கணினி பயிற்சி நெறி சான்றிதழ் வழங்கும் நிகழ்வு-கிளிநொச்சி

Child Action Lanka நிறுவனத்தின் அனுசரணையில் நடத்தப்பட்ட அடிப்படை கணினி பயிற்சி நெறியை வெற்றிகரமாக நிறைவு செய்த மாணவர்களுக்கான சான்றிதழ் வழங்கும் நிகழ்வு சிறப்புற நடைபெற்றது.(30.06.2026)

இந்நிகழ்வில் பிரதம விருந்தினராக கிளிநொச்சி மாவட்ட மேலதிக அரசாங்க அதிபர் திருமதி நளாஜினி இன்பராஜ் அவர்கள் கலந்துகொண்டு சிறப்பித்தார்.

நிகழ்வில் உரையாற்றிய மாவட்ட மேலதிக அரசாங்க அதிபர் திருமதி நளாஜினி இன்பராஜ் அவர்கள்,

இவ்வாறான பயிற்சி நெறிகளை தனியார் நிறுவனங்களில் கற்க வேண்டுமாயின் அதிகளவிலான கட்டணங்களைச் செலுத்த வேண்டியிருப்பதோடு, யாழ்ப்பாணம் அல்லது வவுனியா போன்ற பகுதிகளுக்குச் சென்று பயிற்சியைத் தொடர வேண்டிய நிலையும் காணப்படுவதாக தெரிவித்தார். அதற்காக போக்குவரத்து, உணவு உள்ளிட்ட மேலதிக செலவுகளையும் நேரத்தையும் ஒதுக்க வேண்டியிருப்பதால் பல மாணவர்கள் பயிற்சி நெறிகளை இடைநிறுத்தும் சூழ்நிலை உருவாகின்றது என்றும் அவர் சுட்டிக்காட்டினார்.

இந்நிலையில், Child Action Lanka நிறுவனம் அக்கராயன்குளம் மற்றும் அம்பாள்குளம் பகுதிகளில் சிறுவர்களை மையப்படுத்திய செயற்றிட்டங்களை முன்னெடுத்து, இவ்வாறான பயிற்சி வாய்ப்புகளை வழங்கி வருவது மிகவும் பாராட்டத்தக்க செயற்பாடாகும் என்றும் அவர் குறிப்பிட்டார்.

மேலும், இன்றைய தொழில்நுட்ப யுகத்தில் தொழில்நுட்பத்துடன் இணைந்து அதன் நன்மை, தீமைகளைப் பிரித்தறிந்து பொறுப்புடன் செயற்படுவது மிகவும் அவசியம் என வலியுறுத்திய அவர், இத்தகைய பயிற்சித் திட்டங்களை முன்னெடுத்து வரும் Child Action Lanka நிறுவனத்தினருக்கு தனது நன்றியையும் பாராட்டுகளையும் தெரிவித்தார்.

நிகழ்வின் நிறைவில், அடிப்படை கணினி கற்கையை வெற்றிகரமாக பூர்த்தி செய்த மாணவர்களுக்கு சான்றிதழ்கள் வழங்கி கௌரவிக்கப்பட்டனர்.

இந் நிகழ்வில் கரைச்சி பிரதேச செயலகத்தின் பிரதி திட்டமிடல் பணிப்பாளர் திரு. ராஜ் வினோத், அரச சார்பற்ற நிறுவனங்களின் மாவட்ட ஒருங்கிணைப்பாளர் திரு. திருமாறன், திரு. A. லிஸ்டன் ரஜனிகாந்த், மாவட்ட ஒருங்கிணைப்பாளர் – மனிதவளப் பிரிவு,கரைச்சி பிரதேச செயலக திறன்விருத்தி உத்தியோகத்தர் திருமதி.விஜிதா,

Child Action Lanka நிறுவனத்தின் பிரதிநிதி திரு. D.M.O.T.K. பண்டார, பயிற்சியை நிறைவு செய்த மாணவர்கள் மற்றும் அவர்களது பெற்றோர்கள் உள்ளிட்ட பலரும் கலந்துகொண்டனர்.