உலக டெஸ்ட் சாம்பியன்ஷிப் (WTC) வடிவம் மற்றும் ஒரு டெஸ்ட் போட்டித் தொடர் முன்மொழிவுகளை மறுபரிசீலனை செய்யவுள்ள ஐசிசி

அடுத்த வாரம் நடைபெறவிருக்கும் கூட்டத்தொடர்களில், உலக டெஸ்ட் சாம்பியன்ஷிப்பின் (WTC) எதிர்கால வடிவம் குறித்த விவாதங்களை மீண்டும் தொடங்க சர்வதேச கிரிக்கெட் கவுன்சில் (ICC) தயாராகி வருகிறது. மே 21 அன்று ஐசிசியின் முதன்மை நிர்வாக அதிகாரிகள் குழு (CEC) இணையவழியாக (Virtual) ஒரு கூட்டத்தை நடத்தும் என்றும், அதனைத் தொடர்ந்து ஐபிஎல் (IPL) இறுதி வார இறுதி நாட்களான மே 30-31 ஆகிய தேதிகளில் அகமதாபாத்தில் ஐசிசி  (ICC Board) நேரடிக் கூட்டம் நடைபெறும் என்றும் ESPNcricinfo அறிந்துள்ளது.

கடந்த ஆண்டு, உலக டெஸ்ட் சாம்பியன்ஷிப்பிற்கான புதிய கட்டமைப்பைக் குறித்து பரிந்துரைகளை வழங்குவதற்காக, நியூசிலாந்தின் முன்னாள் துடுப்பாட்ட வீரர் ரோஜர் ட்வூஸ் (Roger Twose) தலைமையிலான ஒரு பணிக்குழுவை ஐசிசி நியமித்திருந்தது. உலக டெஸ்ட் சாம்பியன்ஷிப் தற்போது அதன் நான்காவது சுழற்சியில் (Cycle) உள்ளது. அடுத்த சுழற்சிக்கும் (2027-29) தற்போதுள்ள கட்டமைப்பையே ஐசிசி தக்கவைத்துக் கொள்ள வாய்ப்புள்ளதாகத் தோன்றும் அதே வேளையில், இத்தொடரை 12 அணிகளாக விரிவுபடுத்தி, எஞ்சியிருக்கும் முழு உறுப்பு நாடுகளான (Full Members) ஜிம்பாப்வே, அயர்லாந்து மற்றும் ஆப்கானிஸ்தான் ஆகியவற்றை உள்ளே கொண்டு வர வேண்டும் என்பது முக்கிய பரிந்துரைகளில் ஒன்றாக உள்ளது. இந்த
சர்வதேச கிரிக்கெட் கட்டுப்பாட்டுச்சபையின் பார்வைக்குக் கொண்டு செல்லப்படுவதற்கு முன்னதாக முதன்மை நிர்வாக அதிகாரிகள் குழுவிடம் (CEC) சமர்ப்பிக்கப்படும்.

கடந்த ஏப்ரல் மாதம் ESPNcricinfo வெளியிட்ட செய்தியின்படி, இந்த பரிந்துரைகளில் ஜிம்பாப்வே, அயர்லாந்து மற்றும் ஆப்கானிஸ்தான் ஆகிய நாடுகள் விளையாட அனுமதிக்கப்படுவதும், உலக டெஸ்ட் சாம்பியன்ஷிப் புள்ளிகளுக்காக ஒரேயொரு டெஸ்ட் போட்டியை மட்டுமே கொண்ட தொடர்களையும் (One-Test series) லீக் போட்டிகளில் கருத்தில் கொள்வதும் அடங்கும்.

தற்போதுள்ள ஒன்பது முழு உறுப்பு நாடுகள் தங்களின் உலக டெஸ்ட் சாம்பியன்ஷிப் கடமைகளை இருதரப்புத் தொடர்களாக (Bilaterally) திட்டமிடுகின்றன. இதன்படி இரண்டு ஆண்டுகால சுழற்சியில் மூன்று உள்நாட்டுத் தொடர்கள் (Home series) மற்றும் மூன்று வெளிநாட்டுத் தொடர்கள் (Away series) விளையாடப்பட வேண்டும் என்பதுடன், ஒரு தொடருக்குக் குறைந்தபட்சம் இரண்டு டெஸ்ட் போட்டிகள் கட்டாயமாக்கப்பட்டுள்ளது.

