அமெரிக்கா 12.5 சதவீத புதிய இறக்குமதி வரியை விதித்ததைத் தொடர்ந்து, கட்டாய உழைப்பை (forced labour) பயன்படுத்தி அகழ்ந்தெடுக்கப்பட்ட, உற்பத்தி செய்யப்பட்ட அல்லது தயாரிக்கப்பட்ட எந்தவொரு பொருட்களையும் இறக்குமதி செய்வதற்கு அரசாங்கம் தடை விதித்துள்ளது.
ஜனாதிபதி அனுரகுமார திஸாநாயக்கவினால் வெள்ளிக்கிழமை கையொப்பமிடப்பட்ட வர்த்தமானி அறிவித்தலின்படி, இறக்குமதி செய்யப்படவுள்ள பொருட்கள் பகுதியாகவோ அல்லது முழுமையாகவோ கட்டாய உழைப்பைப் பயன்படுத்தி தயாரிக்கப்படவில்லை அல்லது அகழ்ந்தெடுக்கப்படவில்லை என்பதை உறுதிப்படுத்துவதற்காக இறக்குமதியாளர்கள் சுங்கப் பணிப்பாளர் நாயகத்திடமிருந்து சான்றளிப்பு ஆவணங்களைப் பெறுவது கட்டாயமாக்கப்பட்டுள்ளது.
கட்டாய உழைப்புடன் உற்பத்தி செய்யப்படும் பொருட்களின் இறக்குமதித் தடையை அமல்படுத்தத் தவறியதன் காரணமாக, அமெரிக்காவினால் புதிய இறக்குமதி வரி விதிக்கப்பட்ட 60 நாடுகளின் பட்டியலில் இலங்கையும் சேர்க்கப்பட்டதைத் தொடர்ந்தே இந்த புதிய ஒழுங்குமுறை நடவடிக்கைகள் வெளியிடப்பட்டுள்ளன. இது தொடர்பான விரிவான அறிக்கை ஒன்று அமெரிக்க வர்த்தகப் பிரதிநிதி அலுவலகத்தினால் (USTR) ஜூன் 2 அன்று வெளியிடப்பட்டது.
கட்டாய உழைப்பு இறக்குமதித் தடையை விதிப்பதிலும் அதனை திறம்பட அமலாக்குவதிலும் இலங்கை தவறியிருப்பது நியாயமற்றது என்றும், அது அமெரிக்க வர்த்தகத்திற்கு சுமையாகவும் அல்லது தடையாகவும் அமைகிறது என்றும் அந்த அறிக்கையில் கண்டறியப்பட்டுள்ளது.
அமெரிக்கா முடிக்கப்பட்ட பருத்தி மற்றும் பருத்தி கலந்த ஜவுளிகள் மற்றும் ஆடைகளைப் பயன்படுத்தும் ஒரு நுகர்வு நாடாக இருப்பதைச் சுட்டிக்காட்டியுள்ள அந்த அறிக்கை, ‘உய்குர் கட்டாய உழைப்பு தடுப்புச் சட்டத்தின்’ (UFLPA) கீழ் வரும் பருத்தியைக் குறிப்பிடுகிறது. வடகொரிய உழைப்பாளர்களைக் கொண்டோ அல்லது சின்ஜியாங் உய்குர் தன்னாட்சிப் பிராந்தியத்திலோ (Xinjiang Uyghur Autonomous Region) முழுமையாகவோ அல்லது பகுதியாகவோ அகழ்ந்தெடுக்கப்பட்ட, உற்பத்தி செய்யப்பட்ட அல்லது தயாரிக்கப்பட்ட பொருட்கள் மற்றும் வர்த்தகப் பொருட்கள் நாட்டிற்குள் நுழைவதை இந்தச் சட்டம் தடை செய்கிறது.
இந்த விசாரணைகளுக்கு உட்பட்ட இலங்கை உள்ளிட்ட பத்து பொருளாதாரங்களில் உள்ள, சீனாவுடன் தொடர்புடைய இடைநிலை உற்பத்தியாளர்கள் (intermediary manufacturers) குறித்த விரிவான ஆய்வு விபரங்களையும் அந்த அறிக்கை உள்ளடக்கியுள்ளது.
