இலங்கைக்கான அமெரிக்கத் தூதுவர் ஜூலி சங், கிட்டத்தட்ட நான்கு வருட கால அர்ப்பணிப்புடன் கூடிய சேவையைத் தொடர்ந்து, வரும் ஜனவரி 16 அன்று கொழும்பிலிருந்து புறப்படவுள்ளதாக இலங்கைக்கான அமெரிக்கத் தூதரகம் அறிவித்துள்ளது. இதன் மூலம் இலங்கையில் அமெரிக்காவின் உயர்மட்ட இராஜதந்திரி என்ற அவரது பதவிக்காலம் முடிவுக்கு வருகின்றது.
தூதுவர் ஜூலி சங், 2022 ஆம் ஆண்டு பெப்ரவரி மாதம் கொழும்பில் தனது கடமைகளைப் பொறுப்பேற்றார்.
“இலங்கையில் நான் கழித்த ஒவ்வொரு கணத்தையும் நான் நேசித்தேன்,” என்று தூதுவர் சங் குறிப்பிட்டுள்ளார். “முதல் நாளிலிருந்தே, அமெரிக்காவின் நலன்களை மேம்படுத்துவதே எனது நோக்கமாக இருந்தது—நமது பாதுகாப்புப் பங்களிப்புகளை வலுப்படுத்துதல், வர்த்தகம் மற்றும் முதலீட்டை விரிவுபடுத்துதல், மற்றும் இரு நாடுகளையும் வலிமையாக்கும் கல்வி மற்றும் ஜனநாயக விழுமியங்களை ஊக்குவித்தல் ஆகியவற்றில் நான் கவனம் செலுத்தினேன். நாம் இணைந்து, அமெரிக்க மக்களுக்குப் பலன் தரக்கூடிய மற்றும் சுதந்திரமான, திறந்த மற்றும் பாதுகாப்பான இந்தோ-பசிபிக் பிராந்தியத்தை ஆதரிக்கக்கூடிய ஒரு உறவைக் கட்டியெழுப்பியுள்ளோம்.”
தூதுவர் சங்கின் பதவிக்காலத்தில் பல முக்கிய மைல்கற்கள் எட்டப்பட்டன:
-
75 ஆண்டு கால உறவு: 2023 ஆம் ஆண்டில் அமெரிக்கா மற்றும் இலங்கைக்கும் இடையிலான இராஜதந்திர உறவுகளின் 75 ஆவது ஆண்டு நிறைவு கொண்டாடப்பட்டது.
-
அமைதிப் படை (Peace Corps): 2024 இல் அமெரிக்க அமைதிப் படை தன்னார்வலர்கள் மீண்டும் இலங்கைக்குத் திரும்பினர்.
-
புதிய தூதரக வளாகம்: 2022 அக்டோபரில், LEED Gold சான்றிதழ் பெற்ற புதிய நவீன தூதரகக் கட்டிடத்திற்குத் தூதரகம் மாற்றப்பட்டது. இது இலங்கையில் அமெரிக்காவின் நிலையான மற்றும் நீண்டகால இருப்புக்கான அர்ப்பணிப்பைப் பிரதிபலிக்கிறது.
பொருளாதார மீட்பு மற்றும் மனிதாபிமான உதவிகள்
தூதுவர் சங்கின் தலைமையின் கீழ், இலங்கையின் பொருளாதார மீட்சிக்கு அமெரிக்கத் தூதரகம் பாரிய ஆதரவை வழங்கியது. சர்வதேச நாணய நிதியத்தின் (IMF) நீடிக்கப்பட்ட நிதி வசதிக்கான அமெரிக்காவின் ஆதரவு, உணவுப் பாதுகாப்பை உறுதிப்படுத்த வழங்கப்பட்ட அமெரிக்க விவசாயத் திணைக்களத்தின் (USDA) பொதிகள் மற்றும் மிக அண்மையில் 2025 டிசம்பரில் ‘டிட்வா’ (Ditwah) சூறாவளியால் பாதிக்கப்பட்ட சமூகங்களுக்கு வழங்கப்பட்ட மனிதாபிமான உதவிகள் இதில் குறிப்பிடத்தக்கவை.
பாதுகாப்பு மற்றும் கடல்சார் ஒத்துழைப்பு
இந்தோ-பசிபிக் பிராந்தியத்தின் பாதுகாப்பு மற்றும் சுபீட்சத்திற்காக இலங்கை பங்காளர்களுடன் அவர் நெருக்கமாகப் பணியாற்றினார். அவரது காலத்தில்:
-
பாதுகாப்பு பயிற்சிகள்: CARAT, ATLAS ANGEL மற்றும் Pacific Angel போன்ற பிராந்திய பாதுகாப்பு மற்றும் பேரிடர் மீட்புப் பயிற்சிகள் மூலம் பாதுகாப்பு ஒத்துழைப்பு ஆழப்படுத்தப்பட்டது.
-
கடல்சார் பாதுகாப்பு: இலங்கையின் கடல் எல்லைகளைப் பாதுகாக்கும் திறனை மேம்படுத்துவதற்காக பீச்கிராஃப்ட் கிங் எயார் (Beechcraft King Air) விமானம் மற்றும் இரண்டு அமெரிக்க கடலோரக் காவல் படை கப்பல்கள் இலங்கைக்கு வழங்கப்பட்டன.
இளைஞர் மேம்பாடு மற்றும் கலாச்சாரம்
இளைஞர் மற்றும் கல்வித் திட்டங்கள் அவரது காலத்தில் செழித்தோங்கின. மட்டக்களப்பில் ‘அமெரிக்கன் கோர்னர்’ (American Corner) மற்றும் திருகோணமலையில் ஆங்கில மொழி ஆய்வகம் போன்ற புதிய வசதிகள் உருவாக்கப்பட்டன. அத்துடன், ஹம்பாந்தோட்டைக்கு அருகிலுள்ள வரலாற்றுச் சிறப்புமிக்க கொடவாய (Godawaya) கப்பல் சிதைவுகளைப் பாதுகாப்பதற்கும் அவர் அமெரிக்க தூதுவர்களின் கலாச்சார பாதுகாப்பு நிதியம் மூலம் ஆதரவளித்தார்.
தூதுவர் ஜூலி சங் புறப்பட்டதைத் தொடர்ந்து, புதிய தூதுவர் ஒருவர் நியமிக்கப்பட்டு வருகை தரும் வரை, தூதரகத்தின் பிரதித் தலைவர் ஜெய்ன் ஹவல் (Jayne Howell) தற்காலிகப் பொறுப்பதிகாரியாக (Chargé d’Affaires) பணியாற்றுவார் என அறிவிக்கப்பட்டுள்ளது.
