இலங்கைக்குள் நுழையும் வெளிநாட்டுத் தொழிலாளர்களுக்கான புதிய கொள்கையை அறிமுகப்படுத்த அரசாங்கம் தீர்மானம்

வெளிநாட்டுத் தொழிலாளர்கள் வேலைவாய்ப்புக்காக இலங்கைக்குள் நுழைவதை முறைப்படுத்துவதை நோக்கமாகக் கொண்டு, நாட்டிற்குள் வரும் வெளிநாட்டுத் தொழிலாளர்களுக்கான கொள்கையொன்றை (Inbound Labour Migration Policy) தயாரிப்பதற்கு அரசாங்கம் தீர்மானித்துள்ளது.

இலங்கை பாரம்பரியமாக தங்களது நாட்டவர்களுக்கான வெளிநாட்டு வேலைவாய்ப்பு வாய்ப்புகளை நிர்வகிப்பதில் மட்டுமே கவனம் செலுத்தி வந்த போதிலும், தற்போது தகுதிவாய்ந்த, அரை-தகுதிவாய்ந்த மற்றும் நிபுணத்துவத் திறன் கொண்ட வெளிநாட்டுத் தொழிலாளர்களைப் பல்வேறு துறைகளில் பணியமர்த்துவதற்கான கோரிக்கைகள் முன்வைக்கப்பட்டு வருவதாக அமைச்சரவை சுட்டிக்காட்டியுள்ளது.

தற்போது, இலங்கைக்குள் நுழையும் வெளிநாட்டுத் தொழிலாளர்களை முறைப்படுத்தும் பணிகள் வெவ்வேறு நிறுவனங்களால் பலதரப்பட்ட நிர்வாக நடைமுறைகளின் ஊடாகக் கையாளப்பட்டு வருகின்றன. இதனால், நாட்டிற்குள் வரும் வெளிநாட்டுத் தொழிலாளர்களை நிர்வகிப்பதற்கு மிகவும் முறையான மற்றும் மையப்படுத்தப்பட்ட அணுகுமுறை அவசியமாக உள்ளதாக அதிகாரிகள் தெரிவித்துள்ளனர்.

முன்மொழியப்பட்டுள்ள இப்புதிய கொள்கையானது, இலங்கைக்குள் நுழையும் வெளிநாட்டுத் தொழிலாளர்களின் சேர்க்கை, வேலைவாய்ப்பு, கண்காணிப்பு, பாதுகாப்பு மற்றும் ஒழுங்குவிதிகள் ஆகியவற்றை உள்ளடக்கிய ஒரு ஒருங்கிணைந்த மற்றும் வெளிப்படையான தேசிய கட்டமைப்பை உருவாக்கும் என எதிர்பார்க்கப்படுகிறது. அத்துடன், இலங்கைத் தொழிலாளர்களுக்குக் கிடைக்கக்கூடிய வேலைவாய்ப்புகளின் பாதுகாப்பை உறுதிப்படுத்தவும் இது வழிவகுக்கும் என எதிர்பார்க்கப்படுகிறது.

இக்கொள்கையை உருவாக்குவதற்கும், அதற்கான வரைவுக் கட்டமைப்பைத் தயாரிப்பதற்காக தொழிலாளர் அமைச்சின் செயலாளரின் தலைமையில் வழிகாட்டல் குழுவொன்றை (Steering Committee) நியமிப்பதற்குமாக தொழிலாளர் அமைச்சரினால் சமர்ப்பிக்கப்பட்ட முன்மொழிவுக்கு அமைச்சரவை அங்கீகாரம் வழங்கியுள்ளது.