சமீபத்தியஇயற்கை அனர்த்தங்களில் உயிரிழந்தவர்களின் உடல்களைக் கண்டறிவதற்கும், குடும்பத்தினர் தங்களின் இறுதிச் சடங்குகளைச் செய்வதற்கும் சம்பந்தப்பட்ட நிறுவனங்கள் அனைத்து நடவடிக்கைகளையும் எடுக்க வேண்டும் என்றும், அதே வேளையில் கள யதார்த்தங்களைக் கருத்தில் கொள்ள வேண்டும் என்றும் இலங்கை மனித உரிமைகள் ஆணைக்குழு (HRCSL) தெரிவித்துள்ளது.
இது குறித்துகருத்து தெரிவித்த மனித உரிமைகள் ஆணைக்குழுவின் உறுப்பினர்/ஆணையாளர், சட்டத்தரணி நிமல் ஜி. புஞ்சிஹேவா, உறவினர்களின் இறுதிச் சடங்குகளைச் செய்யும் குடும்பங்களின் உரிமை மதிக்கப்பட வேண்டும் என்றார். அதே வேளையில், சில சூழ்நிலைகள் உடல்களை மீட்கும் பணிகளை மிகவும் கடினமாக்கலாம் என்றும் அவர் குறிப்பிட்டார்.
“பாரிய நிலச்சரிவுகள் ஏற்பட்டு, பெருமளவிலான மண் சரிந்து விழுந்துள்ள சந்தர்ப்பங்களில், முழுப் பகுதியையும் தோண்டுவது நடைமுறைக்குச் சாத்தியமற்றதாகவோ அல்லது இயலாததாகவோ இருக்கலாம். இருப்பினும், சூழல் சாதகமாக இருக்கும் இடமெல்லாம், உடல்களை கூடிய விரைவில் மீட்க வேண்டிய பொறுப்பு சம்பந்தப்பட்ட அதிகாரிகளுக்கு உள்ளது,” என்று அவர் கூறினார்.
மேலும் அவர் கூறுகையில், மனித உரிமைகள் ஆணைக்குழு தனது அதிகாரிகளைப் பாதிக்கப்பட்ட பகுதிகளுக்கு அனுப்பி நிலைமைகளை அவதானித்து தகவல்களைச் சேகரித்து வருவதாகத் தெரிவித்தார். “இந்த அவதானிப்புகள் இன்னும் தொடர்கின்றன. செயல்முறை முடிந்ததும் அறிக்கை தயாரிக்கப்பட்டு சம்பந்தப்பட்ட அதிகாரிகளிடம் சமர்ப்பிக்கப்படும்” என்றார்.
பின்னணி: கடந்த ஆண்டு (2025) நவம்பர் இறுதியில் ஏற்பட்ட டிட்வா (Ditwah) சூறாவளி காரணமாக இலங்கை கடும் வானிலை பாதிப்புக்கு உள்ளானது. இதன் காரணமாக நாட்டின் பல பகுதிகளில் பெய்த கனமழை, வெள்ளப்பெருக்கு மற்றும் நிலச்சரிவுகளை ஏற்படுத்தியது. குறிப்பாக மலையகப் பகுதிகளில் ஆயிரக்கணக்கான மக்கள் இடம்பெயர்ந்ததுடன், வீடுகள் மற்றும் பொதுக் கட்டமைப்புகளுக்குப் பெரும் சேதம் ஏற்பட்டது.
இந்த அனர்த்தத்தில் 644 பேர் உயிரிழந்துள்ளனர், மேலும் 175 பேர் இன்னமும் மாயமாகியுள்ளதாக அறிவிக்கப்பட்டுள்ளது. முப்படையினர், காவல்துறை மற்றும் அனர்த்த முகாமைத்துவ அதிகாரிகள் மீட்புப் பணிகளில் ஈடுபட்டு வருகின்றனர். மிக மோசமாகப் பாதிக்கப்பட்ட சில இடங்களில், நிலச்சரிவினால் சரிந்து விழுந்த மண்ணுக்குள் பல உடல்கள் புதையுண்டிருக்கலாம் என நம்பப்படுகிறது