ஐசிசியின் தற்போதைய எதிர்கால சுற்றுப்பயணத் திட்டம் (FTP) அடுத்த ஆண்டு மார்ச் மாதத்துடன் முடிவடைகிறது, மேலும் உலக டெஸ்ட் சாம்பியன்ஷிப் இறுதிப் போட்டி ஜூன் 2027 இல் இங்கிலாந்தில் நடைபெறத் திட்டமிடப்பட்டுள்ளது. இந்த எதிர்கால சுற்றுப்பயணத் திட்டம்உறுப்பு நாடுகளின் கட்டுப்பாட்டுச்சபைகளுடன்  இடையே பேசித் தீர்மானிக்கப்படும் இருதரப்புத் தொடர்களைக் கொண்டிருந்தாலும், அதன் இறுதி கட்டமைப்பிற்கு ஐசிசியே ஒப்புதல் அளிக்கிறது.

இந்த விவாதங்கள் கணிசமான முன்னேற்றமடையும் என்று ஐசிசி நம்பிய போதிலும், மே மாத கூட்டங்களில் புதிய கட்டமைப்பு இறுதி செய்யப்படும் என்று எதிர்பார்க்கப்படவில்லை. இருப்பினும், ஜூன் 12 முதல் ஜூலை 5 வரை இங்கிலாந்தில் நடைபெறவுள்ள மகளிர் டி20 உலகக் கோப்பைக்குப் பிறகு, ஜூலை மாதம் எடின்பர்க்கில் (Edinburgh) நடைபெறத் திட்டமிடப்பட்டுள்ள வருடாந்திர பொதுக் கூட்டத்தின் (AGM) போது ஐசிசி இது குறித்து ஒரு தீர்க்கமான முடிவை எடுக்கக்கூடும்.

ஒவ்வொரு ஆண்டும் ஐசிசி நடத்தும் காலாண்டு கூட்டங்களின் ஒரு பகுதியாகவே இந்த மே மாத கூட்டங்கள் அமைகின்றன. இவை உண்மையில் மார்ச்-ஏப்ரல் மாதங்களில் நடைபெறத் திட்டமிடப்பட்டிருந்தன. கத்தாரின் தோஹா (Doha, Qatar) நகரில் நடத்தப்படவிருந்த இக்கூட்டங்கள், மத்திய கிழக்கு நாடுகளில் ஏற்பட்ட நெருக்கடி நிலை (West Asia crisis) காரணமாக மாற்றி அமைக்கப்பட்டன.

தற்போது இந்த  கூட்டம் அகமதாபாத்திற்கு மாற்றப்பட்டுள்ளதால், இதில் பாகிஸ்தான் கிரிக்கெட் கட்டுப்பாட்டுச்சபை (PCB) பங்களிப்பு எந்த வகையில் இருக்கும் என்பது தெளிவாகத் தெரியவில்லை. வழக்கமான சூழ்நிலையாக இருந்தால் பிசிபி தலைவர் மோசின் நக்வி (Mohsin Naqvi) இதில் நேரில் கலந்துகொள்வார் என்று எதிர்பார்க்கலாம். ஆனால், இந்திய மற்றும் பாகிஸ்தான் அரசாங்கங்களுக்கு இடையிலும், அவற்றின் கிரிக்கெட் கட்டுப்பாட்டுச்சபைகளுக்கு இடையிலும் நிலவும் சுமுகமற்ற உறவுகள் காரணமாக, நக்வி எல்லை தாண்டி இந்தியா வருவாரா அல்லது இணையவழியாகக் கலந்துகொள்வாரா என்பது தற்போது வரை அறியப்படவில்லை