ஸ்ரீலங்கன் எயார்லைன்ஸ் எயார்பஸ் (Airbus) விமானக் கொள்முதல் ஒப்பந்தத்துடன் தொடர்புடைய ஐரோப்பிய விமான நிறுவனம் ஒன்றிடமிருந்து பெறப்பட்ட 2 மில்லியன் அமெரிக்க டொலர் இலஞ்ச சம்பவத்துடன் தொடர்புடைய சந்தேக நபர்கள் மற்றும் சாட்சிகளைக் கண்டறிவதற்காக, இலஞ்ச ஒழிப்பு ஆணைக்குழு மற்றும் குற்றப் புலனாய்வுத் திணைக்களம் (CID) ஆகியவற்றின் கூட்டு சிறப்புப் பொலிஸ் குழுவொன்று அவுஸ்திரேலியாவிற்குப் பயணம் செய்யத் திட்டமிட்டுள்ளதாகத் தெரிவிக்கப்படுகிறது.
இலஞ்சப் பணம் பரிமாற்றம் செய்யப்பட்டதாக நம்பப்படும் வங்கிக் கணக்குகளை வைத்திருந்த அவுஸ்திரேலியாவில் வசிக்கும் நபர்களிடம் வாக்குமூலங்களைப் பதிவு செய்யவும் சான்றுகளைச் சேகரிக்கவும் இந்த விஜயம் இலக்கு வைத்துள்ளதாக ‘லங்கதீப’ பத்திரிகை செய்தி வெளியிட்டுள்ளது.
அத்தகைய ஒரு வங்கிக் கணக்கின் உரிமையாளர் எனக் கூறப்படும் டபிள்யூ.டி. நிமல் பெரேரா என்பவர் அவுஸ்திரேலியாவில் வசித்து வருவதாக இலஞ்ச ஒழிப்பு ஆணைக்குழு முன்னர் நீதிமன்றத்திற்குத் தெரிவித்திருந்தது.
முன்னாள் பிரதம நிறைவேற்று அதிகாரி (CEO) கபில சந்திரசேனவின் மனைவியான பிரியங்கா நயோமலி விஜேநாயக்க மற்றும் முன்னாள் அமைச்சர் சமல் ராஜபக்ஷவின் மகனான ஷமீந்திர ராஜபக்ஷ ஆகியோர் முக்கிய சந்தேக நபர்களில் அடங்குவர்.
இருவரும் தற்போது வெளிநாட்டில் தலைமறைவாக உள்ள நிலையில், கொழும்பு மற்றும் கோட்டை நீதவான் நீதிமன்றங்களால் அவர்களுக்கு எதிராக ஏற்கனவே பிடியாணை பிறப்பிக்கப்பட்டுள்ளது.
கொழும்பு தலைமை நீதவான் நீதிமன்றத்தில் உள்ள வழக்கு இலஞ்ச ஒழிப்பு ஆணைக்குழுவாலும், கோட்டை நீதவான் நீதிமன்ற வழக்கு குற்றப் புலனாய்வுத் திணைக்களத்தாலும் தாக்கல் செய்யப்பட்டுள்ளன.
2013 ஆம் ஆண்டு ஸ்ரீலங்கன் எயார்லைன்ஸ் நிறுவனத்தினால் பத்து விமானங்கள் கொள்முதல் செய்யப்பட்டபோது, புரூணையில் போலியான நிறுவனமொன்றை நிறுவி, ஐரோப்பிய சிவில் விமானப் போக்குவரத்துப் பெருநிறுவனமான ‘European Aeronautic Defence and Space Company’ (ADS) இடமிருந்து EUR 1,454,645.54 (2 மில்லியன் அமெரிக்க டொலர்) லஞ்சமாகப் பெறப்பட்டமை தொடர்பாகவே புலனாய்வு விசாரணைகள் கவனம் செலுத்தி வருகின்றன.
