2025ஆம் ஆண்டு வரவு செலவுத் திட்டத்தில் (Budget) ஒதுக்கப்பட்ட 25 மில்லியன் ரூபாய் நிதியின் கீழ், இலங்கையின் உள்நாட்டு இறால் தொழில்துறையை நவீனமயமாக்குவதை நோக்கமாகக் கொண்ட ஒரு திட்டம் தொடங்கப்பட்டுள்ளதாக தேசிய நீர்வாழ் உயிரின வளர்ப்பு மேம்பாட்டு அதிகார சபை (NAQDA) தெரிவித்துள்ளது.
இந்த புதிய முயற்சியானது, இறால் குஞ்சுகளை (Post-larvae) நேரடியாக நீர்நிலைகளில் விடுவிக்கும் பாரம்பரிய முறையிலிருந்து முற்றிலும் மாறுபட்டு, ஒரு புதிய “கூண்டு முறை” (Cage-based method) வளர்ப்பை அறிமுகப்படுத்துகிறது.
இப்புதிய முறையில், இறால் குஞ்சுகள் நீர்நிலைகளுக்குள் இருக்கும் கூண்டுகளில் அடைக்கப்பட்டு, அவை வெளியில் விடுவிக்கப்படுவதற்கு முன்னர் சுமார் ஒரு மாத காலம் முன்கூட்டியே வளர்க்கப்படுகின்றன (Pre-growing). இந்த புதிய முறையை சோதிப்பதற்காக, பிரதான நீர்நிலைகளுக்கு அருகில் 25 ஆராய்ச்சி அளவிலான கூண்டுகளை NAQDA ஏற்கனவே அமைத்துள்ளது.
“நாங்கள் ஏற்கனவே இந்த ஆய்வுத் திட்டத்தை கிரிதலே குளம், அனுராதபுர மாவட்டத்தில் உள்ள இரண்டு நீர்நிலைகள் மற்றும் வட மாகாணத்தில் உள்ள இரண்டு நீர்நிலைகளில் வெற்றிகரமாக செயல்படுத்தியுள்ளோம். இதற்கு முன்னர், ஒரு கிலோகிராம் இறாலைப் பெறுவதற்கு சுமார் 300 முதல் 400 இறால் குஞ்சுகளை நீர்நிலைகளில் விட வேண்டியிருந்தது. ஆனால் இந்த புதிய ‘கூண்டு முறை’ மூலம், ஒரு மாதம் வளர்க்கப்படும் இறால்கள் வெளியில் விடுவிக்கப்படுவதற்கு முன்பே சுமார் 1.5 முதல் 2 அங்குல அளவை எட்டிவிடுவதால், ஒரு கிலோகிராம் இறாலைப் பெறுவதற்கு சுமார் 100 குஞ்சுகள் மட்டுமே தேவைப்படும் என எதிர்பார்க்கிறோம். இது உள்நாட்டு இறால் தொழில்துறையில் செயல்திறனை மூன்று மடங்கு அதிகரிக்கும்” என்று NAQDA தலைவர் கித்சிறி தர்மப்பிரிய இந்த புதிய அணுகுமுறையின் நன்மைகளை விளக்கும் போது தெரிவித்தார்.
இத்திட்டத்தின் வெற்றி, தனியார் துறை மற்றும் மாகாண சபைகளின் தீவிர பங்களிப்பை ஈர்த்துள்ளது. உள்நாட்டு இறால்களைக் கொள்வனவு செய்யும் தொழில்முனைவோர் இறால் குஞ்சுகளையும் தீவனங்களையும் வழங்க ஒப்புக்கொண்டுள்ளனர். அதேநேரம், ஊவா மற்றும் தென் மாகாண சபைகள் இந்தத் திட்டத்தை தத்தமது பிராந்தியங்களில் விரிவுபடுத்துவதற்கு ஆதரவளிக்க உறுதியளித்துள்ளன.
