அமெரிக்காவின் முன்னணி மென்பொருள் மற்றும் கிளவுட் கம்ப்யூட்டிங் (Cloud computing) நிறுவனமான ஆரக்கிள் (Oracle), செயற்கை நுண்ணறிவு (AI) தொழில்நுட்பத்தை நோக்கித் தனது வணிகத்தை மாற்றி அமைத்து வரும் நிலையில், கடந்த ஓராண்டில் உலகளவில் சுமார் 21,000 ஊழியர்களைப் பணிநீக்கம் செய்துள்ளது. நிறுவனத்தின் சமீபத்திய வருடாந்த அறிக்கை (Annual report) மூலம் இந்த விபரம் வெளிச்சத்திற்கு வந்துள்ளது.
பணிநீக்கத்தின் முக்கிய விபரங்கள்:
-
ஊழியர் எண்ணிக்கை வீழ்ச்சி: கடந்த 2025 ஆம் ஆண்டு மே மாத நிலவரப்படி சுமார் 162,000 ஆக இருந்த ஆரக்கிள் நிறுவனத்தின் முழுநேர ஊழியர்களின் எண்ணிக்கை, 2026 மே 31 நிலவரப்படி சுமார் 141,000 ஆகக் குறைந்துள்ளது. இது ஒட்டுமொத்தப் பணியாளர்களில் 13 சதவீதமாகும்.
-
காரணம்: “எங்கள் செயல்பாடுகளில் ஏஐ (AI) தொழில்நுட்பங்களை உள்வாங்குவது எங்களின் பணியாளர்களின் எண்ணிக்கையில் குறைப்பை ஏற்படுத்தியுள்ளது, இது தொடரவும் கூடும்,” என ஆரக்கிள் தனது வருடாந்த அறிக்கையில் உத்தியோகபூர்வமாகக் குறிப்பிட்டுள்ளது.
-
செலவினங்கள்: இந்த பாரிய பணிநீக்க நடவடிக்கை காரணமாக, கடந்த நிதியாண்டில் ஊழியர்களுக்கான இழப்பீட்டுத் தொகை (Severance payments) மற்றும் மறுசீரமைப்புச் செலவுகளுக்காக (Restructuring costs) ஆரக்கிள் நிறுவனம் சுமார் 1.8 பில்லியன் அமெரிக்க டாலர்களைச் செலவிட்டுள்ளது. இது அதற்கு முந்தைய ஆண்டின் செலவான 374 மில்லியன் டாலரை விடப் பல மடங்கு அதிகமாகும்.
தொழில்நுட்பத்துறையின் பொதுவான போக்கு: தரவு மையங்கள் (Data centres) போன்ற ஏஐ உள்கட்டமைப்புகளை உருவாக்குவதற்காக உலகளாவிய தொழில்நுட்ப நிறுவனங்கள் நூற்றுக்கணக்கான பில்லியன் டாலர்களைச் செலவழித்து வரும் சூழலில், இந்த வேலைவாய்ப்பு இழப்புகள் ஏற்பட்டுள்ளன. கடந்த ஓராண்டில் மட்டும் தொழில்நுட்பத்துறையில் 100,000 க்கும் மேற்பட்ட ஊழியர்கள் பணிநீக்கம் செய்யப்பட்டுள்ளதாக வேலைவாய்ப்பு கண்காணிப்பு நிறுவனங்கள் மதிப்பிட்டுள்ளன.
ஆரக்கிள் நிறுவனம் தற்போது ஓபன்ஏஐ (OpenAI) மற்றும் மெட்டா (Meta) போன்ற ஏஐ மாபெரும் நிறுவனங்களுக்காகத் தரவு மையங்களை அமைக்கும் போட்டியில் தீவிரமாக ஈடுபட்டுள்ளது. இதற்காக இந்த ஆண்டில் மட்டும் குறைந்தது 50 பில்லியன் டாலர்களை உள்கட்டமைப்பிற்காகச் செலவிட அந்நிறுவனம் திட்டமிட்டுள்ளது. உலகின் பெரும் பணக்காரர்களில் ஒருவரும், ஆரக்கிள் நிறுவனத்தின் இணை நிறுவனருமான லாரி எலிசன் (Larry Ellison) இதன் தலைமைத் தொழில்நுட்ப அதிகாரியாக (CTO) செயல்பட்டு வருகிறார்.
இதர நிறுவனங்களின் முதலீடுகளும் பணிநீக்கங்களும்: கூகுள், அமேசான் மற்றும் பேஸ்புக்கின் தாய் நிறுவனமான மெட்டா ஆகிய நிறுவனங்கள் இணைந்து இந்த ஆண்டில் மட்டும் ஏஐ தொழில்நுட்பத்திற்காகச் சுமார் 650 பில்லியன் டாலர்களை முதலீடு செய்யத் திட்டமிட்டுள்ளன.
-
அமேசான் (Amazon): அடுத்த ஓராண்டில் ஏஐ முதலீடுகளுக்காக 200 பில்லியன் டாலர்களைச் செலவிடத் திட்டமிட்டுள்ள அமேசான், பல கட்டங்களாகச் சுமார் 30,000 ஊழியர்களைப் பணிநீக்கம் செய்யவுள்ளதாகவும் அறிவித்துள்ளது. ஏஐ தொழில்நுட்பம் நிறுவனங்களை முன்னெப்போதையும் விட வேகமாகப் புதுமைகளைப் புகுத்த அனுமதிப்பதால், நிறுவனத்தை மிகவும் சுருக்கமான (Lean) கட்டமைப்பிற்குள் கொண்டுவர வேண்டியுள்ளதாக அமேசான் நிர்வாகம் தெரிவித்துள்ளது.
