்கும் சர்வதேச நாணய நிதியத்தின் முகாமைத்துவ பணிப்பாளர் மற்றும் அவரது குழுவினர் இலங்கைக்கு வருகை தந்துள்ளனர். இந்த மதிப்பீட்டுப் பயணத்தின் ஒரு பகுதியாக, அவர்கள் நாளை (17) காலை கம்பளைப் பகுதிக்கு விஜயம் செய்யத் திட்டமிட்டுள்ளனர்.
கள ஆய்வைத் தொடர்ந்து, இந்தக் குழுவினர் கொழும்பில் ஜனாதிபதி அனுர குமார திஸாநாயக்க, பிரதமர் கலாநிதி ஹரினி அமரசூரிய மற்றும் மத்திய வங்கி ஆளுநர் கலாநிதி நந்தலால் வீரசிங்க ஆகியோருடன் பேச்சுவார்த்தைகளை நடத்தவுள்ளனர். இந்தப் பேரிடருக்குப் பின்னரான இலங்கையின் மீட்சி முயற்சிகள் மற்றும் அனைத்து இலங்கையர்களுக்கும் வலுவான எதிர்காலத்தை உறுதி செய்வதற்கும், மறுகட்டமைப்பதற்கும் சர்வதேச நாணய நிதியம் வழங்கக்கூடிய ஆதரவுகள் குறித்து இந்தப் பேச்சுவார்த்தைகளில் கவனம் செலுத்தப்படும்.
