வறுமை ஒழிப்பு, டிஜிட்டல் நகரங்கள் மற்றும் நிர்வாகம் உள்ளிட்ட துறைகளில் ஒத்துழைப்பை விரிவுபடுத்தும் அதேவேளையில், இலங்கையின் அனைத்து அரசியல் கட்சிகளுடனும் கூட்டாண்மையை வலுப்படுத்த சீனா தனது விருப்பத்தை வெளிப்படுத்தியுள்ளது.
சீன கம்யூனிஸ்ட் கட்சியின் (CPC) 105ஆவது ஆண்டு நிறைவை முன்னிட்டு நடைபெற்ற வரவேற்பு உபசார நிகழ்வில் உரையாற்றிய இலங்கைக்கான சீனத் தூதுவர் கீ ஜென்ஹொங் (Qi Zhenhong), சுதந்திரம், சமத்துவம், பரஸ்பர மரியாதை மற்றும் உள்விவகாரங்களில் தலையிடாமை ஆகிய கொள்கைகளின் அடிப்படையில் இலங்கையின் அரசியல் கட்சிகளுடனான பரிமாற்றங்களை ஆழப்படுத்த சீன கம்யூனிஸ்ட் கட்சி தயாராக இருப்பதாகத் தெரிவித்தார்.
சீன அதிபர் ஷி ஜின்பிங் மற்றும் இலங்கை அதிபர் அனுர குமார திஸாநாயக்க ஆகியோருக்கு இடையில் இடம்பெற்ற வெற்றிகரமான சந்திப்பு, இருதரப்பு உறவுகளுக்கான புதியதொரு வரைபடத்தை உருவாக்கியுள்ளது என்றும் அவர் கூறினார்.
இரு தலைவர்களுக்கும் இடையில் எட்டப்பட்ட உடன்பாடுகளை நடைமுறைப்படுத்தவும், நடைமுறைச் சாத்தியமான ஒத்துழைப்பை வலுப்படுத்தவும், இருநாட்டு மக்களுக்கிடையிலான பரிமாற்றங்களை மேம்படுத்தவும், இருநாடுகளுக்கும் இடையே பகிரப்பட்ட எதிர்காலத்தைக் கொண்ட ஒரு சமூகத்தைக் கட்டியெழுப்புவதை ஊக்குவிக்கவும் இலங்கையுடன் இணைந்து பணியாற்ற சீனா எதிர்பார்ப்பதாகத் தூதுவர் குறிப்பிட்டார்.
சீன கம்யூனிஸ்ட் கட்சியின் கீழ் சீனாவின் வளர்ச்சியை எடுத்துரைத்த தூதுவர் கீ, தனது நாடு தீவிர வறுமையை ஒழித்துள்ளதாகவும், சமூக நலன்புரிப் பாதுகாப்பை விரிவுபடுத்தியுள்ளதாகவும், முக்கிய தொழில்நுட்ப முன்னேற்றங்களை அடைந்துள்ளதாகவும், உலகிலேயே மிகப்பெரிய வர்த்தக நாடு என்ற தனது நிலையைத் தக்கவைத்துக் கொண்டுள்ளதாகவும் தெரிவித்தார்.
அதிபர் ஷி ஜின்பிங்கினால் முன்வைக்கப்பட்ட ‘பட்டுப்பாதை திட்டம்’ (Belt and Road Initiative) மற்றும் ஏனைய உலகளாவிய அபிவிருத்தி மற்றும் பாதுகாப்பு முயற்சிகள் உள்ளிட்ட திட்டங்களின் மூலம் உலகளாவிய அபிவிருத்தி, அமைதி மற்றும் சர்வதேச ஒத்துழைப்பை மேம்படுத்துவதில் சீனாவின் அர்ப்பணிப்பையும் அவர் மீண்டும் உறுதிப்படுத்தினார்.
இந்நிகழ்வில் இலங்கையின் முக்கிய அரசியல் கட்சிகளின் பிரதிநிதிகள், அமைச்சர்கள், நாடாளுமன்ற உறுப்பினர்கள், இராஜதந்திரிகள் மற்றும் ஏனைய முக்கிய பிரமுகர்கள் கலந்துகொண்டனர்.
